ކާށިދޫގައި ކުރިއަށް ގެންދިޔަ އޭއެފްސީ "ސީ" ލައިސަންސް ކޯސް ކާމިޔާބުކަމާއެކު ނިންމާލައިފި

އެމްޖީ ސްޕޯޓްސް ކުލަބާއި ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަދި ކުޅިވަރާއި ބެހޭ ވުޒާރާ، ކާށިދޫ ކައުންސިލް އަދި ޑަބްލިޔުޑީސީގެ އިތުރުން ނެޝަން އިސްޓިޓިއުޓް ގުޅިގެން ކ.ކާށިދޫގައި ކުރިއަށް ގެންދިޔަ އޭއެފްސީ "ސީ" ލައިސަންސް ކޯސް ކާމިޔާބުކަމާއެކު ނިންމާލައިފިއެެވެ.

28 އެޕްރީލް 2025 އިން 9 މެއި 2025 ގެ ނިޔަލަށް ޖުމްލަ 30 ބައިވެރިންނާއެކު ކ.ކާށިދޫގައި ކުރިއަށް ގެންދިޔަ މިކޯސް 25 ބައިވެރިއަކު ފުރިހަމަކޮށްފައިވާއިރު، އޭގެ ތެރޭގައި 19 ކޯޗުންނަކީ ކާށިދޫއަށް ނިސްބަތްވާ ކޯޗުނުންނެވެ. އަދި ކޯސް ފުރިހަމަކުރި އަނެއް ހަ ކޯޗުންނަކީ ރަށުން ބޭރުން ބައިވެރިވި ކޯޗުންނެވެ.

މި ކޯސް ނިންމުމުގެ ރަސްމިއްޔާތު ޝަރަފުވެރިކޮށްދެއްވީ ކާށިދޫ ދާއިރާގެ އިއްޒައްތެރި މެންބަރު މުންތަޒިމް އިބްރާހިމް އެވެ. އަދި މިރަސްމިއްޔާތުގައި ސްޕޯޓްސް މިނިސްޓްރީގެ ފަރާތުން ޑެޕިއުޓީ މިނިސްޓަރ އަސްލަމް ރަހާގެ އިތުރުން ޑިރެކްޓަރ ޖެނަރަލް އަލީ ޒަކީ ވެސް ބައިވެރިވެވަޑައިގެންނެވިއެވެ.

މިރަސްމިޔާތުގައި ވާހަކަފުޅުދައްކަވަމުން ކާށިދޫ ދާއިރާގެ މެންބަރު މުންތަޒިމް ވިދާޅުވީ "ކާށިދޫގައި މިފަދަ ކޯހެއް އޮމާންކަމާއެކު ކުރިއަށް ގެންގޮސް ކާމިޔާބުކަމާއެކު ނިންމާލުމަކީ ވަރަށް އުފާކުރާކަމެއް.. އަދި އަޅުގަނޑު ދެކޭގޮތުގައި މިފަދަ މީހުން ބިނާކުރުމުގެ ކަންތައްތަކަށް އެންމެ ބޮޑު އިސްކަމެއްދޭންވީ"..

އިތުރަށް ވާހަކަފުޅުދައްކަވަމުން މުންތަޒިމް ވިދާޅުވީ ރަށުގެ ފައިދާއަށް މިނިސްޓްރީ އާއި ގުޅިގެން އެމްޖީ ސްޕޯޓްސް ކުލަބުން ދެއްކި ނަމޫނާއަށް ހިތުގެ އެންމެ ފުންމިނުން ޝުކުރުއަދާކުއްވާ ކަމަށެވެ. އަދި ދާއިރާގެ މެންބަރުގެ ހައިސިއްޔަތުން މިފަދަކަންކަމަށް ދެވެން އޮތް އެންމެ ފުރިހަމަ އެހީތެރިކަމާއި އެއްބާރުލުން ދެއްވާނެކަމުގެ ޔަގީންކަން ވަނީ ދެއްވާފައެވެ.

މިރަސްމިއްޔާތުގައި ވާހަކަ ދައްކަމުން އެމްޖީ ސްޕޯޓްސް ކުލަބުގެ ރައީސް އަލީ ޒިދާން ފާހަގަކުރެެއްވީ " މިކުލަބު ވުޖޫދުވި ފަހުން މިވީ ތިން އަހަރުގެ ތެރޭގައި އެންމެ ބޮޑު އިސްކަމެއްދީގެން ކުރަމުން އަންނަ މަސައްކަތަކީ ކުޅިވަރާއި އަދި އެހެނިހެން ދާއިރާތަކުން ބިނާކުރުމުގެ މަސައްކަތެވެ. އަދި ރަށުގެ ކުޅިވަރު ކުޅިވަރާއި ގުޅުންހުރި ކަންކަން ތަރައްގީކޮށް ޒުވާނުންނަށް ކުޅިވަރުގެ އެކި ދާއިރާތަކުން ކުރިއަށް ދިއުމުގެ ފުރުސަތު ފަހިކޮށްދިނުމަކީ ކުލަބަށް ލިބޭ އުފަލެއް".. އަދި ކުލަބުގެ ފަރާތުން ހިންގާ މިފަދަ ހަރަކާތްތައް ކާމިޔާބުކަމާއެކު ކުރިއަށް ގެންދިއުމަށް ރަށުގެ އެހެނިހެން ކުލަބު ޖަމްއިއްޔާތަކާއި ސަރުކާރުގެ ކަމާއި ގުޅުންހުރި އިދާރާތަކުން ދެއްވާ އެއްބާރުލުން ފާހަގަކޮށް އެފަރާތްތަކަށް ޒިދާން ވަނީ ޝުކުރު އަދާކޮށްފައެވެ.

މީގެ އިތުރުން އެމްޖީ ސްޕޯޓްސް ކުލަބުގެ ފަރާތުން ވަނީ މިކޯސް ކާމިޔާބުކަމާއެކު ކުރިއަށް ގެންގޮސް ނިންމާލުމުގައި ކާށިދޫ ކައުންސިލްގެ އިތުރުން އަންހެނުންގެ ތަރައްގީއަށް މަސައްކަތްކުރާ ކޮމެޓީއާއި ޑައިމަންޑްރޫޓްގެ ފަރާތުން ވެދެއްވި އެހީތެރިކަން ފާހަގަކޮށް އެފަރާތްތަކަށް ޚާއްސަ ޝުކުރެއް އަދާކޮށްފައެވެ.