އާންމުންނާއި ބައްދަލުކުރެވޭގޮތަށް ރައީސް ޔާމީން ރަށު ބަންދަށް ބަދަލުކޮށްފި
އާންމު ޖަލްސާތަކުގައި ބައިވެރިވެވޭގޮތަށް ވާދަވެރި ސިޔާސީ ލީޑަރު ރައީސް ޔާމީން އަބްދުލްގައްޔޫމުގެ ހުކުމް ރަށު ބަންދަށް ބަދަލުކޮށްފި އެވެ.
މި ލުއި އެމަނިކުފާނަށް ދެއްވާފައިވަނީ މީގެ 15 ވަރަކަށް ދުވަސްކުރިން ރައީސް ޔާމީން އަމިއްލަފުޅަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި ވާހަކަފުޅުދައްކަވާ ކުރެއްވި އިލްތިމާސްތަކަށް ފަހުގައިކަމަށް ވަނީ މައުލޫމާތު ލިބިފައެވެ.
މި ލުޔަކާއި އެކު ރައީސް ޔާމިނަށް މާލެ ސަރަހައްދުގައި ހިމެނޭ މާލެ ވިލިމާލެ އަދި ހުޅުމާލެއަށް އެމަނިކުފާނަށް ވަޑައިގެންނެވޭނެ އެވެ. އަދި އާންމު ރައްޔިތުންނާއި ބައްދަލުކުރުމުގެ އިތުރުން ޖަލްސާތަކުގައި ބައިވެރިވުމުގެ ފުރުސަތުވެސް ލިބިގެންދާނެ ކަމަށް ވަނީ މައުތަބަރުކޮށް މައުލޫމާތު ލިބިފައެވެ.
ރައީސް ޔާމީން މިވަގުތު ގެންދަވަނީ އާރަށު މުއާމަލާތާއި ގުޅުވާ ދައުލަތުން އެމަނިކުފާނުގެ މައްޗަށް ކޮށްފައިވާ ޖަލުހުމުން ގެކޮޅުގައި ހުންނަވާ ތަންފީޒު ކުރައްވަމުން ނެވެ.
އެމަނިކުފާނުގެ ފަރާތްޕުޅުން އެ މައްސަަލަ ރާއްޖޭގެ ހައިކޯޓުގައި އިސްތިއުނާފުކޮށްފައި އޮތް ނަމަވެސް، މައްސަލައިގެ އަޑުއެހުންތައް ނިމުމަކާއި ހަމަޔަށް ގޮސްފައިވަނިކޮށް ވަނީ މަޑުޖެހިފައެވެ.
މިފަހުން އެ މައްސަލަ މަޑުޖެހިފައިވަނީ ރައީސް ޔާމިނުގެ އިސްތިއުނާފު މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވާ ދެބޭފުޅުން ޗުއްޓީއަށް ވަޑައިގަތުމާއި ގުޅިގެންނެވެ.
އެ މައްސަލައިގެ އަޑުއެހުމެއް އޮންނާނެ ދުވަހެއް ހައިކޯޓުން ހާމަކޮށްފައި ނުވާއިރު، އެ މައްސަލަ އަވަސްކުރުމަށް ސަޕޯޓަރުން ކެނޑިނޭޅި ގޮވާލަމުންދާ ކަން ފާހަގަކޮށްލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
