ރައީސް ޞާލިޙް ހުންނެވީ ތަރައްޤީގެ މަޝްރޫޢުތައް ހިންގެވުމުގައި ބޮޑުތަނުން ކުރީގަ: އިޔާދް

ރައީސް އިބްރާހިމް މުޙައްމަދު ޞާލިޙް ހުންނެވީ ތަރައްޤީގެ މަޝްރޫޢުތައް ހިންގެވުމުގައި ބޮޑުތަނުން ކުރީގައި ކަމަށް އިކޮނޮމިކް މިނިސްޓްރީގެ ސްޓޭޓު މިނިސްޓަރު އަދި ޢަދާލަތު ޕާޓީގެ ނައިބު ރައީސް މުހައްމަދު އިޔާދް ވިދާޅުވެއްޖެ އެވެ.

އިޔާދް މިހެން ވިދާޅުވީ ރޭ ލ ގަމުގައި ބޭއްވުނު ރައީސް ޞާލިޙްގެ ރިޔާސީ ކެމްޕޭނުގެ ޖަލްސާގައި ވާހަކަދައްކަވަމުންނެވެ.

"ނިމިދިޔަ ސަރުކާރާއި އަޅާބަލާއިރުގަ މިސަރުކާރުން މަގުހެދުމުގެ މަޝްރޫޢުތައް ދެގުނަ އިތުރަށް ކުރިއަށްގެނަދަމުން މިގެންދަނީ، ބިން ހިއްކުމުގެ މަޝަރޫޢުތައް ދެގުނައަށްވުރެ އިތުރަށް ކުރިއަށް ގެންދަމުން އެގެންދަނީ، އެސްއެމްއީ ލޯނު ހަތްގުނަ އިތުރަށް މިސްރުކާރުން ދޫކޮށްފި، ދިހަ ގުނަ އިތުރަށް ކްލާސްރޫމްތައް އަޅައިފި، އާދެ މިގޮތައް އަޅުގަނޑަށް ވަރަށް ދިގުލިސްޓެއް ދަންނަވާލެވިދާނެ، ތަރައްޤީގެ މަޝްރޫޢޫތައް ހިންގުމުގައި ބޮޑުތަނުން ކުރީގައި ރައީސް ޞާލިޙް ހުންނެވީ" އިޔާދުގެ ވާހަކައިގައި ވިދާޅުވިއެވެ.

އިޔާދް ވިދާޅުވީ ދިވެހިން މިއަދު ބޭނުންވަނީ ކަންކަން ކުރަން ކެރޭ ކަންކަން ކުރަން ދަންނަ ނަތީޖާ ނެރެދެއްވާ ލީޑަރެއް ކަމަށެވެ. އަދި އެބޭފުޅަކީ ރައީސް ޞާލިޙް ކަމަށް އިޔާދްވިދާޅުވިއެވެ. މީގެ އިތުރުން ދިވެހިން މިއަދު ބޭނުންވަނީ އަތޮޅުތެރޭގެ ރަށްތައް ބާކީ ނުކޮށް މުޅި ރާއްޖެ ތަރައްޤީކުރާނެ ކުރައްވާނެ ކެންޑިޑޭޓެއް ކަމަށާއި އެކެންޑިޑޭޓަކީ ރައީސް ޞާލިޙް ކަމަށް އިޔާދް ވިދާޅުވިއެވެ.

މިވޭތުވެދިޔަ 40 އަހަރު ނުހިންގޭވަރަށް މިފާއިތުވި ފަސް އަހަރު ރަށްރަށުގައި ތަރައްޤީގެ މަޝްރޫޢުތައް ހިންގަމުންދާކަމަށް ކެމްޕޭނު ދަތުރުތަކުގައި ރަށްރަށަށް ދިއުމުން އެރަށްރަށުން ބުނަމުންދާ ކަމަށް އިޔާދް ވިދާޅުވިއެވެ. އަދި ރަށްރަށުގެ ރައްޔިތުން ރައީސް ޞާލިޙަށް ތާއީދު ކުރައްވާ ސަބަބަކީއެއީ ކަމަށްވެސް އިޔާދް ވިދާޅުވިއެވެ.

ލ.ގަމުގައި ބޭއްވި ޖަލްސާގައި ރައީސް އިބްރާހިމް މުޙައްމަދު ޞާލިޙްވެސް ވަނީ ވާހަކަފުޅުދައްކަވައިފައެވެ. މިޖަލްސާގައި ގަމު ދާއިރާގެ މަޖިލިސް މެމްބަރު މުޙައްމަދު ވިސާމްވެސް ވަނީ ބައިވެރިވެވަޑައިގެންފައެވެ.