ރޭޕްގެ ހާދިސާގައި ބައިވެރިވި މުވައްޒިފަކު ހުރިނަމަ އެންމެ ހަރުކަށި ފިޔަވަޅު އަޅާނެ ކަމަށް ވެމްކޯއިން ބުނެފި
ޖިނާއީ ކުށެއް މަދަނީ މިންގަނޑުން ސާބިތުވާވަރަށް ހެކި ހުރެ އެފަދަ މައްސަލައެއް ތަހުގީގީ އިދާރާއަކުން ސާބިތުވާ ކަމަށް ކަނޑައަޅައިފިނަމަ ވެމްކޯގެ ގަވާއިދާ އެއްގޮތަށް އެ ކުންފުނީގެ ކޮންމެ މުވައްޒިފަކާމެދުވެސް އެޅެން އޮތް އެންމެ ހަރުކަށި ފިޔަވަޅު އަޅާނެ ކަމަށް ބުނެފި އެވެ.
ވެމްކޯއިން މިހެން ވިދާޅުވީ ގދ. ތިނަދޫ ސިޓީގައި ހިނގާދިޔަ ރޭޕްގެ ހާދިސާއާ ގުޅިގެން އެކި ފަރާތްތަކުން އެ ކޯޕަރޭޝަނަށް ރައްދުވާ ގޮތަށް ފަތުރަމުންދާ ވާހަަކަތަކާއި ގުޅިގެންނެވެ. ވެމްކޯ އިން ބުނީ މަސައްކަތުގެ މާހައުލާއި އެ މާހައުލުން ބޭރުގައިވެސް އެ ކޯޕަރޭޝަންގެ މުވައްޒިފުންގެ އަހްލާގީ މިންގަނޑު ރިވެތި ގޮތުގައި ހިފެހެއްޓުމަކީ ކުންފުނީގެ ޕޮލިސީގެ އެންމެ އަސާސީ މަގްސަދު ކަމަށެވެ. މި ޕޮލިސީ ފަރުމާ ކުރެވިފައިވަނީ މިފަދަ ރިވެތި އަހްލާގީ މިންގަނޑުން ބޭރުވެ ނޭއްގާނީ އެެކިއެކި ކުށްތައް ކުރާ މީހުންނަށް އެންމެ ހަރުކަށި ފިޔަވަޅުތައް އެޅި އެކަންކަން ތަކުރާރު ނުވާނެ ގޮތަކަށް ކަމަށެވެ.
އެހެން ކަމުން ޖިނާއީ ކުށެއް މަދަނީ މިންގަނޑުން ސާބިތުވާވަރަށް ހެކި ހުރެ އެފަދަ މައްސަލައެއް ތަހުގީގީ އިދާރާއަކުން ސާބިތުވާ ކަމަށް ކަނޑައަޅައިފިނަމަ ވެމްކޯގެ ގަވާއިދާ އެއްގޮތަށް އެ ކުންފުނީގެ ކޮންމެ މުވައްޒިފަކާމެދުވެސް އެޅެން އޮތް އެންމެ ހަރުކަށި ފިޔަވަޅު އަޅާނެ ކަމަށް ވަނީ ބުނެފަ އެވެ.
އަދި ތިނަދޫގައި ހިނގި ބަދުއަހްލާގީ އަމަލު އެންމެ ހަރުކަށި އިބާރާތުން ކުށްވެރިކޮށް އެފަދަ އަމަލުތައް ބަލައިނުގަންނާނެ ކަމަށް ވަނީ ބުނެފަ އެވެ.
ވެމްކޯ އިން މިފަދަ ބަޔާނެއް ނެރުނީ ރޭޕްގެ އެ އަަމަލުގައި އެ ކުންފުނީގެ އިސް މުވައްޒިފެއް ހިމެނޭ ކަމަށް ވާހަކަ ދެކެވެމުން ދަނިކޮށެވެ. އެ މުވައްޒިފު މިހާރު ވަނީ ފުލުހުންގެ ބެލުމުގެ ދަށުގަ އެވެ. ރޭޕްގެ ހާދިސާއާ ގުޅިގެން ނުވަ މީހަކު ވަނީ ހައްޔަރުކޮށްފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
