އަންނަ އަހަރު ބާއްވާ އަންހެނުންގެ ވޯލްޑްކަޕްގައި ފަލަސްތީނުގެ ރެފްރީއަކަށް ފުރުސަތު ދެނީ

ވިމެންސް ވޯލްޑް ކަޕުގައި ފަލަސްޠީނުގެ ރެފްރީއަކަށް ރެފްރީންގެ ޓީމުން ޖާގަ ދިނުމަށް ފީފާއިން ނިންމައިފިއެވެ.

އަންނަ އަހަރު ބާއްވާ އަންހެނުންގެ ވޯލްކަޕުގައި ރެފްރީކަން ކުރަން ފުރުސަތުދޭން ނިންމާފައި ވަނީ ހިބާ ސާދިޔާ އަށެވެ. އެއާއެކު ހިބާ ވެގެންދާނީ ވޯލްޑް ކަޕެއްގައި ރެފްރީކަން ކުރާ ފުރަތަމަ ފަލަސްޠީނުގެ ރެފްރީއަށެވެ.

ވޯލްޑްކަޕްގައި އެސިސްޓެންޓް ރެފްރީއެއްގެ ގޮތުގައި ހަރަކާތްތެރި ވެފައިވާ ހިބާ، މި އަހަރު އޮތް މޮރިސް ރެވެލޯ މުބާރާތުގައި ރެފްރީއެއްގެ ގޮރުގައި ހަރަކާތްތެރި ވެފައިވެއެވެ. އެއީ އޭނާ ބައިނަލްއަގްވާމީ މުބާރާތްތެއްގައި ރެފްރީކަން ކުރި ފުރަތަމަ ފަހަރެވެ.

މީގެ އިތުރުން، އިންޑިއާގައި ބޭއްވި އޭޝިއަން ވިމެންސް ކަޕުގައްޔާއި އޭއެފްސީ ކަޕުގައި ވެސް ހިބާ ވަނީ ރެފްރީކަން ކޮށްފައެވެ.

އަންނަ އަހަރު ބާއްވާ އަންހެނުންގެ ވޯލްޑްކަޕް އޮންނާނީ، ޖުލައި 20 ވަނަ ދުވަހުން ފެށިގެން އޯގަސްޓް 20 ވަނަ ދުވަހުގެ ނިޔަލަށް، އޮސްޓްރޭލިޔާއާއި ނިއުޒިލޭންޑްގައެވެ.

ޖުމުލަ 32 ޓީމު ކުޅުމަށް ހަމަޖެހިފައިވާ މި ވޯލްޑްކަޕުގައި މީގެ ކުރިން މިހާ ގިނަ ޓީމުތަކުން ކުޅިފައެއް ނުވެއެވެ.