ރާއްޖެ އެތެރެކުރަން އުޅުނު 5 މިލިއަނަށްވުރެ ގިނަ ރުފިޔާގެ މަސްތުވާތަކެތި އަތުލައިގެންފި

ރާއްޖެ އެތެރެކުރަން އުޅުނު 4 ކިލޯ އަށްވުރެ ގިނަ މަސްތުވާތަކެތި ކަސްޓަމްސް އިން އަތުލައިގެންފިއެވެ.

ކަސްޓަމްސް އިން ބުނެފައިވަނީ މި މަހުގެ 18 ވަނަ ދުވަހު ދުބާއީ އިން ރާއްޖެ އައިސްފައިވާ އެއާރކާގޯ ޝިޕްމަންޓެއްގައި މަސްތުވާތަކެތި ފޮރުވާފައި ހުރިކަމަށް ކަސްޓަމްސްއަށް ޝައްކުކުރެވިގެން، ކަސްޓަމްސް އިން އެ ޝިޕްމަންޓް އިތުރަށް ބަލާފާސްކޮށްފައިވާ ކަމަށެވެ.

އަދި ބަލާފާސް ކުރި ޝިޕްމަންޓުގެ ތެރޭގައި ޖުމްލަ ހަތް ޕެކޭޖު ހިމެނޭއިރު، އޭގެ ތެރެއިން ދެ ޕެކޭޖުގައި ހުރި މުދަލުގެ ތެރެއިން މަސްތުވާތަކެތި ކަމަށް ޝައްކުކުރެވޭ ކުނޑިތަކެއް ފެނިފައިވާ ކަމަށް ކަސްޓަމްސްއިން ބުނެއެވެ.

މީގެ އިތުރުން ފުރަތަމަ މަރުހަލާގައި ކަސްޓަމްސް އިން މި ތަކެތި ތަޙުލީލުކުރި އިރު، މަސްތުވާތަކެތީގެ ބާވަތެއް ކަމަށްވާ ހެރޮއިން އަށް ފައްސިވެފައިވާ ކަމަށާއި އަދި މިތަކެތީގެ ބަރުދަނުގައި ޖުމްލަ 4.030 ކިލޯ ހުރިކަމަށް ކަސްޓަމްސްއިން ބުނެފައިވެއެވެ.

މީގެއިތުރުން މިތަކެތީގެ މަގުމަތީގެ އަގު 5،024،410.00 އަށް އަރާނެ ކަމަށާއި އިތުރަށް ތަހްޤީޤަށް އެތަކެތި ފުލުހުންނާއި ހަވާލު ކުރެވިފައިވާ ކަމަށްވެސް ފުލުހުން ބުނެފައިވެއެވެ.