ވޯޓަރސް ލިސްޓްގައި ދެ ކެނޑިޑޭޓުންގެ ފަރާތުން ސޮއިކުރަން ފަށައިފި

ރިޔާސީ އިންތިހާބުގެ ދެވަނަ ބުރުގައި ވޯޓުލުމުގެ ހައްގު ލިބިގެންވާ މީހުންގެ ދާއިމީ ވޯޓާސް ލިސްޓުގައި ދެ ކެނޑިޑޭޓުންގެ ފަރާތުން މިއަދު ސޮއިކުރަން ފަށައިފިއެވެ.

ވޯޓާސް ލިސްޓުގައި ސޮއިކުރުން އޮތީ އިލެކްޝަންސް ކޮމިޝަންގެ އިންތިހާބާ ބެހޭ މަރުކަޒު، ދަރުބާރުގޭގައެވެ. އެގޮތުން އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ޞާލިހުގެ ފަރާތްފުޅުންނާއި ފީޕީއެމް ޕީއެންސީގެ ކެންޑިޑޭޓް ޑރ. މުހައްމަދު މުއިއްޒުގެ ފަރާތްޕުޅުން ވޯޓާސް ލިސްޓްގައި ސޮއިކުރުން މިހާރު ކުރިއަށްދާ ކަމުގައި އިލެކްޝަންސް ކޮމިޝަނުން މިއަދު ވަނީ ވިދާޅުވެފައެވެ.

އިންތިހާބުތަކާ ބެހޭ އާއްމު ގަވާއިދުގައި ބުނާ ގޮތުން، އިލެކްޝަންސް ކޮމިޝަނާއި ކެންޑިޑޭޓުން ނުވަތަ ކެންޑިޑޭޓުންގެ މަންދޫބުން ވޯޓާސް ލިސްޓު ސައްހަ ކަމަށް އެއްބަސްވެ، އިނގިލީގެ ނިޝާން ޖަހަން ޖެހެއެވެ.މިއަހަރުގެ ރިޔާސީ އިންތިހާބުގެ ފުރަތަމަ ބުރުގައި ވޯޓު ލުމުގެ ހައްގު 282،395 މީހަކަށް ލިބުނު އިރު މިފަހަރުގެ ދެވަނަ ބުރުގައި ވޯޓު ލުމުގެ ހައްގު އިތުރު 408 މީހަކަށް ލިބެއެވެ.މީގެ އިތުރުން މިއަހަރުގެ އިންތިހާބުގެ ދެވަނަ ބުރުގައި ރީ-ރަޖިސްޓަރ ކުރުމަށް އެދި 50،047 ފޯމު އިލެކްޝަންސް ކޮމިޝަނަށް ހުށަހަޅައިފައިވާއިރު އޭގެ ތެރެއިން ސައްހަވީ 38،763 ފޯމެވެ. އަދި ސައްހަކަން ކަށަވަރު ނުވާ 11،284 ފޯމް ލިބުނު ކަމަށް އިލެކްޝަންސް ކޮމިޝަނުން ވިދާޅުވެފައި ވެއެވެ.

ރީ-ރަޖިސްޓަރީ ކޮށްފައިވާ މީހުންގެ އަދަދު ގިނަވުމުގެ ސަބަބުން އިތުރު 12 ވޯޓު ފޮށި ބެހެއްޓުމަށް އެ ކޮމިޝަނުން ވަނީ ނިންމައިފައެވެ. އެހެންވެ ދެ ވަނަ ބުރުގައި 586 ވޯޓު ފޮށި ބަހައްޓަން ވަނީ ނިންމާފައެވެ.ރިޔާސީ އިންތިހާބުގެ ދެވަނަ ބުރުގައި 282،804 މީހަކަށް ވޯޓުލުމުގެ ހައްގު ލިބިގެން ވެއެވެ.