މަމްދޫހުގެ މޮޅު ކުޅުމާއެކު، އެފްސީ ހެސަ ވާދަ އިން ޔޯ ބުރު އެފްސީ ކޮޅަށް 10 ލަނޑުޖަހައިފި!

އިނގުރައިދޫ ކައުންސިލް ފުޓްސަލް ފިއެސްޓާގައި ރޭ ކުޅެވުނު ދެވަނަ މެޗުގައި އެފްސީ ހެސަ ވާދަ އިން ޔޯ ބުރު އެފްސީ ކޮޅަށް 10 ލަނޑުޖަހައިފި އެވެ.

މި މުބާރާތައް ވަރުގަދަ ޓީމަކާއި އެކު ނުކުތް ހެސަ ވާދައިން ފުރަތަަމަ ހާފުގައި ތިން ލަނޑު ކާމިޔާބުކުރިއިރު ދެވަނަ ހާފުގައި އެޓީމުން އިތުރު 7 ލަނޑު ކާމިޔާބުކުރި އެވެ. މި މެޗުގައި ހެސަ ވާދައިގެ މުހައްމަދު މަމްދޫހު ހަތަރު ލަނޑު ކާމިޔާބު ކުރި އިރު މަމްދޫހު އަކީ ނިމިދިޔަ ގޯލްޑަން ފުޓްސަލް ޗެލެންޖްގައި އިނގުރައިދޫ ޓީމު ހޯދި ކާމިޔާބީގައި މުހިންމު ދައުރެއް އަދާކޮށްދިން ކުޅުންތެރިއެކެވެ.

މީގެއިތުރުން އެޓީމުގެ ހުސެއިން އިރުފާހް މި މެޗުގައި ދެ ލަނޑު ކާމިޔާބު ކުރި އިރު، އަބްދުﷲ ނަބީހް، ހަސަން މާއިލް، ހުސެއިން މާއިސް އިތުރުން އަޙްމަދު ބަޝްޝާމް މިއިން ކޮންމެ ކުޅުންތެރިއެއް މި މެޗުގައި ވަނީ އެއް ލަނޑު ޖަހާފައެވެ.

މި މެޗުގެ މޭން އޮފް ދަ މެޗަކަށް ހޮވުނީ އެފްސީ ހެސަ ވާދައަށް މި މެޗުގައި ހަތަރު ލަނޑު ކާމިޔާބުކޮށްދިން މުހައްމަދު މަމްދޫހު އެވެ.

މި މެޗުން ލިބުނު ތިން ޕޮއިންޓާއެކު އެކު އެފްސީ ހެސަ ވާދައަށް ވަނީ ގްރޫޕް އޭގެ އެއްވަނަ ލިބިފައެވެ. މި ގުރޫޕްގެ ދެވަނައިގައި މިވަގުތު އޮތީ ފުރަތަަމަ މެޗުގައި ލަނޑާ އަތުން 7-1 ގެ ނަތީޖާއަކުން މޮޅުވި ސްޓްރީޓް ބްރަދާސް އެވެ. މި ދެޓީމަށް ވެސް ތިން ޕޮއިންޓް ލިބިފައިވާއިރު އެފްސީ ހެސަ ވާދައަށް އެއްވަނަ ލިބެނީ ފައިދާ ގޯލުގެ ތަފާތުންނެވެ.

މިރޭ ވެސް މި މުބާރާތުގެ ދެ މެޗު ކުޅުމަށް ވަނީ ހަމަޖެހިފައެވެ. 21:30 ގައި ފަށާ ފުރަތަަމަ މެޗުގައި ބައްދަލުކުރާނީ ގްރޫޕް އޭގެ ސްޓްރީޓް ބްރަދާސް އާއި އެފްސީ ހެސަ ވާދައެވެ. އަދި 22:30 ގައި ފަށާ ދެވަަނަ މެޗުގައި ބައްދަލުކުރާނީ ގްރޫޕް ބީގެ ހަލަފް އެފްސީ އާއި ދަ ސްކޯޕިއަން އެވެ.