އިންޑިއާ، ޖަޕާން އަނެއްކާވެސް ދިފާޢީ އިތުރު އެއްބަސްވުމަކަށް

އިންޑިއާއާއި ޖަޕާނުން ދިފާއީ ގުޅުންތައް އިތުރަށް ވަރުގަދަކުރުމުގެ ގޮތުން ކަނޑުގެ ސަލާމަތީ ކަންކަމާ ބެހޭ މުހިންމު އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގައި ސޮއިކޮށްފައިވަނީ ޖަޕާނުގެ ދިފާއީ ވަޒީރު ޝިންޖީރޯ ކޮއިޒުމީ އިންޑިއާއަށް ކުރެއްވި ރަސްމީ ދަތުރުފުޅުގައި، އިންޑިއާގެ ދިފާއީ ވަޒީރު ރާޖްނާތު ސިންހްއާއެކު ނިއު ދިއްލީގައި ބޭއްވެވި ބައްދަލުވުމުގައެވެ. އިންޑޯ-ޕެސިފިކް ސަރަހައްދުގައި ޗައިނާގެ ނުފޫޒު ގަދަވަމުންދާ ދަނޑިވަޅެއްގައި، ދެ ގައުމުގެ ދެމެދުގައި އޮތް ސްޕެޝަލް ސްޓްރެޓީޖިކް އެންޑް ގްލޯބަލް ޕާޓްނަޝިޕް އިތުރަށް ފުޅާކުރުމަކީ މި ބައްދަލުވުމުގެ އެންމެ މުހިންމު އެއް ބޭނުމެކެވެ.

މި ބައްދަލުވުމުގައި ދެ ގައުމުގެ ދިފާއީ ވަޒީރުން ވަނީ ކަނޑުގެ ސަލާމަތީ އެއްބާރުލުމާ ބެހޭ މެމޮރެންޑަމް އޮފް އެރޭންޖްމަންޓެއްގައި ސޮއިކުރައްވާފައެވެ. މި އެއްބަސްވުމުގެ ދަށުން ދެ ގައުމުގެ ކަނޑުގެ ސިފައިންގެ މެދުގައި މައުލޫމާތު ބަދަލުކުރުމާއި، ކަނޑުގެ ސަރަހައްދު ބެލެހެއްޓުމާއި، އިންސާނީ އެހީތެރިކަމާއި ކާރިސާތަކުގައި އެހީތެރިވުމުގެ ދާއިރާއިން ގުޅުން ބަދަހިކުރާނެއެވެ. މީގެ އިތުރުން ކަނޑު އަޑިގެ މައިންތައް ނައްތާލުމާއި، އުޅަނދުފަހަރު ބަނުމުގެ މަސައްކަތްތައް ގުޅިގެން ކުރިއަށްގެންދިއުމަށްވެސް ދެ ގައުމުން ވަނީ އެއްބަސްވެފައެވެ.

ދެ ގައުމުގެ ދެމެދުގައި ބޭއްވޭ "ދަރްމާ ގާޑިއަން" އާއި "ޖައިމެކްސް" ފަދަ އަސްކަރީ ތަމްރީނުތައް އިތުރަށް ފުޅާކުރުމަށް ނިންމާފައިވާއިރު، ކުރިއަށްއޮތް "ވީރު ގާޑިއަން 26" ތަމްރީނުތަކުގައި ޖަޕާނުގެ ހަނގުރާމާމަތީ މަތިންދާބޯޓުތައް ފުރަތަމަ ފަހަރަށް އިންޑިއާގައި ބައިވެރިވުމަށް ވަނީ ހަމަޖެހިފައެވެ.

ދިފާއީ ދާއިރާގެ އިތުރުން، އިގްތިސާދީ ސަލާމަތަކީވެސް މި ގުޅުމުގެ މުހިންމު ބަހާއެއްގެ ގޮތުގައި ދެ ގައުމުން ވަނީ ފާހަގަކޮށްފައެވެ. ޖަޕާނުގެ ފްރީ އެންޑް އޯޕަން އިންޑޯ-ޕެސިފިކް ތަސައްވުރާއި އިންޑިއާގެ މަހާސާގަރު އިނިޝިއޭޓިވް ގުޅިގެން ސަރަހައްދީ ސަލާމަތާއި ތަރައްގީއަށް މަސައްކަތްކުރުމަށް ދެ ގައުމުން އިސްކަންދެއެވެ.