ރައީސް ޞާލިހު، ތިނަދޫއަށް ސިޓީއެއްގެ ދަރަޖަ ދީފި!

ގދ. ތިނަދޫއަކީ ސިޓީއެއްގެ ދަރަޖަ ލިބިގެންވާ ރަށެއްކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މިއަދު ކަނޑައަޅުއްވައިފިއެވެ.

ރައީސް އޮފީހުގެ ތަރުޖަމާނު މިރޭ ކުރެއްވި ޓްވީޓެއްގައި ވިދާޅުވީ، ތިނަދޫ އަށް ސިޓީއެއްގެ ދަރަޖަ ދީފައިވަނީ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުން ރައީސުލްޖުމްހޫރިއްޔާއަށް ލިބިފައިވާ ބާރުގެ ދަށުން ކަމަށެވެ.

ތިނަދޫއަށް ސިޓީއެއްގެ ދަރަޖަ ދީފައިވާއިރު، ސިޓީއެއްގެ ދަރަޖަ ދެވޭނީ އާބާދީގައި ދިހަހާސް މީހުން ހަމަވުމުން ކަމަށް ގާނޫނުގައި ބުނެފައި އޮވެއެވެ. ނަމަވެސް ތިނަދޫގެ އާބާދީ އަދި 7000 އަށް ނަރާއެވެ.

ތިނަދޫ ސިޓީއަކަށް ހެދުމަށް މީގެ ކުރިން އެކި ފަހަރު މަތިން ރައީސް ޞާލިހު ވަޢުދުވެޑައިގެންފައިވާއިރު، އަދާއި ހަމައަށްވެސް އެކަން އޮތީ ނުވެއެވެ.

އެކަމާއި ގުޅިގެން ތިނަދޫ ގިނަ ރައްޔިތުންގެ ނުރުހުން ސަރުކާރަށް އަމާޒުވެފައިވާއިރު، ދާދިފަހުން އިދިކޮޅުު ކެންޑިޑޭޓު، ޑރ. މުހައްމަދު މުޢިއްޒު ތިނަދޫއަށް ވަޑައިގެން ދެއްކެވި ވާހަކަފުޅުގައި އެމަނިކުފާނު ވަނީ ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ގާނޫނަށް ގެންނަން ޖެހޭ ބަދަލުތައް ގެނެސްގެން ތިނަދޫއަކީ ސިޓީއެއްކަމަށް ކަނޑައަޅާ، ސިޓީއަކުން ލިބެން ޖެހޭގެ ޚިދުމަތްތައް އެ ރަށުގައި ގާއިމްކުރާނެ ކަމަށެވެ.