ނަފްސު އިސްލާޙް ކުރުމުގެ އިޚްލާސްތެރި ނިޔަތުގައި ރަމަޟާން މަހާއި ބައްދަލުކުރާށެ: ޚުޠުބާ

ނަފްސު އިސްލާޙު ކުރުމުގެ އިޚްލާސްތެރި ނިޔަތުގައި ރަމަޟާން މަހާއި ބައްދަލުކުރުމަށް މިއަދުގެ ހުކުރު ޚުޠުބާގައި ގޮވާލައިފިއެވެ.

"މިއީ ޙަޔާތުގެ އެންމެ ފަހު ރަމަޟާން މަހަށް ވެދާނެ" މި މައުޟޫއަށް ދިން ޚުޠުބާގައި ބުނީ ވަށައިގެން ދިރިއުޅެމުންދިޔަ އެކުވެރިންނާއި، ރަޙްމަތްތެރިންނާއި، ގާތްތިމާގެ މީހުންކުރެ، މިއަހަރުގެ ރަމަޟާން މަހާއި ބައްދަލުނުވެ ދުނިޔެއާއި އަލްވަދާޢު ކިޔައިފައިވަނީ ކިތައްމީހުންތޯއެވެ؟ އަދި އޭގެ ތެރެއިން ބައެއް މީހުންނަކީ ރަމަޟާން މަހު ތިބާޔާއި އެކު ރޯދަހިފައި، ޤުރުއާން ކިޔަވައި، ތަރާވީޙް ކޮށް އުޅުނު މީހުން ކަމަށާއި، މިއަދި އެމީހުން ވަނީ ދުނިޔެއާއި އަލްވަދާޢު ކިޔައިފައި ކަމަށެވެ.

ފާއިތުވި ރަމަޟާން މަސް ބައްދަލުކުރިއިރު އެމީހުންނަކަށް އެއީ އެމީހުންގެ އެންމެ ފަހު ރަމަޟާން މަސްކަމެއް ނޭނގޭނެ ކަމަށާއި، މިއަދު އެމީހުންގެ އާދޭހަކަށް ވާނީ ތައުބާވެ ރޯދަހިފުމަށާއި، ނަމާދުކޮށް، ޞަދަޤާތް ކުރުމަށް ކުޑަނަމަވެސް ފުރުޞަތެއް އަލުން ލިބުން ކަމަށް ޚުޠުބާގައި ބުންޏެވެ.

ވަކިވެ ދިޔަ މީހުންގެ ޙަޔާތުން ޢިބްރަތް ލިބިގަތުމަށް ޚުޠުބާގައި ބުންޏެވެ. އަދި މި ރަމަޟާން މަހަކީ ޙަޔާތުގައި ބައްދަލުވާނެ އެންމެ ފަހު ރަމަޟާން މަސް ކަމަށް ދެކި، ނަފްސު އިސްލާޙު ކުރުމުގެ އިޚްލާސްތެރި ނިޔަތުގައި މިމަހާއި ކުރިމަތިލުމަށާއި މިމަހަކީ މާތްﷲ ދެއްވެވި މަތިވެރި ނިޢުމަތެއް ކަމުގައި ދެކި ފިސާއި ހެޔޮގޮތުގައި މިމަހުގެ ބޭނުން ހިފުމަށް ޚުޠުބާގައި ގޮވާލައިފައިވެއެވެ.

މީގެ އިތުރުން ޚުޠުބާގައި ބުނީ ރަމަޟާންމަސް އަތުވެއްޖެނަމަ ކީރިތި ރަސޫލާ ޞައްލައްﷲ ޢަލައިހި ވަސައްލަމް އެމަހަށް އެކަލޭގެފާނުގެ އަސްޙާބުން ޝައުޤުވެރިކުރުވަނީ އެމަހުގެ މަތިވެރި ނިޢުމަތުން ބަރަކާތް ލިބިގަތުމަށް ކަމަށެވެ.

"މާތްﷲ އެވަނީ ރަޙްމަތާއި، ފުއްސެވުމުގެ ގޮވެތި ކަމުގައިވާ ސުވަރުގެގެ ދޮރުކޮޅުތައް، ތިބާއަށްޓަކައި ހުޅުވައިދެއްވައިފައި، ޢަޛާބުގެ ގޮވެތިކަމުގައިވާ ނަރަކައިގެ ދޮރުތައް ބަންދުކުރައްވާފައި، އަދި ނުބައިކަމުގެ މަގުތަކަށް މީހުން ލަންބުވާ ޝައިޠާނުންގެ ބޮޑުން ކަސްތޮޅު އަޅުއްވާފައި، ސުވަރުގެ ވަނުމުގެ ދޮރުކޮޅުތައް ހުޅުވުމަކީ ކިހާ ބޮޑު ނިޢުމަތެއްތޯ" ޚުޠުބާގައި ބުނެފައިވެއެވެ.

ޚުޠުބާގައި އިތުރަށް ބުނީ ފާއިތުވިދުވަސްތަކުގައި ދުނިޔެއިން ވަކިވެގެންދިޔަ އެތައް ހާސް ބަޔަކަށްފަހު ތިބާ މިރަމަޟާން މަހުގައި، ދުނިޔޭގައި ލެހެއްޓެވީތީ ﷲ ސުބްޙާނަހޫ ވަތަޢާލާއަށް ޝުކުރުކުރުމަށެވެ. އަދި އެއީ ﷲ ތަޢާލާ ދެއްވެވި މަތިވެރި ފުރުޞަތެއް ކަމަށެވެ.

އެހެން ކަމުން ރަމަޟާން މަހުގެ ނިދާއަށް އިޖާބަދީ ފާފަތަކުން ތައުބާވެ، ތެދުވެރިކަމާއި، އިޚްލާސްތެރިކަމާއިއެކު، ހެޔޮކަމާއިގެން އެމަހުގައި ކުރިއަރައި ދިއުމަށް ޚުޠުބާގައި ގޮވައިލައިފައިވެއެވެ. އަދި ޝައިޠާނާގެ މަޅީގައި ނުޖެހުމަށާއި ފާއިތުވެދިޔަ ރަމަޟާން މަސްތަކުގައި ލިބުނު ހެޔޮކަމުގެ މަތިވެރި ފުރުޞަތުތައް، ކަންނެތްކަމާއި، ކުޅިވަރާއި އަރާމުނިދީގައި ބޭކާރުކުރި ފަދައިން، މި ރަމަޟާންމަހުގެ ރޭތަކާއި ދުވަސްތައް ބޭކާރު ވިޔަ ނުދިނުމަށް ޚުތުބާގައި ބުނެފައިވެއެވެ.