ސަރުކާރުގެ ދައުރު ނިމުނަސް ޕީޖީގެ މަގާމުން ވަތްކެއް ނުކުރެވޭނެ: ޕީޖީ ޝަމީމް

ރައީސުލްޖުމްހޫރިއްޔާއަކަށް ޕްރޮސިކިއުޓަރ ޖެނެރަލް ވަތްކެއް ނުކުރެވޭނެ ކަމަށާއި، އަދި ސަރުކާރުގެ ދައުރު ނިމުނަސް ޕްރޮސިކިއުޓަރ ޖެނެރަލްގެ ދައުރު ނިމުމަކަށް ނާންނާނެ ކަމަށް ޕްރޮސިކިއުޓަރ ޖެނެރަލް ހުސެއިން ޝަމީމް ވިދާޅުވެއްޖެއެވެ.

ޕީޖީ އޮފީހުގެ ނިއުސް ލެޓަރ "އުންސުރު"ގެ އެންމެ ފަހު އަދަދުގައި އިއްޔެ ޝަމީމް ލިޔުއްވާފައިވާ އާޓިކަލްގައި ވިދާޅުވެފައިވާ ގޮތުގައި 2008 ވަނަ އަހަރު ޤާނޫނުއަސާސީއާއެކު، ޕީޖީ އޮފީހެއްވެސް އުފެދި ބާރުތައް ވަކިވެފައިވާ ޖިނާއީ ޢަދުލުގެ ނިޒާމެއް އުފަންވި ކަމަށެވެ. އެއާއެކު ޖިނާއީ މައްސަލަތަކުގައި ދައުވާކުރުމުގެ ބާރު، ބަންޑާރަ ނައިބުގެ އަތުން ނަގައި، އަލަށް އުފެދުނު ޕްރޮސިކިއުޓަރ ޖެނެރަލާ ޙަވާލުވި ކަމަށްވެސް އޭނާ ވިދާޅުވި އެވެ.

"ޕްރޮސިކިއުޓަރ ޖެނެރަލްގެ އޮފީހަކީ ސަރުކާރުގެ އިދާރާއެއް ނޫނެވެ. ދައުލަތުގެ މިނިވަން މުސްތަޤިއްލު މުއައްސަސާއެކެވެ. މާނައަކީ މި އޮފީހުން ނިންމާ ނިންމުމަކީ އެހެން އެއްވެސް ފަރާތެއްގެ ބާރެއް ނުފޫޒެއް ނެތި ޤާނޫނުތަކާއި ގަވާއިދުތައް ދައްކައިދޭ މަގުން ނިންމާ ނިންމުންތަކެކެވެ." ޝަމީމް ވިދާޅުވެފައި ވެއެވެ.

ރައީސުލްޖުމްހޫރިއްޔާއަކަށް ޕްރޮސިކިއުޓަރ ޖެނެރަލް ވަތްކެއް ނުކުރެވޭނެއެވެ. އަދި ސަރުކާރުގެ ދައުރު ނިމުނަސް ޕްރޮސިކިއުޓަރ ޖެނެރަލްގެ ދައުރު ނިމުމަކަށް ނާންނާނެއެވެ.

ޕީޖީ ޝަމީމް

ޕީޖީ ޝަމީމް އިތުރަށް ވިދާޅުވީ، ރައްޔިތުންގެ ވޯޓާއެކު، ސަރުކާރެއް އެކުލަވާލަނީ ވަކި ގޮތަކަށް ޢަމަލުކުރުމަށް ރައްޔިތުންނަށް ވަޢުދުތަކެއް ވެގެން ކަމަށްވާތީ، އެކަންކަން ދައުލަތުގެ ތެރެއިން ޙާޞިލުކޮށްދިނުމަކީ، ދައުލަތުގެ ހުރިހާ މުއައްސަސާއެއްގެ ޒިންމާއެއް ކަމަށެވެ.

"މިސާލަކަށް، ސަރުކާރުގެ ސިޔާސަތު، ކުޑަކުދިންނަށް ޖިންސީ ގޯނާކުރާ މީހުންނާމެދު ހަރުކަށި އުޞޫލަކުން ޢަމަލުކުރުންކަމަށް އޮއްވާ، ޕްރޮސިކިއުޓަރ ޖެނެރަލްގެ ސިޔާސަތު އެނޫން ގޮތަކަށް ބައްޓަންކުރުމަކީ ހަމަޖެހޭ ގޮތަކަށް ނުވާނެއެވެ. ޕްރޮސިކިއުޓަރ ޖެނެރަލްގެ މަސައްކަތްތައް ބައްޓަންކުރަންޖެހޭ ޢާންމު ސިޔާސަތުތައް ބަންޑާރަނާއިބު ކަނޑައެޅިނަމަވެސް، އެ ސިޔާސަތު ޤާނޫނަކާ ޚިލާފުވާނަމަ ޕްރޮސިކިއުޓަރ ޖެނެރަލް ޢަމަލުކުރަންޖެހޭނީ ޤާނޫނަށެވެ." ޝަމީމް ވިދާޅުވި އެވެ.

ޝަމީމް މިހެން ވިދާޅުވެފައި ވާއިރު، މި ސަރުކާރަށް މި ސަރުކާރުގެ މަގާމު ތަކުގައި ތިބި ބޭފުޅުންގެ ތެރެއިން އެންމެ ގިނަ ފަރާތްތަކުގެ ނުރުހުން އަމާޒުވެފައިވާ އެއް ފަރާތަކީ ޕްރޮސިކިއުޓަރ ޖެނެރަލް ހުސެއިން ޝަމީމެވެ. ޕްރޮސިކިއުޓަރ ޖެނެރަލްގެ މަގާމަށް، ޝަމީމު އައްޔަން ކުރައްވާފައިވަނީ ރައީސް އިބްރާހީމް މުހައްމަދު ސާލިހުގެ ވެރިކަމުގެ ދެވަނަ އަހަރުގެ ތެރޭގައެވެ. އެއީ، 2019 ވަނަ އަހަރުގެ ޑިސެމްބަރު މަހުއެވެ.