މިހާރުގެ ރަނިންމޭޓާއެކު ރައީސް ޞާލިހަށް 11:00 ގެ ކުރިން ސަރުކާރެއް ނުފެށޭނެ: ޝިޔާމު

މިއަހަރުގެ ރިޔާސީ އިންތިޚާބު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ކާމިޔާބު ވިޔަސް، މިފަހަރު އައްޔަންކުރައްވާފައި އެ ހުންނެވި ރަނިންމޭޓާއި އެކު އަވަހަށް އޮފީސް ހުޅުވާ ސަރުކާރުގެ ހިންގުމުގެ މަސައްކަތްޕުޅުތައް ކުރިއަށް ނުގެންދެވޭނެ ކަމަށް ޕީޕީއެމްގެ ނައިބު ރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެ އެވެ.

ރައީސް ޞާލިހު މިފަހަރު ރަނިން މޭޓެއްގެ ގޮތުގައި ކަނޑައަޅުއްވާފައި ވަނީ އެމްޑީޕީގެ ޕާލަމެންޓްރީ ގުރޫޕުގެ ލީޑަރު މުހައްމަދު އަސްލަމްއެވެ.

ޝިޔާމު ވިދާޅުވި ގޮތުގައި އަސްލަމަކީ ގަޑިއަށް ފަރުވާކުޑަ ބޭފުޅެކެވެ. އެގޮތުން ރައްޔިތުންގެ މަޖިލީހުގެ ކޮމެޓީތަކުގެ މަސައްކަތްޕުޅުތައް ވެސް އަސްލަމް ހެނދުނު ވަޑައިނުގަންނަވާތީ ފަސްކުރަން ޖެހޭކަމަށް ޝިޔާމު ވިދާޅުވި އެވެ. އަދި އޭނާ ވިދާޅުވީ އަސްލަމާއިއެކު ސަރުކާރު ހިންގަން ފެށޭނީ ހެނދުގެ ދަންފަޅި ނިމޭ ފަހުން ކަމަށެވެ.

ވެރިކަމަށް ވަޑައިގެންނެވުނު ނަމަވެސް އެފަދަ ބޭފުޅަކާއެކު ސަރުކާރު ބާރު ދުވެލީގައި ހިންގެވުމަކީ ރައީސް ޞާލިހަށް ކުރެއްވޭނެ ކަމެއް ނޫން ކަމަށް ޝިޔާމު ވިދާޅުވި އެވެ.

"މިހާރު އެ ހުންނެވި ރަނިންމޭޓާއި އެކީގައި ސަރުކާރެއް ނުފެށޭނެ 11:00 ޖެހުމުގެ ކުރިންނެއް. އެއީ ރައްޔިތުންގެ މަޖިލީހުގައި ވެސް ކަން ހިނގާ ގޮތް. އެމްޑީޕީގެ ޕާލަމެންޓްރީ ގުރޫޕުގެ ލީޑަރު ވަޑައިގަންނަވަންދެން މަޖިލީހުގެ ހުރިހާ ކޮމެޓީތަކެއް އެމަނިކުފާނު ބައިވެރިވެވަޑައިގަންނަވާ ހުރިހާ ކޮމެޓީތަކެއް އޮންނަނީ ހުއްޓިފައި، އެހެންވީމަ އަޅުގަނޑަށް ފެންނަނީ މި ސަރުކާރު ރަނިންމޭޓާއި އެކީގައި ހުއްޓިފައި އޮންނާނެ ސަރުކާރެއް"

ޕީޕީއެމްގެ ނައިބު ރައީސް ޝިޔާމު

ޝިޔާމު ވިދާޅުވީ ހެނދުނާއި މަސައްކަތް ނުފެށި ހުއްޓިފައި އޮންނާނެ ސަރުކާރެއް ގެންނަން ޔަގީނުން ވެސް ދިވެހި ރައްޔިތުން ބޭނުން ނުވާނެ ކަމަށެވެ.

މިހާރު ވެސް މި ސަރުކާރު ދަމަހައްޓަން ބޭނުންވާ އެއްވެސް ސިޔާސީ ޕާޓީއެއް ނެތް ކަމަށާއި، ޚުދު ސަރުކާރު ހިންގާ މައި ޕާޓީ އެމްޑީޕީގެ އާންމު މެމްބަރުން ވެސް ބޭނުންވަނީ މި ސަރުކާރު ބަދަލުކުރުމަށް ކަމަށް ޝިޔާމު ވިދާޅުވި އެވެ.

އެ ވާހަކައާއި ގުޅުވާ ޝިޔާމު ވިދާޅުވީ މި ރިޔާސީ އިންތިޚާބުގައި ވާދަކުރައްވާ ބޭބޭފުޅުންނަށް ބަލާއިރު ރައްޔިތުން ބޭނުންވާ ސްޕީޑުގައި ތަރައްގީގެ މަޝްރޫއުތައް ކުރިއަށް ގެންގޮސްދެވޭނެ ގާބިލުކަން ހުރި ހަމައެކަނި ކެންޑިޑޭޓަކީ ޑރ މުއިއްޒު ކަމަށެވެ. އެމަނިކުފާނަކީ ރައީސް ޔާމީނުގެ ތަރައްގީގެ ޔުނިވާސިޓީއިން ތައުލީމު ހާސިލުކޮށް، އެ ތަޖުރިބާ ހޯއްދަވައިގެން ހުންނެވި ބޭފުޅަކަށްވުމުން ރައްޔިތުން އިޚްތިޔާރު ކުރައްވަންވީ ކެންޑިޑޭޓު ސާފުކަމަށް އޭނާ ވިދާޅުވި އެވެ.

އެއާއެކު ޝިޔާމުގެ ވާހަކައިގައި ވަނީ ޕްރޮގްރެސިވް ކޮންގްރެސް ކޯލިޝަންގެ ވެރިކަމެއް އުފެއްދުމަށް ސެޕްޓެމްބަރު މަހުގެ 9 ގައި ޑރ މުއިއްޒަށް ވޯޓުލައްވާ، ވޯޓު ފޮށިތައް ފުރާލުމަށް ގޮވާލައްވާފަ އެވެ. އަދި ވިދާޅުވީ އެ ކޯލިޝަންގެ ވެރިކަމެއްގައި ރައްޔިތުންނަށް ތަރައްގީ ޔަގީންވާނެކަމާއި މެދު ޝައްކު ނުކުރެއްވުމަށް ވެސް އެދިވަޑައިގަންނަވާ ކަމަށެވެ.