ސައުދީން 2027 ވަނަ އަހަރުން ފެށިގެން ސިންގަޕޫރުގައި ތެޔޮ ރައްކާކުރަނީ

ސައުދީ އަރަބިއްޔާ އާއި ސިންގަޕޫރުގެ ސަރުކާރުން ގުޅިގެން ސިންގަޕޫރުގައި ކްރޫޑް އޮއިލް ރައްކާކުރެވޭނެ އިންތިޒާމެއް ގާއިމްކޮށް، 2027 ވަނަ އަހަރުން ފެށިގެން ސިންގަޕޫރުގައި ކްރޫޑް ތެޔޮ ރައްކާކުރަން ނިންމައިފިއެވެ.

މި މަޝްރޫއުގެ މައިގަނޑު މަޤްސަދަކީ ދެ ޤައުމުގެ ހަކަތައިގެ ރައްކާތެރިކަން ކަށަވަރުކުރުމާއި، ތެޔޮ ފޯރުކޮށްދިނުމުގެ ސަޕްލައި ޗެއިން އިތުރަށް ވަރުގަދަކުރުމެވެ.

މި ނިންމުން އިއުލާންކުރުމުގެ ގޮތުން، ސިންގަޕޫރު އިންޓަރނޭޝަނަލް އެނާޖީ ވީކް (އެސް.އައި.އީ.ޑަބްލިއު) ގެ ތެރެއިން ސިންގަޕޫރުގެ އެނާޖީ މާކެޓް އޮތޯރިޓީ (އީ.އެމް.އޭ) އާއި ޖޭ.ޓީ.ސީ ކޯޕަރޭޝަނުން ވަނީ ސައުދީ އަރާމްކޯއާއެކު އެއްބަސްވުމެއްގައި ސޮއިކޮށް، ލިޔުންތައް ބަދަލުކޮށްފައެވެ.

ރޭވިފައިވާ ގޮތުގެ މަތިން ސައުދީގެ ކްރޫޑް އޮއިލް ރައްކާކުރުމަށް ހަމަޖެހިފައިވަނީ ސިންގަޕޫރުގެ ޖުރޮންގް އައިލެންޑްގައިވާ ޖުރޮންގް ރޮކް ކޭވަރންސްގައެވެ. އަދި މި ސްޓޯރޭޖުގެ ޚިދުމަތްތަކާއި އޮޕަރޭޝަންތައް 2027 ވަނަ އަހަރުގެ ދެވަނަ ކުއާޓަރުގެ ތެރޭގައި ފެށުމަށް ވަނީ އަމާޒުހިފާފައެވެ.

މިގޮތަށް ރައްކާކުރެވޭ ކްރޫޑް އޮއިލްގެ ސަބަބުން ދުނިޔޭގެ މާކެޓަށް ނުވަތަ ތެޔޮ ފޯރުކޮށްދިނުމަށް ދިމާވެދާނެ ނުވަތަ މެދުކެނޑުމެއް އަތުވެދާނެ ހާލަތްތަކުގައި ސިންގަޕޫރުގެ ހަކަތައިގެ ބޭނުންތައް ފުއްދައިދިނުމަށް އެހީތެރިވެދޭނެއެވެ. މީގެ އިތުރުން، ދެކުނު އޭޝިއާގެ ސަރަހައްދުތަކަށް ސައުދީ ކްރޫޑް އޮއިލް ފޯރުކޮށްދިނުމުގެ ސަޕްލައި ޗެއިން އިތުރަށް ހަރުދަނާވެގެންދާނެއެވެ.

މި ފިޔަވަޅަކީ ދެ ޤައުމުގެ ދެމެދުގައި ހަކަތައިގެ ދާއިރާއިން އޮތް ގުޅުން އިތުރަށް ބަދަހިވެގެންދާނެ ކަމެކެވެ. މިއީ ސަރަހައްދީ ހަކަތައިގެ މަރުކަޒެއްގެ ގޮތުގައި ސިންގަޕޫރުން އަދާކުރާ ދައުރާއި ސައުދީ އަރަބިއްޔާއިން ތެޔޮ ފޯރުކޮށްދިނުން ހަރުދަނާކުރުމަށް ކުރާ މަސައްކަތްތައް ގުޅުވާލަދޭ މުހިންމު މަޝްރޫއެއްކަން ސައުދީ ސަރުކާރުން ފާހަގަކުރެއެވެ.

މި ކަންކަން ކުރިއަށް ގެންދިއުމަށްޓަކައި ސިންގަޕޫރުގެ މިނިސްޓްރީ އޮފް ޓްރޭޑް އެންޑް އިންޑަސްޓްރީ އާއި ސައުދީގެ މިނިސްޓްރީ އޮފް އެނާޖީ ގުޅިގެން ކުރަންޖެހޭ މަސައްކަތްތައް ކުރިއަށްދާނެއެވެ.