ގަރާރަށް ބަހުސް ކުރުމުގެ ކުރިން ވޯޓަށް އަހާ އިސްލާހް ފާސްކޮށްފި
ރައްޔިތުންގެ މަޖިލީހަށް ހުށަހަޅާ ގަރާރަށް ބަހުސް ކުރުުމުގެ ކުރިން އެ ގަރާރެއް މަޖިލީހަށް ބަލައިގަތުމަށް ވޯޓަށް އަހަންޖެހޭ ގޮތަށް މަޖިލީހުގެ ގަވައިދު ބަދަލު ކުރަން ހުށަހެޅި އިސްލާހް ފާސްކޮށްފިއެވެ.
މަޖިލީހުގެ ގަވައިދުގެ 191 ވަނަ މާއްދާ އިސްލާހު ކުރަން ހުށަހެޅުއްވީ، އަމިއްލަ މެންބަރު، ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު އަބްދުލް ހަންނާނު އަބޫބަކުރެވެ.
މަޖިލީހުގެ މިއަދުގެ ޖަލްސާގައި އެ އިސްލާހް ފާސްވީ ވޯޓުދިން 56 މެންބަރުންގެ އަޣުލަބިއްޔަތުންނެވެ. އިސްލާޙާ ދެކޮޅަށް ވޯޓް ދެއްވީ 11 މެންބަރުންނެވެ.
ގަވާއިދަށް ގެންނަން ހުށަހަޅާފައިވާ އިސްލާހުގައި ވަނީ، މަޖިލީހަށް ގަރާރު ބަލައިގަންނަން ވޯޓަށް އަހާނީ ގަރާރުގެ އިބްތިދާއީ ބަހުސް ފެށުމުގެ ކުރިން ކަމަށެވެ. ގަރާރު މަޖިލީހަށް ބަލައި ނުގެންފިނަމަ އިތުރު ބަހުސެއް ނޯންނާނެ ކަމަށާއި، ގަރާރު ބާތިލުވީ ކަމަށްވެސް އިސްލާހުގައި ބުނެފައިވެ އެވެ.
މަޖިލީހުގައި މިހާރު އަމަލުކުރަމުންދާ ގަވާއިދު އޮންނަ ގޮތުން، ގަރާރެއް ބަލައިގަތުމާމެދު ވޯޓު ނަގަނީ އެ ގަރާރަކަށް މެންބަރުން ބަހުސްކުރެއްވުމަށްފަހު އެވެ. މަޖިލީހަށް ގަރާރު ހުށަހެޅުމުގެ ފުރުސަތު ކޮންމެ މެންބަރަކަށް ވެސް ދީފައި އޮންނަނީ ތަފާތު އެކި މައްސަލަތައް މެންބަރުންގެ ސަމާލުކަމަށް ގެނައުމުގެ ގޮތުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
