ފަލަސްތީނުގައި ގަތުލުޢާއްމު ކުރިއަށްދާތީ ޕާކިސްތާނުގައި އާ އަހަރު ފާހަގަކުރުން މަނާކޮށްފި!
ފަލަސްތީނުގެ ޣައްޒާގައި ހައްދުފަހަނައަޅާފައިވާ ޔަހޫދީން ހިންގަމުންދާ ޤަތުލު ޢާއްމު ހުއްޓުމެއް ނެތި ކުރިއަށްދާތީ، އެގައުމުގެ މުސްލިމުންގެ ހައްގުގައި، ޕާކިސްތާނުގައި ކުލަގަދަކޮށް އާ އަހަރު ފާހަގަކުރުން މަނާކޮށްފިއެވެ.
މިކަން އަންގައި އިއުލާން ކުރީ އެ ގައުމުގެ ބޮޑު ވަޒީރު، އަންވާރު-އަލް-ހަޤް ކަކަރް އިއްޔެ މީޑިއާ މެދުވެރިކޮށް އެކަމާއި ގުޅޭގޮތުން ގައުމާ މުޚާތަބު ކުރައްވައި ވާހަކަ ދައްކަވަމުންނެވެ.
ކަކަރް ގެ ވާހަކައިގައި އެމަނިކުފާނު ވަނީ، ޔަހޫދީން ހިންގަމުންދާ ޤަތުލު ޢާއްމު ކުށްވެރި ކުރައްވާފައެވެ. އަދި ގަތުލު އާއްމު ވަގުތުން ވަގުތަށް ހުއްޓާލުމަށްވެސް ކަކަރް ވަނީ ގޮވާލާފައެވެ.
"ފަލަސްތީނުގެ މިހާރުގެ ނާޒުކު ހާލަތަށް ރިއާޔަތްކޮށް، އަދި އެގަމުގައި އަނިޔާ ލިބެމުންދާ އަހަރެމެންގެ މުސްލިމު އަޚުންނާއި އުޚުތުންގެ ހައްގުގައި، އެމީހުންނާއި އެކު ތިބިކަން އެންގުމަށް، އާ އަހަރު ފާހަގަ ކުރުމަށް ބާއްވާ އެއްވެސް ހަރަކާތެއްގައި ޕާކިސްތާން ސަރުކާރުން ބައިވެރިއެއް ނުވާނެ." ކަކަރް ވިދާޅުވި އެވެ.
މިއާއެކު ކަކަރް ވަނީ ޕާކިސްތާންގެ ރައްޔިތުންގެ އަރިހުންވެސް، އާ އަހަރު ފާހަގަކުރަން ބޭނުންވާ ނަމަ، ވޭހާވެސް ކުޑަ ގޮތަކަށް އެކަން ކުރުމަށް އެދިލައްވާފައެވެ.
އިތުރަށް ވާހަކަ ދައްކަވަމުން ކަކަރް ވަނީ ޕާކިސްތާނުގެ އެހީގެ ދެ ގާފިލާ މިހާރުވެސް ފަލަސްތީނަށް ފޮނުވިފައިވާ ކަން ފާހަގަކުރައްވައި އިތުރު އެހީ ފޮނުވަން މަސައްކަތް ކުރައްވަމުންދާކަން ފާހަގަކުރައްވާފައެވެ.
އޮކްޓޯބަރ 7 ވަނަ ދުވަހުން ފެށިގެން ހައްދުފަހަނައަޅާފައިވާ ޔަހޫދީން ޣައްޒާގައި ހިންގަމުންދާ ގަތުލު ޢާއްމު ތަކާއި ގުޅިގެން މިހާތަނަށް 21,000 އަށްވުރެ ގިނަ މުސްލިމުން ވަނީ ޝަހީދުވެފައެވެ. އޭގެ ތެރޭގައި ގިނައިން ހިމެނެނީ އަންހެނުންނާއި ތުއްތު ކުދިންކަން ފާހަގަކޮށްލަންޖެހެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
