ލުނބޯ ކިލޯއެއްގެ އަގު 75 ރުފިޔާއަށް އަރައިފި

މާލޭ ބާޒާރުގައި ލުނބޯ ކިލޯއެއްގެ އަގު 75 ރުފިޔާއަށް އުފުލިއްޖެއެވެ.

ބާޒާރުގައި އެންމެފަހުން ލުނބޯގެ އަގު އުފުލިފައިވަނީ މިދިޔަ ރޯދައަށް ތައްޔާރުވަމުންދަނިކޮށެވެ. އެގޮތުން މިއަހަރުގެ ފެބުރުއަރީމަހުގެ ތެރޭގައި ލުނބޯ ކިލޯއެއްގެ އަގު ވަނީ 80 ރުފިޔާއަށް އަރައިގެން ގޮސްފައެވެ. އޭރު ލުނބޯގެ އަގު ވެއްޓުނީ އެސްޓީއޯއިން ލުނބޯ އެތެރެކޮށް ވިއްކަން ފެށުމުންނެވެ. ބާޒާރުގައި ލުނބޯގެ އަގު އުފުލިފައިވާއިރު، މީގެ ހަފްތާއެއްހާ ދުވަސްކުރިން ބާޒާރުގައި ލުނބޯ ކިލޯއެއް އެންމެ އަގުބޮޑުވެގެންވެސް 30 ރުފިޔާއަށް ލިބެންހުއްޓެވެ.

ދަތުރުވެރިންގެ މާރުކޭޓުގެ ގޮޅިތަކުގައި ތަކެތި ވިއްކާ ބައެއް ފަރާތްތަކުން ބުނީ، ލުނބޯ ވިއްކާއަގު ބޮޑުވީ، ގަންނަން ލިބޭ އަގު މިހާރު ބޮޑުވުމުގެ އިތުރުން ހޯލްސޭލްކޮށް ލުނބޯ ގަންނަން ލިބޭ އަދަދުވެސް މަދުވުމުން ކަމަށެވެ. މީގެ އިތުރުން މިދުވަސްވަރު ޑޮލަރު ގަންނަން ލިބޭ އަގު ބޮޑުވުމަކީވެސް ލުނބޯގެ އަގު އުފުލެން ދިމާވި އެއް ސަބަބުކަމަށް ލުނބޯ އެތެރެކުރާ ބައެއް ވިޔަފާރިވެރިން ފާހަގަކުރިއެވެ.

ބާޒާރުމަތީގައި ލުނބޯ ކިލޯއެއްގެ އަގު 75 ރުފިޔާގައި ހުރިއިރު، ހުޅުމާލޭގެ ބައެއް ފިހާރަތަކުގައި ލުނބޯ ކިލޯއެއް 80 ރުފިޔާއަށްވެސް ލިބެން އެބަހުއްޓެވެ. މާލޭ ބާޒާރުގައި މިދިޔަ އަހަރުގެ އޮގަސްޓްމަހު ލުނބޯ ކިލޯއެއްގެ އަގު 140 ރުފިޔާއަށްވެސް އަރައިގެންދިޔައެވެ. އެފަހަރު ލުނބޯގެ އަގު އުފުލިގެންދިޔައީ މޫސުންގޯސްވުމާއެކު ކަނޑުމަގުން ލުނބޯ ގެނައުމުގައި ދަތިތަކެއް ހުރުމުންނެވެ.

ލުނބޯ ހިމެނެނީ ދިވެހިން އާއްމު ދިރިއުޅުމުގަައި އެންމެ ގިނައިން ބޭނުންކުރާ އެއްޗެހީގެ ތެރެއިންނެވެ. ދިވެހިންނަކީ ކާބޯތަކެތި ހެދުމުގައި އާއްމުކޮށް ލުނބޯ ބޭނުންކުރާ ބައެކެވެ.