ޣައްޒާގައި އިސްރާއީލް ސިފައިން ހިފެހެއްޓި އދ.ގެ މުވައްޒަފުން 8 ގަޑިއިރު ފަހުން ދޫކޮށްލައިފި

ޣައްޒާގައި އިސްރާއީލް ސިފައިން ހިފެހެއްޓި އދ.ގެ މުވައްޒަފުން 8 ގަޑިއިރު ފަހުން ދޫކޮށްލައިފިއެވެ.

އިސްރާއީލުގެ އަސްކަރިއްޔާއިން ޣައްޒާގައި ހުންނަ އދ.ގެ ގާފިލާއެއް ހުއްޓުވީ، އެ ވެހިކަލްތަކުގައި "ފަލަސްތީނުގެ ޝައްކުކުރެވޭ" ގިނަ ބަޔަކު ތިބި ކަމަށް ބުނެއެވެ.

ގާފިހާ ހުއްޓުވީ އެމީހުންނާ ސުވާލު ކުރުމުގެ ބޭނުމުގައި ކަމަށް އިސްރާއީލުގެ ދިފާއީ ބާރު (އައިޑީއެފް) އިން ވަނީ ބުނެފައެވެ.

އަންރުވާގެ ކޮމިޝަނަރ-ޖެނެރަލް ފިލިޕް ލަޒަރީނީ ވިދާޅުވީ މި ގާފިލާ ހުއްޓުވާފައިވަނީ ބަޑިދޮށުން، ވާދީ ޣައްޒާ ޗެކްޕޮއިންޓް ހުރަސްކުރުމަށްފަކަމަށާއި އދ.ގެ މުވައްޒަފުން ހިފަހައްޓާނެކަމުގެ އިންޒާރުވެސް ދީފައިވާ ކަމަށެވެ.

އެ ގާފިލާގައި ހިމެނެނީ ޣައްޒާ ސިޓީއާއި އުތުރު ޣައްޒާގެ ކުޑަކުދިންނަށް ޕޯލިއޯ ވެކްސިންދިނުމުގެ ކެމްޕޭނެއް ހިންގުމަށް ދަތުރުކުރި ޤައުމީ އަދި ބައިނަލްއަޤްވާމީ މުވައްޒަފުންނެވެ.

މި ހާދިސާގެ ސަބަބުން އަންގާރަ ދުވަހު އުތުރު ޣައްޒާގައި ޕޯލިއޯ ކެމްޕޭން ކުރިއަށްގެންދެވޭނެކަން ކަށަވަރުކުރެވިފައެއް ނުވާކަމަށް އޭނާ ވިދާޅުވިއެވެ. އަދި މިއީ އދ.ގެ މުވައްޒަފުންނާ ދެކޮޅަށް ހިންގާފައިވާ އެތައް ހާދިސާއެއްގެ ތެރެއިން އެންމެ ފަހުގެ ހާދިސާ ކަމަށްވެސް ވަނީ ވިދާޅުވެފައެވެ.
ލަޒަރީނީ އިތުރަށް ވިދާޅުވީ އދ.ގެ މުވައްޒަފުންނަށް އެމީހުންގެ މަސްއޫލިއްޔަތުތައް އަދާކުރުމަށް ރައްކާތެރިކަމާއެކު ފުރުޞަތު ދޭންޖެހޭނެ ކަމަށާއި، ބައިނަލްއަޤްވާމީ އިންސާނީ ޤާނޫނާ އެއްގޮތްވާ ގޮތުގެމަތިން އެމީހުން ރައްކާތެރިކުރަންޖެހޭނެ ކަމަށެވެ. އަދި މިކަން ޣައްޒާގައިވެސް ތަންފީޒުކުރަންޖެހޭނެ ކަމަށެވެ.

މި ހާތަނަށް ޣައްޒާގައި މަސައްކަތް ކުރަމުންދާ އދ.ގެ 200 އަށްވުރެ ގިނަ މީހުން ވަނީ މަރާލާފައެވެ.