އާދިއްތަ ދުވަހުން ފެށިގެން އެމެރިކާގައި ޓިކްޓޮކް ބޭނުން ކުރުން މަނާވާނެ!

މަޝްހޫރު ސޯޝަލް މީޑިއާ ޕްލެޓްފޯމް، ޓިކްޓޮކްގެ މައި ކުންފުނިން އެ އެޕް ނުވިއްކައިފިނަމަ، މި އާދަިއްތަ ދުވަހުން އެމެރިކާގައި ޓިކްޓޮކް މަނާވާނެކަމަށް އެގައުމުގެ ސުޕްރީމް ކޯޓުން ނިންމައިފިއެވެ.

މި މައްސަލައިގެ އަޑުއެހުމުގައި ބައިވެރިވި 9 ފަނޑިޔާރުންގެ އިއްތިފާގުން މިފަދައިން ނިންމި ނަމަވެސް، އެމެރިކާގެ ރައީސް، ޖޯ ބައިޑެން ވަނީ އޭނާގެ ވެރިކަމުގެ މަދު ވަގުތުކޮޅު ތެރޭގައި އެގާނޫނު ތަންފީޒު ނުކުރާނެކަމަށާއި، އެކަން ދޫކޮށްލާނީ އެމެރިކާގެ ރައީސް ކަމާއި ހަވާލުވުމަށް ހަމަޖެހިފައިވާ އިންތިހާބީ ރައީސް ޑޮނަލްޑް ޓްރަމްޕަށް ކަމަށެވެ.

ސުޕްރީމް ކޯޓުން މިފަދައިން ނިންމާފައިމިވަނީ، ވެރިކަމާއި ހަވާލުވުމަށްފަހު މި އެޕް އެމެރިކާގައި މަނާ ކުރުމާއިމެދު ގޮތެއް ނިންމުމަށްޓަކައި، ރައީސްކަމަށް ހޮވިވަޑައިގެންފައިވާ ޑޮނަލްޑް ޓްރަމްޕް ވެސް މި ގާނޫނު ތަންފީޒު ކުރުން ފަސްކުރުމަށް މަސައްކަތް ކުރައްވާފައިވަނިކޮށެވެ.

ސުޕްރީމް ކޯޓުގެ ނިންމުމާއި ގުޅިގެން އެމެރިކާގެ ވައިޓް ހައުސްއިން ނެރުނު ނޫސް ބަޔާނެއްގައި ބުނީ، އެމެރިކާގެ ރައްޔިތުންނަށް ބޭނުން ކުރެވޭ ގޮތަށް ޓިކްޓޮކް ލިބެންވާނެކަމަށާއި، އެހެން ނަމަވެސް އެމެރިކާގައި ޓިކްޓޮކް ހުއްދަ ކުރެވޭނީ ހަމައެކަނި އެމެރިކާގެ މިލްކިއްޔާތުގެ ދަށުން ނުވަތަ މި ޤާނޫނު އެކުލަވާލުމުގައި ކޮންގްރެސްއިން ފާހަގަކޮށްފައިވާ ޤައުމީ ސަލާމަތާ ގުޅޭ ކަންބޮޑުވުންތަކަށް އެޑްރެސްކުރާ އެހެން ފަރާތެއްގެ މިލްކިއްޔާތުގެ ދަށުންކަމަށެވެ.

އެމެރިކާއިން މި އެޕް މަނާކުރުމަށް ނިންމީ، އޭގެ މައި ކުންފުނިން އެމެރިކާގެ ރައްޔިތުންގެ މަޢުލޫމާތު ޗައިނާގެ ސަރުކާރަށް ދީފާނެކަމުގެ ކަންބޮޑުވުން އޮތުމުންނެވެ. މިއާއިއެކު އެ އެޕް ވިއްކުމަށް އެމެރިކާއިން ހުށަހެޅި ނަމަވެސް، ޓިކްޓޮކްގެ ވެރިފަރާތް ކަމުގައިވާ ބައިޓްޑާންސްއިން ތަކުރާރުކޮށް ބުނެފައިވަނީ އެ ސޯޝަލް މީޑިއާ ޕްލެޓްފޯމް ނުވިއްކާނެ ކަމަށެވެ.

މިއާއިއެކު، އެމެރިކާގެ 170 މިލިއަން ރައްޔިތުން ބޭނުންކުރާ މި ސޯޝަލް މީޑިއާ އެޕް، ޓްރަމްޕް ރައީސް ކަމާއި ހަވާލުވުމުގެ އެއް ދުވަސް ކުރިން އެގައުމުގައި މަނާ ކުރެވޭނެއެވެ.