އެމެރިކާގެ ވަރުގަދަ ހަމަލާތަކެއް އީރާނަށް؛ އީރާނުން ހޯރްމުޒް ކަނޑުއޮޅި ބަންދުކޮށްފި

އެމެރިކާ ސިފައިން އީރާނުގެ އަސްކަރީ އަމާޒުތަކަށް ވަރުގަދަ ހަމަލާތަކެއް ދީފިއެވެ. އެމެރިކާއިން ބުނިގޮތުގައި މި ހަމަލާތައް ދިނީ އީރާނުން ހޯރްމުޒް ކަނޑުއޮޅި ބަންދުކޮށް، އެ ސަރަހައްދުން ދަތުރުކުރި އުޅަނދަކަށް ހަމަލާދިނުމާ ގުޅިގެންނެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހާމަކުރި ގޮތުގައި، މި ހަފުތާގެ ތެރޭގައި ތިންވަނަ ފަހަރަށް ދެވުނު މި ހަމަލާތައް އަމާޒުކުރީ އީރާނުގެ އިސްލާމިކް ރިވަލޫޝަނަރީ ގާޑް ކޯޕްސް (އައި.އާރު.ޖީ.ސީ) އިން ސައިޕްރަސްގެ ދިދަ ޖަހާފައިވާ 'އެމް.ވީ ޖީ.އެފް.އެސް ގެލެކްސީ' ނަމަކަށް ކިޔާ އުޅަނދަކަށް ހަމަލާދިނުމާ ގުޅިގެންނެވެ.

މި ހަމަލާގެ ސަބަބުން އެ އުޅަނދުގެ އިންޖީނު ރޫމަށް ބޮޑެތި ގެއްލުންތަކެއް ލިބި، ދަތުރު ނުކުރެވޭ ވަރުވެފައިވާ އިރު، އުޅަނދުގެ ފަޅުވެރިއަކު ގެއްލިފައިވާ ކަމަށް އެމެރިކާއިން ބުނެއެވެ. ޔޫ.ކޭ މެރިޓައިމް ޓްރޭޑް އޮޕަރޭޝަންސްއިން ބުނި ގޮތުގައި އުޅަނދުގެ ފަޅުވެރިންނަށް ވަނީ އުޅަނދު ދޫކޮށްލުމަށް މަޖުބޫރުވެފައެވެ.

އެމެރިކާގެ މި ހަމަލާތަކުގައުލި އީރާނުގެ 140 އަސްކަރީ އަމާޒަކަށް ހަމަލާދީފައިވެއެވެ. މީގެ ތެރޭގައި މިސައިލާއި ޑްރޯން ފޮނުވާ ސަރަހައްދުތަކާއި، މުވާސަލާތީ ނެޓްވޯކްތަކުގެ އިތުރުން އައްސޭރިފަށުގެ ފާރަވެރިވާ މަރުކަޒުތައް ހިމެނެއެވެ. އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ބުނީ، އީރާނުން ނިންމީ ނުބައި ނިންމުމެއް ކަމަށާއި، މިހާރު އޭގެ އަގު އެ ގައުމުން ދައްކަން ޖެހޭނެ ކަމަށެވެ.

މި ހަމަލާތަކަށް ރައްދުދެމުން އައި.އާރު.ޖީ.ސީ އިން ވަނީ އުރުދުންގައި ހުންނަ އެމެރިކާގެ އަސްކަރީ ބޭހަކަށް ހަމަލާދީފައެވެ. މީގެ އިތުރުން ޔޫ.އޭ.އީ، ގަތަރު، ކުވެއިތު އަދި ބަހްރޭނަށް ވެސް އީރާނުން މިސައިލާއި ޑްރޯން ހަމަލާތައް ފޮނުވާފައިވާ ކަމަށް ރިޕޯޓުތައް ބުނެއެވެ. އީރާނުން ބުނީ މިއީ ބަދަލުހިފުމުގެ "ފުރަތަމަ މަރުހަލާ" ކަމަށާއި، އުރުދުންގެ ޕްރިންސް ހަސަން އެއާ ބޭސްގެ ކޮމާންޑް ސެންޓަރާއި ޑްރޯން ހޭންގަރުތައް ހަލާކުކޮށްލާފައިވާ ކަމަށެވެ.

މި ހަމަަނުޖެހުންތައް ފެށުނީ މި ހަފުތާގެ ކުރީކޮޅު މުދާ އުފުލާ ތިން ޓޭންކަރަކަށް ހަމަލާދިނުމާ ގުޅިގެންނެވެ. އީރާނުން ބުނަމުންދަނީ ހޯރްމުޒް ކަނޑުއޮޅިން ދަތުރުކުރެވޭނީ ހަމައެކަނި އެ ގައުމުން ހުއްދަދޭ މަގަކުން ކަމަށެވެ. އީރާނުގެ ޕާލަމެންޓުގެ ރައީސް މުޙައްމަދު ބާގިރު ގާލީބާފް ވިދާޅުވީ، އެއްފަރާތުން ނިންމާ ނިންމުންތަކުގެ ޒަމާން މިހާރު މާޒީވެފައިވާ ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ އީރާނުގެ މި ހަމަލާތަކާއެކު ހަނގުރާމަ ހުއްޓާލުމުގެ އެއްބަސްވުން ނިމުމަކަށް އައިސްފައިވާ ކަމަށެވެ. ނަމަވެސް، މަޝްވަރާތައް ކުރިއަށް ގެންދިއުމަށް މެދުވެރިން މަސައްކަތް ކުރަމުންދާ ކަމަށް އޭނާ ވިދާޅުވިއެވެ.