ގުޖުރާތު ކަޓުވާލުމަށްފަހު ގޯޓު ސްޕޯޓްސް ކުލަބު ކުއާޓާ ފައިނަލަށް

ވިލިމާލޭގައި މިހާރު ކުރިއަށްދާ "އޮބިއަން ޓީއެފްޓީ 11 ވަނަ ރަމަޟާން ފުޓްސަލް ޗެލެންޖު 2024" ގެ ދެވަނަ ބުރުގައި ހޮނިހިރު ދުވަހުގެ ރޭ އޮޑި ކުޅެވުނު ދެވަނަ މެޗުގައި ގޯޓު ސްޕޯޓްސް ކުލަބާއި ގުޖުރާތު ވާދަކުރި މެޗު 5-2 ގެ ނަތީޖާއަކުން ކާމިޔާބުކޮށް ގޯޓު ސްޕޯޓްސް ކުލަބު މުބާރާތުގެ ކުއާޓާ ފައިނަލުން ޖާގަ ހޯދައިފިއެވެ .

ގޯޓު ސްޕޯޓްސް ކުލަބުން މުބާރާތުގެ ދެވަނަ ބުރުން ޖާގަ ހޯދީ ގްރޫޕް ސްޓޭޖުގައި ކުޅުނު ތިން މެޗުގެ ތެރެއިިން ދެމެޗުން މޮޅުވެ އެއް މެޗު އެއްވަރުވެ، 7 ޕޮއިންޓާއެކު ގުރޫޕް ސީގެ އެއްވަނަ ޓީމުގެ ގޮތުގައެވެ. އަދި ގުޖުރާތުން ދެވަނަ ބުރުގެ ޖާގައެއް ހޯދީ ގްރޫޕް ސްޓޭޖުގައި ކުޅުނު ތިން މެޗުގެ ތެރެއިިން ދެމެޗުން މޮޅުވެ އެއް މެޗުން ބަލިވެ، 6 ޕޮއިންޓާއެކު ގުރޫޕްގެ ދެވަނަ ޓީމުގެ ގޮތުގައެވެ.

ވިލިމާލޭ ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފުގައި ގޯޓު ސްޕޯޓްސް ކުލަބުން ވަނީ ތިން ލަނޑުގެ ލީޑެއް ނަގާފައެވެ. ނަމަވެސް މެޗުގެ ދެވަަނަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ ދެޓީމުންކުރެ ކޮންމެ ޓީމަކުން ވެސް މިހާފުގައި ވަނީ ދެލަނޑު ކާމިޔާބުކޮށްފައެވެ.

މިމެޗުގައި ގޯޓު ސްޕޯޓްސް ކުލަބުގެ އަހުމަދު އައިހަން ދެލަނޑު ކާމިޔާބު ކުރި އިރު އެޓީމުގެ، އަހުމަދު އީރަސް، އިބްރާހިމް އިމްރާހް އަދި އަހުމަދު ފިރާޝް މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ. މީގެ އިތުރުން މިމެޗުގައި ގުޖުރާތުގެ އަބްދުﷲ ޔަމީން އަދި ހުޒައިފަތު ރަޝީދު މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ގޯޓު އެސްސީގެ އަހުމަދު އައިހަން އެވެ.

މުބާރާތުގެ ކުއާޓާ ފައިނަލުގައި އޭޕްރިލް މަހުގެ ތިންވަނަ ދުވަހުގެ ރޭ 22:00 ގައި ގޯޓު ސްޕޯޓްސް ކުލަބުން ނުކުންނާނީ މާދަމާ ރޭ އެލްކިއު ސްޕޯޓްސް ކުލަބާއި ބަދަވީސް ސްޕޯޓްސް ކުލަބު ވާދަކުރާ މެޗުން މޮޅުވާ ޓީމަކާއި ދެކޮޅަށެވެ.

ޗެންޕިއަން ޓީމަށް 50,000 އަދި ރަނަރަޕް ޓީމަށް 30,000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު 32 ޓީމަކުން ބައިވެރިވެފައިވާއިރު މުބާރާތް ކުރިއަށް ދަނީ ބައިވެރިވި 32 ޓީމު 8 ގުރޫޕަކަށް ބަހާލައިގެންނެވެ. އަދި މިމުބާރާތުގެ މެއިން ސްޕޮންސަރ އަކީ އޮބިއަން އެވެ. އަދި މުބާރާތުގެ މީޑިއާ ޕާޓްނަރަކަށް ހަމަޖައްސާފައި ވަނީ ވޮއިސް އެވެ.