ހެޔޮ ޢަމަލުތައް ނުބައި އަމަލުތަކަށް ބަދަލުކޮށްލާ އެންމެ ވަރުގަދަ ބާރަކީ ކަންދެއްކުން: ޚުތުބާ

އިސްލާމްދީނުގައި ކަންދެއްކުމަކީ ޝިރުކުގެ ޢަމަލެއް ކަމަށާ، އަހަރުމެންގެ ރަނގަޅު އަމަލުތައް ނުބައި އަމަލުތަކަށް ބަދަލުކޮށްލާ އެންމެ ވަރުގަދަ ބާރަކީ ކަންދެއްކުން ކަމަށް މިއަދުގެ ހުކުރު ހުތުބާގައި ބުނެފިއެވެ.

“އަމަލުތަކުގައި އިހުލާސްތެރިވުން” މައުޟޫއަށް މިއަދު އިއްވާފައިވާ ޚުތުބާގައި ބުނީ، އަމަލުތައް ގަބޫލުކުރައްވަނީ މާތް الله ގެ ވަޖުހުފުޅަށްޓަކައި ކުރެވޭ ކަމަކަށް ވާނަމަ ކަމަށެވެ. އެއީ الله ގެ ހަޟްރަތުން ދަރުމައަށް އެދި، އެއްވެސް ކަންދެއްކުމެއް ނެތި، އިހްލާސްތެރިކަމާއެކު އެކަމެއް ކޮށްގެންނެވެ.

އަދި އަމިއްލަ އެދުންތައް ބޮޑުވެ ތާރީފުކުރުމަށް ލޯބިކުރެވުނު ވަރަކަށް އިހުލާސްތެރިކަމުގެ ބައްތި ކަނިވަމުންދާނެ ކަމަށާއި ފަހުރުވެރިވުމަށާއި މަޝްހޫރު ވުމަށް ލޯބިކުރެވުނު ވަރަކަށް އިހުލާސްތެރިކަން ފަނޑުވަމުންދާނެ ކަމަށް ހުތުބާގައި ބުނެފައިވެއެވެ.

"ކުރާ އަމަލާއި މަސައްކަތުގައި، އިހްލާސްތެރިކަމެއް ނެތި، ބޭރުފުށުން އެއީ ރަނގަޅު އަމަލުތަކެއް ކަމުގައި ފެނުނަސް، އެވާނީ ފާސިދު އަމަލުތަކަކަށެވެ. އިހްލާސްތެރިކަމެއް ނެތި، ދެއްކުމަށް ކުރެވޭ ނަމާދަކީ އެއިން އަޛާބު ލިބެނިވި އަމަލެކެވެ،" ހުތުބާގައި ބުނެފައިވެ އެވެ.

މިއާއެކު ޚުތުބާގައި ބުނީ، މާތް الله ގެ ޘަވާބާއި، ރުހިވޮޑިގަތުމަކީ ބޭރުފުށުގެ އަމަލަކުތަކުން ހާސިލުކުރެވޭނެ ކަންކަމެއް ނޫން ކަމަށާ އެކަލާނގެ ބައްލަވައި ވޮޑިގެންވަނީ މީސްތަކުންގެ ހިތްކަށާއި އަމަލުތަކުގެ އިހްލާސްތެރިކަމަށް ކަމަށެވެ. އަދި އިޚްލާސްތެރި ކަމެއްނެތި ކަންދެއްކުމަށް ޢަމަލު ކުރުމަކީ ޝިރުކުގެ ބާވަތެއް ކަމަށްވެސް ބުނެފައިވެއެވެ.

"އިސްލާމްދީން ދެކޭ ގޮތުގައި ކަންދެއްކުމަކީ ޝިރްކުގެ ބާވަތެކެވެ. އަހަރެމެންގެ ރަނގަޅު އަމަލުތައް ނުބައި އަމަލުތަކަށް ބަދަލުކޮށްލާ އެންމެ ވަރުގަދަ ބާރަކީ ކަންދެއްކުމެވެ،" ހުތުބާގައި ބުނެފައިވެ އެވެ.

ހުތުބާގައި ބުނީ، އިސްލާމްދީން މުދައްރިސުންނަށާއި ކިޔަވައި ކުދިންނަށް ގޮވާލަނީ އިލްމް އުނގެނުމާއި އުނގަންނައި ދިނުމުގައި އާއްމު މަސްލަހަތު ކުރިއަށް ނެރުމަށް ކަމަށެވެ. އަދި ބޮޑާކަމާއި މޮޅުކަން ދެއްކުމަށްޓަކައި އިލްމް އުނގެނުމަކީވެސް އިސްލާމްދީނުގައި މަނާކުރައްވާފައިވާ ކަމެއް ކަމަށްވެސް ބުނެފައިވެއެވެ.