މަކުނު ވިދުރީގެ 3 ކޭހެއް ޕާކިސްތާނުން ފެނިއްޖެ

ޕާކިސްތާނުން މަކުނު ވިދުރި ނުވަތަ އެމްޕޮކްސްގެ ތިން ކޭހެއް ފެނިއްޖެއެވެ.

ޕާކިސްތާނުގެ އުތުރުގައި އޮންނަ ހައިބަރ ޕަހްތުންހްވާ ސޫބާގެ ސިއްޙީ ޑިޕާޓްމަންޓުން އިއްޔެ ރިޕޯޓުކުރި ގޮތުގައި އެ ސަރަޙައްދުން މަންކީޕޮކްސް ފެނިފައިވަނީ ޔުނައިޓެޑް އެރަބް އެމިރޭޓްސް (ޔޫއޭއީ) އިން އައި ތިން މީހުންގެ ގައިންނެވެ.

މީގެ ކުރިންވެސް ޕާކިސްތާނުން މި ވައިރަސް ފެނިފައިވާއިރު، މި ތިން މީހުންގެ ގައިން ފެނިފައިވަނީ އަލަށް ފެތުރެމުންދާ މި ބަލީގެ ނުރައްކާތެރި ވޭރިއެންޓެއް ކަމަށްވާ އެމްޕޮކްސް ކްލޭޑް 1 ކަމެއް އަދި ކަށަވަރު ކުރެވިފައެއް ނުވެއެވެ.

މި ތިން މީހުންވެސް މިހާރު ވަނީ ކަރަންޓީނު ކޮށްފައެވެ.

އެފްރިކާއިން ފެނުނު، ވަރަށް ފަސޭހައިން ފެތުރޭ މި ބަލީގެ ކޭހެއް ބުރާސްފަތި ދުވަހު ސްވީޑަނުން ވެސް ފެނިފައިވާއިރު، މިއީ އެފްރިކާއިން ބޭރުން މި ބަލީގެ ވޭދަނަ އެއް ފެނުނު ފުރަތަމަ ފަހަރެވެ.

މި ބަލިމަޑުކަމަކީ ބައިނަލްއަޤްވާމީ ކަންބޮޑުވުން އޮތް ޢާންމު ސިއްޙަތުގެ ކުއްލި ނުރައްކަލެއްގެ ގޮތުގައި ދުނިޔޭގެ ސިއްޙީ ޖަމްޢިއްޔާއިން ވަނީ އިޢުލާނުކޮށްފައިއެވެ.

މި ބަލީގައި، 2023 ވަނަ އަހަރުގެ ޖަނަވަރީ މަހުން ފެށިގެން މިހާތަނަށް ކޮންގޯގައި 27،000 ކޭސް ފެނިފައިވާއިރު، 1،100 އަށްވުރެ ގިނަ މީހުން މަރުވެފައިވެއެވެ. މީގެ ތެރެއިން ގިނައީ ކުޑަކުދިންކަން ފާހަގަކޮށްލަން ޖެހެއެވެ.

ވައިރަހަކުން ޖެހޭ މި ބަލި ޖެހުމުން، ފްލޫ ފަދަ އަލާމާތްތައް ފެނުމާއި އެކު ގައިގައި ފޮޅުތަކެއް ނަގައެވެ. މި ބަލީގެ ސަބަބުން ބައެއް ފަހަރު ފުރާނައަށް ނުރައްކާތެރިވާއިރު، ކުޑަކުދިންނާއި، މާބަނޑު އަންހެނުންނާއި، އެޗްއައިވީ ފަދަ ބަލިތަކުގެ ސަބަބުން ހަށިގަނޑުގެ ދިފާޢީ ނިޒާމު ބަލިކަށިވެފައިވާ މީހުންނަށް މި ބަލީގެ ނުރައްކާ ބޮޑެވެ.