އެމްޑަބްލިއުއެސްސީން ލެބް އިކުއިޕްމެންޓް ކެލެބްރޭޝަންގެ ޚިދުމަތް ތަޢާރަފްކޮށްފި

މާލޭ ވޯޓަރ އެންޑް ސްވަރޭޖް ކަމްޕެނީ (އެމް.ޑަބްލިޔު.އެސް.ސީ)ގެ ލެބޯޓަރީއިން ފޯރުކޮށްދޭ ޚިދުމަތްތައް އިތުރަށް ތަރައްޤީކޮށް ފުޅާކުރުމުގެ ގޮތުން، އައު ޚިދުމަތެއްގެ ގޮތުގައި ލެބް އިކުއިޕްމެންޓް ކެލެބްރޭޝަންގެ ޚިދުމަތް ތަޢާރަފްކޮށްފިއެވެ.

ލެބް އިކުޕްމެންޓް ކެލިބްރޭޝަންއަކީ ފެނުގެ ތަޙުލީލްތައް ކުރުމަށް ބޭނުން ކުރާ ޢާލާތްތަކުގައި އެއްވެސް މައްސަލައެއް ހުރިތޯ ދެނެގަތުމަށް ހަދާ ޓެސްޓްތަކެކެވެ. ލެބް އިކުއިޕްމެންޓް ކެލިބްރޭޓް ޓެސްޓްތައް ހެދުމުގެ ބޭނުމަކީ ފެން ޓެސްޓް ކުރުމަށް ބޭނުންކުރާ އިކުއިޕްމެންޓްތައް މެދުވެރިކޮށް ނަގާ ރިޕޯޓް ތަކުގެ ޔަގީންކަން ކަށަވަރުކުރުމަށާއި، ފެނުގެ ޓެސްޓްތައް ކުރުމުގައި އިކުޕްމެންޓްތައް ހުންނަންވާނެ ކަމަށް ބައިނަލްއަޤްވާމީ ގޮތުން ކަނޑައަޅާފައިވާ މިންގަޑުތަކާއި އެއްގޮތަށް އިކުޕްމެންޓްތައް ބެހެއްޓުމެވެ.

އެމްޑަބްލިއުއެސްސީން ބުނީ، މިޚިދުމަތް ފޯރުކޮށްދިނުމަށް ހަމަޖެހިފައިވަނީ ތަމްރީނާއި ތަޖުރިބާ ލިބިފައިވާ ދިވެހި މުއައްޒަފުން މެދުވެރިކޮށް ކަމަށާ، މިޚިދުމަތް ކަސްޓަމަރުންނަށް ފަސޭހަކަމާއެކު ފޯރުކޮށްދިނުމުގެ ގޮތުން، މި ޙިދުމަތް ފޯރުކޮށްދޭ އިކުއިޕްމެންޓްތަކާއި އަދި ޕެރެމީޓަރސްތަކުގެ ތެރެއިން ކަސްޓަމަރު ބޭނުންވާ ގޮތަށް ޕެކޭޖް ތައްޔާރުކުރެވޭނެ ކަމަށެވެ.

އަދި އެމް.ޑަބްލިޔު.އެސް.ސީއަށް އިކުއިޕްމެންޓް ގެނައުމުން ނުވަތަ ކަސްޓަމަރު އެދިލެއްވުމުން އިކުއިޕްމެންޓް ހުރިތަނައް އެމް.ޑަބްލިޔު.އެސް.ސީގެ މުއައްޒަފުން ގޮސްގެންވެސް މި ޚިދުމަތް ލިބޭނެކަން އެ ކުންފުނިން ވަނީ ފާހަގަކޮށްފަ އެވެ.

އެމް.ޑަބްލިޔު.އެސް.ސީއިން ކެލިބްރޭޝަން ސަރވިސް ފޯރުކޮށްދޭ އިކުއިޕްމެންޓްތައް

- ޕީ.އެޗް މީޓަރ އިން ޕީ.އެޗް ޓެސްޓް

- ކޮންޑަކްޓިވިޓީ މީޓަރ އިން ކޮންޑަކްޓިވިޓީ ޓެސްޓް

- ޓަރބިޑިޓީ މީޓަރ އިން ޓަރބިޑިޓީ ޓެސްޓް

- އޮޓޯކްްލޭވް އިން ޓެމްޕަރޭޗަރ ޓެސްޓް

- އިންކިޔުބޭޓަރ އިން ޓެމްޕަރޭޗަރ ޓެސްޓް

- ރެފްރިޖަރޭޓަރ އިން ޓެމްޕަރޭޗަރ ޓެސްޓް

- ޕިޕެޓެ އިން ޕިޕެޓެ ޓެސްޓް

- ޑިޖިޓަލް/ އިލެކްޓްރޯނިކް ބެލެންސް އިން ޑިޖިޓަލް/ އިލެކްޓްރޯނިކް ބެލެންސް ޓެސްޓް

އެމްޑަބްލިއުއެސްސީން ބުނީ، ލެބް އިކުއިޕްމަންޓް ކަލިބްރޭޝަން ޙިދުމަތަށް އެދިލެއްވުމަށް، އެމް.ޑަބްލިޔު.އެސް.ސީގެ ޝޯރޫމަށް އަށް ޒިޔާރަތްކުރައްވައިގެން ނުވަތަ އެމް.ޑަބްލިޔު.އެސް.ސީގެ ޝޯރޫމްގެ ހޮޓަލްއިން 7960022 އަށް ގުޅުއްވައިގެން ކުރިޔަށްގެންދެވޭނެ ކަމަށެވެ. ނުވަތަ ބޭނުންވާ މައުލޫމާތު [email protected] އަށް ހިއްސާކުރަށްވައިގެން ކުރިޔަށްގެންދެވޭނެ ކަމަށް ބުނެފައިވެއެވެ.

އެމް.ޑަބްލިޔު.އެސް.ސީގެ އަމާޒަކީ ކުންފުނިން ފޯރުކޮށްދޭ ޙިދުމަތްތަށް އިތުރަށް ހަރުދަނާކޮށް ކަސްޓަމަރުން ބޭނުންވާ ޙިދުމަތްތަށް ފަސޭހަކަމާއެކު ފޯރުުކޮށްދިީ ކުރިއެރުވުން ކަމަށްވެސް އެ ކުންފުނިން ބުނެއެވެ.

އެމްޑަބްލިއުއެސްސީ އަކީ މާލެއާއި އަތޮޅުތަކުގެ ބައެއް ރަށްތަކަށް ރައްކާތެރި ފެނާއި ނަރުދަމާގެ ޚިދުމަތް ފޯރުކޮށްދެމުން އަންނަ މައި ކުންފުންޏެވެ. އެ ކުންފުނީގެ ލެބޯޓަރީއަކީ ބައިނަލްއަޤުވަމީ ފެންވަރުގެ ސެޓްފިކެޓް ކަމަށްވާ އައި.އެސް.އޯ 17025:2005 ސެޓިފިކެޓް ލިބިފައިވާ ތަނެކެވެ.

މި ލެބޯޓަރީއިން ދޭ ޚިދުމަތްތަކުގެ ތެރޭގައި ފެނުގެ ރައްކާތެރިކަން ކަށަވަރުކުރުމަށްޓަކައި ހަދަންޖެހޭ ޓެސްޓުތައް ހެދުމާއި، ލެބް އިކުއިޕްމެންޓް ބޭނުންކުރާނެ ގޮތާއި އަދި ސާމްޕަލް ނަގާނެ ގޮތުގެ ޓްރޭނިންގް އަދި ކޮންސަލްޓޭޝަން ދިނުންވެސް ހިމެނެއެވެ. މި ލެބޯޓަރީއިން އަންނަނީ ރިސޯޓްތަކުންނާއި އެހެނިހެން މުއައްސަސާތަކުން ބޭނުންވެގެން ހުށައަޅާ ފެނުގެ އެނަލިސްޓިކަލް ޓެސްޓްތަށް، ޒަމާނީ ވަސީލައްތަކާއި ތަޖުރިބާކާރު މުއައްޒަފުންގެ އެހީގައި ފުރިހަމަކަމާއެކު ނިންމައި ފޯރުކޮށްދެމުންނެވެ.