ހުޅަނގު އައްސޭރީގެ ގެތަކަށް އިޒްރާއިލުން ގެއްލުންދެނީ

ފަލަސްޠީނުގެ ޣައްޒާއަށް ހުއްޓުމެއްނެތި ވަަރުގަދަ ހަމަލާތައް އިޒްރާއިލުން ދެމުންދާއިރު، ހުޅަނގު އައްސޭރީގެ އަވަށްތަކުގެ ގެތަކަށް އިޒްރާއިލްގެ ޔަހޫދީން ބުލް ޑޯޒަރުތަކުން ގެއްލުން ދެމުން އެބަގެންދެއެވެ.

އެގޮތުން ރޭ އިޒްރާއިލުން ވަނީ ހުޅަނގުއައްސޭރީގެ ނާބުލުސްގައި އޮންނަ ޒަވްތާ އަވަށަށް އެބައިމީހުންގެ މިލިޓަރީ ޖީޕް ތަކާއި އެކު ވަދެގަނެފައެވެ. އެއަވަށަށް ވަދެ އެއަވަށުގެ ގެތަކަށް ވަނީ ގެެއްލުންދީފައެވެ.

މީގެ އިތުރުން ރާމައްﷲއަށް ވަދެ އަލް ޖަލާޒޫން ރެފިޔުޖީ ކޭމްޕަށް ބުލްޑޯޒަރުތަކާއި އެކު ވަދެގަނެ އެކޭމްޕަށް ވަނީ ބޮޑެތި ގެއްލުންތަކެއް ދީ އެތަން ވަނީ ފުނޑު ފުނޑު ކޮށްލައިފައެވެ.

އަލް ޖަޒާލޫން ރެފިޔުޖީ ކޭމްގައި ހުންނަ ހަމާސްގެ އެކްޓިވިސްޓް އަދި އިޒްރާއިލްގެ ޖަލުގައި ހުރި ބައެޖޭސް ނަޙާލާގެ ގެއަށް ބޮޑެތި ގެއްލުންތަކެއްދީ އެގެ ވަނީ ބޭނުންނުކުރެެވޭ ވަރަށް ހަލާކު ކޮށްލައިފައެވެ.

ހުޅަނގު އައްސޭރީގެ ތެރެއަށް ވަދެ ގަނެ އިޒްރާއިލުން ބޮޑެތި ގެއްލުން ތަކެއް ދީފައިވާއިރުވެސް ރޭ ހުޅަނގު އައްސޭރީގެ އެކި ސަރަހައްދުތަކުގެ ރައްޔިތުން ވަނީ ޣައްޒާގައި އިޒްރާއިލުން ރޭ ދިން ހަމަލާތަކާއި ގުޅިގެން ޣައްޒާގެ ރައްޔިތިުންނާއި އެކު ތިބި ކަން ދައްކުވައިދިނުމުގެ ގޮތިުން މަގުތަކަށް ނުކުމެފައެވެ.

އެގޮތުން ނާބުލްސް، ތުލްކަރަމް، ޖެނީން އަދި ތުއްބާސްގައި ގިނަ ބަޔަކު ފަތިސް ނަމާދުގެ ޖަމާޢަތް ހަދައިފައިވަނީ މަގުމަތީގައެވެ.