ސްޓެލްކޯ މަހިބަދޫ އިންޓަ އޮފީސް ވޮލީ މުބާރާތް: ވައިކިންގްސް އަދި ހޮސްޕިޓަލް ބްލޭޒް އިން މުހިންމު މޮޅުތަކެއް ހޯދައިފި

ސްޓެލްކޯ މަހިބަދޫ އިންޓަ އޮފީސް ވޮލީބޯޅަ މުބާރާތުގެ އަންހެން ޑިވިޝަނުގައި ކުޅެވުނު ފޯރިގަދަ މެޗުތަކުން ވައިކިންގްސް އާއި ހޮސްޕިޓަލްގެ ބްލޭޒް މޮޅުވެއްޖެއެވެ.

މުބާރާތުގެ 23 ވަނަ މެޗުގައި ބައްދަލުކުރީ ވައިކިންގްސް އަދި ޕޮލިސް ޓީމެވެ. މި މެޗު ސީދާ ދެ ސެޓުން ކާމިޔާބުކުރީ ވައިކިންގްސް އެވެ.

މެޗުގެ ފުރަތަމަ ސެޓު 18-12 އިން ވައިކިންގްސް ގެންދިޔައިރު، ދެވަނަ ސެޓުގައި ޕޮލިސް ޓީމުން ވަނީ ރަނގަޅު ކުޅުމެއް ދައްކައި ވާދަކޮށްފައެވެ. ނަމަވެސް، ވައިކިންގްސް އިން ވަނީ 18-15 އިން މި ސެޓު ކާމިޔާބުކޮށް މެޗު ކާމިޔާބުކޮށްފައެވެ.

މި މެޗުގެ މޮޅު ކުޅުންތެރިޔާ ގެ މަގާމު ހޯދީ ވައިކިންގްސް ޓީމުގެ ޖާޒީ ނަންބަރު 17، ސުރުފާ ޙުސައިން އެވެ.

މުބާރާތުގެ 24 ވަނަ މެޗުގައި ހޮސްޕިޓަލް (ބްލޭޒް) ނުކުތީ މަހިބަދޫ ކައުންސިލް (ބްލިސް) އާ ދެކޮޅަށެވެ. މި މެޗު ފަސޭހަކަމާއެކު ސީދާ ދެ ސެޓުން ކާމިޔާބުކުރީ ހޮސްޕިޓަލް (ބްލޭޒް) އެވެ.

އެ ޓީމުން މެޗުގެ ސެޓުތައް ގެންދިޔައީ 18-9 އަދި 18-3 ގެ ބޮޑު ތަފާތަކުންނެވެ.

މި މެޗުގެ މޮޅު ކުޅުންތެރިޔަކަށް ހޮވުނީ ހޮސްޕިޓަލް (ބްލޭޒް) ޓީމަށް މޮޅު ކުޅުމެއް ދެއްކި ޖާޒީ ނަންބަރު 15، ފާޠިމަތު މުފީދާ އެވެ.

މި މެޗުތަކަށްފަހު އަންހެން ޑިވިޝަނުގެ ތާވަލަށް ބަލައިލާއިރު، ގްރޫޕް 'އޭ' ގެ އެންމެ ގިނަ ޕޮއިންޓާއެކު އެއްވަނައިގައި އޮތީ މަހިބަދޫ ކައުންސިލްގެ ވޮރިއާޒް ޓީމެވެ. މި ގްރޫޕުގެ ދެވަނައިގައި އޮތީ އޭޑީއެޗް އޭއީސީ އެވެ. އަދި ގްރޫޕް 'ބީ' ގެ އެއްވަނައިގައި ހޮސްޕިޓަލް އެލީޓް ޓީމު އޮތްއިރު، ދެވަނައިގައި އޮތީ ވައިކިންގްސް އެވެ.

މި މުބާރާތަކީ މަހިބަދޫގެ އޮފީސްތަކުގެ މެދުގައި އެކުވެރިކަން ބަދަހިކުރުމަށާއި، ކުޅިވަރުގެ ރޫޙު އާލާކުރުމުގެ މަޤްޞަދުގައި ސްޓެލްކޯއިން އިންތިޒާމުކޮށްގެން ކުރިއަށްގެންދާ ފޯރިގަދަ މުބާރާތެކެވެ.