މަޑުއްވަރީ އަތުން މޮޅުވެ، އިންނަމާދޫ އިން މުބާރާތް ނިންމާލީ މޮޅަކާއެކު

ރ.އަތޮޅު ކައުންސިލް ފުޓްސަލް ޗެލެންޖު 2023 ގައި ރޭ ކުޅެވުނު ފުރަތަަމަ މެޗުގައި ގުރޫޕް އޭގެ އިންނަމާދޫ އާއި މަޑުއްވަރީ ވާދަކުރި މެޗު 3-2 ގެ ނަތީޖާއަކުން އިންނަމާދޫ އިން ކާމިޔާބުކޮށްފި އެވެ.

ރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި މެޗުގައި ފުރަތަަމަ ލަނޑުޖަހައި ކުރިހޯދީ މަޑުއްވަރީ ޓީމުންނެވެ. މިލަނޑު މެޗު ފެށިގެން ފުރަތަމަ މިނެޓުގައި ކާމިޔާބުކޮށްދިނީ އެޓީމުގެ މާއިސް މުހައްމަދު އެވެ. މިއީ އެޓީމުގެ ކެޕްޓަން މިގްދާދު ތަނަވަސްކޮށްދިން ފުރުސަތެއްގައި އިންނަމާދޫ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

ނަމަވެސް އޭގެ ތިން މިނިޓް ފަހުން އިންނަމާދޫ އިން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ މުހައްމަދު ފައިޒަން އެވެ. މިއީ މަޑުއްވަރީ ޓީމުގެ ފަހަތުން އެޓީމުގެ ކެޕްޓަން މިގްދާދަށް ހެދުނު ގޯހެއްގެ ފައިދާ ނަގައި ބޯޅައާއެކު ކުރިއަށް އަރައި ތިރިތިރިން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިމެޗުގައި މަޑުއްވަރީ ޓީމުން ދެވަނަ ފަހަރަށް ލީޑު ހޯދި ލަނޑު ފުރަތަމަ ހާފުގެ 13 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން މިގްދާދު އެވެ. ނަމަވެސް ފުރަތަމަ ހާފު ނިމުމުގެ ކުރިން އިންނަމާދޫ އިން ވަނީ ލަނޑެއް ކާމިޔާބުކޮށް ދެވަނަ ފަހަރަށް މެޗުގެ ނަތީޖާ އެއްވަރުކޮށްފައެވެ. މިލަނޑު ފުރަތަމަ ހާފުގެ 18 ވަނަ މިނެޓުގައި ކާމިޔާބުކޮށްދިނީ އެޓީމުގެ ގޯލްކީޕަރު އިބްރާހިމް ވަސީމް އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފު ވަރުގަދަކޮށް ފެށީ އިންނަމާދޫ ޓީމުންނެވެ. އެގޮތުން ދެވަނަ ހާފު ފެށިގެން ހަތަރުވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މިމެޗުގައި ފުރަތަމަ ފަހަރަށް ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ މުހައްމަދު ފައިޒަން އެވެ. މިއީ އިންނަމާދޫ ހާފު ތެރެއިިން ލިބުނު ބޯޅައެއް ހިފައިގެން ކުރިއަށް އަރައި ކައިރީގައި ހުރި ކުޅުންތެރިއާ ކައިރިން ނައްޓާލުމަށް ފަހު ތިރިތިރިން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މީގެ އިތުރުން ވެސް މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 3-2 ގެ ނަތީޖާއަކުން އިންނަމާދޫ ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ އިންނަމާދޫ ޓީމުގެ ގޯލްކީޕަރު އިބްރާހިމް ވަސީމް އެވެ.

މިމެޗުން ލިބުނު ތިން ޕޮއިންޓާއެކު އިންނަމާދޫ އިން މުބާރާތް ނިންމާލީ ގުރޫޕް އޭގެ ތިންވަނައިގައެވެ. އަދި މިމެޗުން ބަލިވި މަޑުއްވަރީ އިން މުބާރާތުގައި ކުޅުނު ތިން މެޗުން ވެސް ބަލިވެފައިވާ އިރު އެޓީމު މުބާރާތް ނިންމާލީ ހަތަރު ޓީމު ހިމެނޭ މިގުރޫޕްގެ ފުލުގަ އޮވެއެވެ.