ޕްރޯ ފުޓްސަލް ކުލަބު ކޮޅަށް 15 ލަނޑުޖަގައި، ގްރޫޕް ބީގެ އެއްވަނަ ޓީމުގެ ގޮތުގައި ދަ ސްކޯޕިއަން ސެމީއަށް!

އިނގުރައިދޫ ކައުންސިލް ފުޓްސަލް ފިއެސްޓާގައި މިރޭގެ ކުޅެވުނު ގުރޫޕް ބީގެ ފަހު މެޗުގައި 15-2 ގެ ނަތީޖާއަކުން ޕްރޯ ފުޓްސަލް ކުލަބު ބަލިކޮށް ގުރޫޕްގެ އެއްވަނަ ޓީމުގެ ގޮތުގައި ދަ ސްކޯޕިއަން އިން މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްފިއެވެ.

މިރޭގެ މެޗަށް ނުކުތްއިރު ތިން ޕޮއިންޓާއެކު ދަ ސްކޯޕިއަން އޮތީ ގްރޫޕްގެ ތިންވަނައިގައި އެވެ. އަދި ދެ ލަނޑުގެ ތަފާތަކުން މޮޅުވެ ސެމީއަށް ދިއުމުގެ ފުރުސަތު އެޓީމަށް އޮތެވެ.

ނަމަވެސް މިރޭގެ މެޗުގެ ފުރަތަަމަ ހާފުގައި އެކަނިވެސް އެޓީމުން 8 ލަނޑުޖެހިއިރު ދެވަނަ ހާފުގައި އެޓީމުން އިތުރު 7 ލަނޑު ކާމިޔާބުކުރި އެވެ. އަދި މުބާރާތުގައި ކުޅުނު ތިން މެޗުން ބަލިވެ ޕޮއިންޓެއް ނުލިބި ގުރޫޕްގެ ފުލަށް ދިޔަ ޕްރޯ ފުޓްސަލް ކުލަބުން މި މެޗުގެ ކޮންމެ ހާފެއްގައިވެސް އެއް ލަނޑު ކާމިޔާބުކޮށްފައިވެއެވެ.

މިރޭގެ މެޗުގައި ދަ ސްކޯޕިއަންގެ އިބްރާހީމް ޝަފްރާޒް އާއި މުހައްމަދު އިޔާދު އަލީ މިއިން ކޮންމެ ކުޅުންތެރިއެއް ފަސް ލަނޑުޖެހިއިރު އެޓީމުގެ ހުސެއިން ޝަފްރާޒް އިބްރާހިމް ވަނީ ތިން ލަނޑު ކާމިޔާބުކޮށް ހެޓްރިކް ހަދާފައެވެ. އަދި އެޓީމުގެ އަނެއް ދެ ލަނޑު ކާމިޔާބުކޮށްދިނީ އަހުމަދު ޝަޔާޒް އިބްރާހިމް އާއި އިބްރާހިމް ޒުހޫރު އެވެ.

ޕްރޯ ފުޓްސަލް ކުލަބުން މި މެޗުގައި ކާމިޔާބުކުރި ދެ ލަނޑު ކާމިޔާބުކޮށްދިނީ އަހުމަދު ހާނީ އާއި އިމާދު މުހައްމަދު ފުޅު އެވެ. އަދި މި މެޗުގެ މޭން އޮފް ދަ މެޗަކަށް ހޮވިފައިވަނީ ދަ ސްކޯޕިއަންއަށް މި މެޗުގައި ފަސް ލަނޑު ކާމިޔާބުކޮށްދިން މުހައްމަދު އިޔާދު އަލީ އެވެ.

މުބާރާތުގެ ސެމީ ފައިނަލުގެ ދެ މެޗު މާދަމާރޭ ކުޅުމަށް ހަމަޖެހިފައިވާ އިރު 21:30 ކުޅޭ ސެމީ ފައިނަލުގެ ފުރަތަަމަ މެޗުގައި ބައްދަލުކުރާނީ ގްރޫޕް އޭގެ އެއްވަނަ ސްޓްރީޓް ބްރަދާސް އާއި ގްރޫޕް ބީގެ ދެވަނަ ހަލަފް އެފްސީ އެވެ.

މާދަމާ ރޭ 22:30 ގައި ކުޅެވޭ މުބާރާތުގެ ސެމީ ފައިނަލުގެ  ދެވަަނަ މެޗުގައި ގުރޫޕް ބީގެ އެއްވަނަ ދަ ސްކޯޕިއަން ނުކުންނާނީ ގްރޫޕްގެ އޭގެ ދެވަނަ އެފްސީ ހެސަ ވާދަ އާއި ދެކޮޅަށެވެ. މި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އެޕްރިލް މަހުގެ ތިންވަނަ ދުވަހުގެ ރޭ އެވެ.