"އަޅުގަނޑު ޖަލުގައި ހޭދަކުރި ހިތްދަތިކަން އިހްސާސް ކުރެވެޔޭ ނުބުނުން އެދެން؛ އެ އިހްސާސެއް ނުކުރެވޭނެ"
ކުރީގެ ރައީސް އަބްދުالله ޔާމީން އަބްދުލްގައްޔޫމް ޖަލުގައި ހުންނެވިއިރު ތަހައްމަލް ކުރައްވަން ޖެހިވަޑައިގެންނެވި ކަންކަމާއި، އޭރު އެމަނިކުފާނަށް ކުރެވުނު އިހްސާސްތައް އެހެން ބޭފުޅުންނަށްވެސް ކުރެވޭ ކަމަށް އެމަނިކުފާނު އިންނެވި ތަނެއްގައި ވިދާޅުނުވުމަށް އެދިވަޑައިގެންފިއެވެ.
ރައީސް ޔާމީން މިފަދައިން އެދިލެއްވީ، އާރަށް މައްސަލަ އާއި ގުޅިގެން ކްރިމިނަލް ކޯޓުން އެމަނިކުފާނުގެ މައްޗަށް ކުރި 11 އަހަރުގެ ޖަލު ހުކުމް ތަންފީޒް ކުރައްވަން ޖަލުގައި އެތަކެއް މަސް ދުވަހު ހުންނެވުމަށްފަހު، އިންތިޚާބީ ރައީސް ޑރ މުހައްމަދު މުއިއްޒުގެ އެދިލެއްވުމަށް ގޭބަންދަށް ބަދަލު ކުރެއްވުމަށްފަހު، ގޭ ބަންދު ރަށު ބަންދަށް ބަދަލު ކުރެއްވުމާއިއެކު ބޭއްވުނު ފުރަތަމަ ޖަގަހަ ޖަލްސާގައި ވާހަކަދައްކަވަމުންނެވެ.
އެ ޖަލްސާގައި ވާހަކަދެއްކެވި ބައެއް ފަރާތްތަކުން ވަނީ ޔާމީން ޖަލުގައި ތަހަންމަލް ކުރެއްވި ކަންކަން އެންމެ ބޮޑަށް އިހްސާސް ކުރެވޭނީ އެމަނިކުފާނުގެ އިސް ގާނޫނީ ވަކީލު ޑރ. މުހައްމަދު ޖަމީލް އަށް ކަމަށް ވިދާޅުވެ، އެ އިހްސާސް ޖަމީލްއަށްވެސް އަދި އެމަނިކުފާނުގެ އަރިހުގައި ތިއްްބެވި އެހެން ބައެއް ބޭފުޅުންނަށްވެސް ކުރެވޭ ކަން ދޭހަވާ ފަދަ މޭރުމަކުން ވާހަކަ ދައްކަވާފައެވެ.
އެވާހަކަތަކަށް އިޝާރާތް ކުރައްވައި ޔާމީންގެ ވާހަކަފުޅު ފަށްޓަވަމުން އެމަނިކުފާނު ވަނީ، އެއްވެސް ސިޔާސީ ލީޑަރަކު އެމަނިކުފާނު ޖަލުގައި ތަހައްމަލް ކުރެއްވި ކަންކަން އިހްސާސް ނުކުރައްވާނެ ކަމަށް ވިދާޅުވެފައެވެ. އެހެން ކަމުން، އެމަނިކުފާނު ބައިވެރިވެވަޑައިގަންނަވާ ޖަލްސާއެއްގައި އެއްވެސް ބޭފުޅެއް އެފަދައިން ވިދާޅު ނުވުމަށްވެސް ވަނީ އެދިވަޑައިގެންފަ އެވެ.
އެއްވެސް ސިޔާސީ ލީޑަރަކު އަޅުގަނޑު ޖަލުގައި ތަހަންމަލްކުރި ތަހަންމަލް ކުރުމެއް އިހްސާސެއް ނުކުރައްވާނެ. ތަޖުރިބާއެއް ނުކުރައްވާ. އެހެންވީމާ އަޅުގަނޑު އެދެން އަޅުގަނޑު އިންނަ ޖަލްސާއެއްގައި އެއްވެސް ބޭފުޅެއް ވިދާޅުނުވަން، ރައީސް ޔާމިން ތި ތަހައްމަލް ކުރެއްވި ހިތްދަތިކަން ތިމަންނަ މެންނަށް އިހްސާސް ވެޔޭ. ނޫން. ނުވާނެ. އެ ހިތްދަތިކަން އެއްވެސް ބޭފުޅަކަށް އިހްސާސް ނުވާނެ. އެހެންވީމާ އެއް ގޮތަކަށް ވެސް (އެ އިހްސާސް ވާނެ ކަން) ގަބޫލު ނުކުރައްވާ. އަޅުގަނޑު ހަމަ އެދެން. އަޅުގަނޑު އިންނަ ޖަލްސާއެއްގައި އަޅުގަނޑުގެ ހިތްދަތިކަން އިހްސާސް ކުރި އިހްސާސްކުރުން، ތިޔަ ބޭފުޅުންނަށް ކޮންމެސް ވަރަކަށް ވާކަމަށް ވިދާޅުވުމަކީ ރަނގަޅު ވާހަކަ އަކަށް ނުވާނެ.
ރައީސް ޔާމީން އަބްދުލްގައްޔޫމް
ރައީސް ޔާމީން ވިދާޅުވީ އެމަނިކުފާނު ތަހައްމަލް ކުރެއްވި ހިތްދަތިކަން އިހްސާސް ކުރެވޭ ކަމަށް ބުނުމުގެ ބަދަލުގައި އެ ހިތްދަތިކަމުގައި ބައިވެރިވެވަޑައިގަންނަވާ ކަމަށް ވިދާޅުވުމަކީ ބަލައިގަންނަވާނެ ކަމެއް ކަމަށެވެ. ކަމެއް އިހްސާސް ކުރުމާއި، އެ ކަމެއް ތަހަންމަލް ކުރަމުންދާ މީހެއްގެ ހިތްދަތިކަމުގައި ބައިވެރި ވުމަކީ ވަރަށް ތަފާތު ދެކަންތައް ކަމަށް ޔާމީން ވިދާޅުވި އެވެ.
މިއާއެކު އެމަނިކުފާނު ވަނީ، މީގެ ކުރިން ބައެއް ސިޔާސީންނަށް ކުޑަ ދުވަސްކޮޅެއް ވަންދެންވެސް ޖަލުގައި ނުތިއްބެވި، ބޭރު ގައުމަށް ފުރައިގެން ގޮސްފައިވާކަމަށް ފާހަގަކުރެއްވާފައެވެ. އަދި އޭރު އެކަންކަން ވީ އޭރު ރައީސުލްޖުމްހޫރިއްޔާގެ މަގާމުގައި ހުންނެވި އިހްސާންތެރިކަމުން ކަމަށްވެސް ޔާމީން ވިދާޅުވި އެވެ. އަދި އެބޭފުޅުން ރާއްޖެއިން ބޭރަށް ވަޑައިގެންނެވީ ކޯޓުން ކޮށްފައިވާ ހުކުމުގެ ކުރު މުއްދަތެއްވެސް ތަންފީޒު ނުކުރައްވާ ކަމަށް ޔާމީން ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
