މަންތާ އެއާ މުރައިދޫ ވެޓަރަންސް އިންވިޓޭޝަނަލް ވޮލީ މުބާރާތުގެ މީޑިއާ ޕާޓްނަރަކަށް ވޮއިސް ސްޕޯޓްސް

ހއ. މުރައިދޫގައި ބޭއްވުމަށް ހަމަޖެހިފައިވާ "މަންތާ އެއާ މުރައިދޫ ވެޓަރަންސް އިންވިޓޭޝަނަލް ވޮލީބޯޅަ މުބާރާތް 2026" ގެ މީޑިއާ ޕާޓްނަރަކަށް ވޮއިސް ސްޕޯޓްސް ހަމަޖައްސައި، އެއްބަސްވުމުގައި ސޮއިކޮށްފިއެވެ.

މުރައިދޫ ނިޔާ އެކަޑަމީގެ ފަރާތުން ކުރިއަށްގެންދާ މި އަހަރުގެ މުބާރާތް ފެށުމަށް ތާވަލްކޮށްފައިވަނީ އަންނަ ސެޕްޓެމްބަރު މަހުގެ 4 އިން 18 ވަނަ ދުވަހުގެ ނިޔަލަށެވެ. މި މުބާރާތަކީ އަތޮޅުގެ ރަށްތަކަށް ދައުވަތު ދީގެން ބާއްވާ ފޯރިގަދަ މުބާރާތެކެވެ.

މުބާރާތް އިންތިޒާމްކުރާ ނިޔާ އެކަޑަމީން ބުނީ، މިއަހަރުގެ މުބާރާތް މި ބާއްވަނީ މިދިޔަ އަހަރު މި މުބާރާތަށް ލިބުނު ބޮޑު ކާމިޔާބީއަށް ފަހުގައި ކަމަށެވެ. މިއީ މުޅި ރަށަށް އަންނަ އީދެއް ފަދަ އުފާވެރި މުނާސަބަތެއްކަން ފާހަގަކުރަމުން ނިޔާ އެކަޑަމީން ބުނީ މުބާރާތް ކާމިޔާބުކަމާއެކު ކުރިއަށް ގެންދިއުމަށް މުރައިދޫގެ ހުރިހާ މުއައްސަސާތަކުގެ އިތުރުން މުބާރާތުގައި ބައިވެރިވާ އެހެން ރަށްރަށުގެ ޓީމުތަކުން ވެސް ފުރިހަމަ އެއްބާރުލުމެއް ލިބެމުންދާ ކަމަށެވެ.

މިފަހަރުގެ މުބާރާތުގައި ޖުމްލަ 10 ރަށަކުން ވާދަކުރެއެވެ. އެ ރަށްތަކަކީ މުރައިދޫގެ އިތުރުން ކެލާ، ހަނިމާދޫ، ވަށަފަރު، ފިނޭ، ފިއްލަދޫ، ދިއްދޫ، ކުޅުދުއްފުށި، ނޮޅިވަރަމް އަދި ބާރަށެވެ.

މުބާރާތުގެ މެޗުތައް ކުރިއަށްދާނީ ގްރޫޕް ސްޓޭޖުގައި ރައުންޑް އުސޫލުން ކުޅުމަށްފަހު، އެންމެ މޮޅު 8 ޓީމު ކުއާޓާ ފައިނަލަށް ދަތުރުކުރާ ގޮތަށެވެ. މި މުބާރާތުގެ މެޗުތައް ކުޅުމަށް ހަމަޖެހިފައިވަނީ ކޮންމެ ދުވަހަކުވެސް ހަވީރާއި ރޭގަނޑުގެ ވަގުތުތަކުގައެވެ.

މުބާރާތުގެ ފުރަތަމަ މެޗް ސެޕްޓެމްބަރު 4 ވާ ބުދަ ދުވަހުގެ ހަވީރު 16:15 ގައިކުޅުމަށް ތާވަލްކޮށްފައިވާއިރު، މި މެޗްގައި ބައްދަލުކުރާނީ ކެލާ އަދި ހަނިމާދޫއެވެ.

މި މުބާރާތަކީ އިންތިޒާމުކޮށް ތިލަދުންމަތީގެ ރަށްތަކުގެ މެދުގައި އެކުވެރިކަމާއި އެއްބައިވަންތަކަން އާލާކުރުމުގެ އިތުރުން ކުރީގެ ހުނަރުވެރި ވޮލީބޯޅަ ކުޅުންތެރިންނަށް، ވާދަވެރި އަދި އެކުވެރި މާހައުލެއްގައި އެކުޅުންތެރިންގެ ހުނަރު ދައްކާލުމުގެ ފުރުސަތު ތަނަވަސް ކޮށްދިނުމުގެ އިތުރުން ދުޅަހެޔޮ މުޖުތަމައެއް ބިނާކުރުމުގެ މަގުސަދުގައި އެ އެކަޑަމީގެ ފަރާތުން 35 އަހަރުން މަތީގެ މީހުނަށް ޚާއްސަކޮށްގެން ބާއްވާ މުބާރާތެކެވެ.