ތިލައުތުރުގެ ޗެމްޕިއަންކަން އުތީމަށް

ހއ. އަތޮޅު ކައުންސިލުން އިންތިޒާމުކޮށްގެން ބޭއްވި "ތިލައުތުރު ފުޓްސަލް މުބާރާތް 2025" ގެ ޗެމްޕިއަންކަން، ޤައުމީ ޓީމުން ސަސްޕެންޑުކޮށްފައިވާ އަހްމަދު އައިހަމް، (ފަތޯ) ހިމެނޭ އުތީމުގެ ޓީމުން ހޯދައިފިއެވެ.

ރޭ ކުޅުނު ފޯރިގަދަ ފައިނަލް މެޗުގައި އުތީމުން ޗެމްޕިއަންކަން ހޯދީ މުރައިދޫގެ މައްޗަށް ޕެނަލްޓީ ޖަހައިގެން ކުރި ހޯދައިގެންނެވެ. މި މުބާރާތުގެ ފައިނަލް މެޗު ޝަރަފްވެރިކޮށްދެއްވީ ރާއްޖޭގެ ނައިބު ރައީސް ހުސައިން މުޙައްމަދު ލަތީފެވެ.

މި މެޗުގެ ފުރަތަމަ ލަނޑު ޖަހައި ކުރި ހޯދީ މުރައިދޫންނެވެ. މުރައިދޫއަށް މި ލަނޑު ލިބުނު ކޯނަރަކުން ޖަހައިދިނީ އަޝްރާގެވެ. ނަމަވެސް، އުތީމުން ވަނީ ފުރަތަމަ ހާފުގެ ފަހު މިނިޓުގައި މެޗުގެ ނަތީޖާ ހަމަހަމަކޮށްފައެވެ. މި ލަނޑު އައިހަމް ދިން ބޯޅައަކުން އުތީމަށް ޖަހައިދިނީ މުޙައްމަދު މަޒީންއެވެ. ދެވަނަ ހާފުގައި އިތުރު ލަނޑެއް ނުޖެހި ނަތީޖާ 1-1 އިން ހަމަހަމަވުމުން، މެޗުގެ ނަތީޖާ ނެރެން ޖެހުނީ ޕެނަލްޓީ ޝޫޓްއައުޓްގައެވެ.

ޕެނަލްޓީގައި އުތީމުގެ ފަރާތުން އައިހަމް އާއި ޢަބުދުﷲ އިލްހާމް ވަނީ ފުރަތަމަ ދެ ޕެނަލްޓީ ކާމިޔާބުކޮށްދީފައެވެ. ނަމަވެސް މަޒީން ޖެހި ތިންވަނަ ޕެނަލްޓީ މުރައިދޫގެ ކީޕަރު ދިފާޢުކުރިއެވެ. އުތީމުގެ މުޙައްމަދު އައިލަމް ޢަބުދުﷲ ޖެހި ހަތަރުވަނަ ޕެނަލްޓީ ދަނޑިތަކުގައި ޖެހިފައި ގޯލަށް ވަތްއިރު، އުތީމަށް ތަށި ކަށަވަރުވީ ޝްވާން އިބްރާހީމް ފަސްވަނަ ޕެނަލްޓީ ކާމިޔާބުކޮށްގެންނެވެ.

މުރައިދޫގެ ފަރާތުން ޕެނަލްޓީގައި ފުރަތަމަ ޖެހި އިޔާންގެ ޕެނަލްޓީ އުތީމުގެ ކީޕަރު ދިފާޢުކުރިއެވެ. އަދި މުޙައްމަދު ނަޒްމީން ޖެހި ދެވަނަ ޕެނަލްޓީ ހުރަސް ދަނޑީގައި ޖެހި ނާކާމިޔާބުވިއެވެ. މުރައިދޫގެ ތިންވަނަ ޕެނަލްޓީ ރައިސަމް ވަނީ ގޯލުގެ މަތީ ދާގަނޑަށް އަމާޒުކޮށް ވައްދާލާފައެވެ. ހަތަރު ވަނަ ޕެނަލްޓީ އަޝްރާގު ކާމިޔާބު ކުރިއެވެ.

މުބާރާތުގެ އެންމެ މޮޅު ކުޅުންތެރިޔާގެ މަޤާމު ހޯދާފައިވަނީ އުތީމުގެ ޖާޒީ ނަންބަރު 7 މުޙައްމަދު މަޒީންއެވެ. އަދި ފައިނަލް މެޗުގެ މޮޅު ކުޅުންތެރިޔަކަށް ވެސް ހޮވުނީ މަޒީންއެވެ.

މުބާރާތުގެ އެންމެ ގިނަ ލަނޑު ޖެހި ކުޅުންތެރިޔަކަށް ހޯރަފުށީގެ ޢަލީ ޒިޔާދު ހޮވުނުއިރު، އެންމެ މޮޅު ކޯޗަކަށް ހޮވުނީ އުތީމުގެ ޢަލީ ހައިސަމްއެވެ. އަދި އެ މުބާރާތުގެ ފެއާޕްލޭ ޓީމަކީ ދިއްދޫ އެވެ.