ވާދަވެރި ކުޅުމަކަށްފަހު ފާރުފުށި ބަލިކޮށް ރީތިފަރުން ފެށުން ރަނގަޅުކޮށްފި

ރ.މިދޫގައި މިހާރު ކުރިއަށްދާ "މައިލޯ އިތާ އިންޓަރ ރިސޯޓް ވޮލީބޯޅަ ޗެންޕިއަންޝިޕް 2024" ގެ ދެވަނަ މެޗުގައި ގުރޫޕް ބީގެ އެމަރަލްޑް ފާރުފުށި ރިސޯޓް އެންޑް ސްޕާއި ރީތިފަރު ރިސޯޓް ކުޅުނު މެޗު ވާދަވެރި ކުޅުމަކަށްފަހު ތިން ސެޓް ދެ ސެޓުން މޮޅުވެ ރީތިފަރުން މުބާރާތުގެ ފެށުން ރަނގަޅުކޮށްފިއެވެ.

މެޗުގެ ފުރަތަމަ ސެޓުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މިސެޓް 24-26 ގެ ނަތީޖާއަކުން ކާމިޔާބުކުރީ ރީތިފަރު ރިސޯޓެވެ. ނަމަވެސް ޖެހިގެންއައި ދެވަނަ ސެޓުގައި ފާރުފުށިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ.

ނަތީޖާއެއްގެ ގޮތުން ދެވަނަ ސެޓު އެޓީމުން ކާމިޔާބުކުރީ 17-25 ގެ ނަތީޖާއަކުންނެވެ. އަދި ޖެހިގެންއައި ހަތަރުވަނަ ސެޓުގައި ވެސް  ފާރުފުށިން ވަނީ އިތުބާރާއެކު ކުޅެ ހަތަރު ޕޮއިންޓްގެ ފަރަގަކާއެކު 21-25 ގެ ނަތީޖާއަކުން ސެޓް ކާމިޔާބުކޮށް މެޗުގެ ލީޑު ހޯދާފައެވެ.

ނަމަވެސް ޖެހިގެންއައި ހަތަރުވަނަ ސެޓުގައި ދެޓީމުގެ ފަރާތުން އާދަޔާޚިލާފް ހިތްވަރެއް ފެނުނުއިރު، މިސެޓް 30-28 ގެ ނަތީޖާއަކުން ކާމިޔާބުކޮށް ރީތިފަރު ރިސޯޓުން ވަނީ މެޗުގެ ނަތީޖާ އެއްވަރުކޮށްފައެވެ.

މިއާއެކު މެޗުގެ ނަތީޖާ ނެރުމަށްޓަކައި ކުޅެވުނު ފަސްވަނަ ސެޓްގައި ވެސް ދެޓީމުގެ ފަރާތުން ވަރަށް ފޯރިގަދަ އަދި އެހާމެ ވާދަވެރި ކުޅުމެއް ފެނިގެންދިޔަ މި ސެޓް 12-15 ގެ ނަތީޖާއަކުން ކާމިޔާބުކުރީ ރީތިފަރު ރިސޯޓުންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ރީތިފަރުގެ ސަންދޭޝް ރާއީ އެވެ.

މި މުބާރާތަކީ މީދޫގެ ކުލަބު ޖަމުއިއްޔާއެއް ކަމަށްވާ އެކުވެރި ކްލަބުން އިންތިޒާމުކޮށް، މި އަތޮޅުގައި ހިމެނޭ ރިސޯޓްތަކަށް ހުޅުވާލައިގެން 2023 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ. އަދި މިއަހަރުގެ މުބާރާތުގައި ޖުމްލަ އަށް ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި އަށް ޓީމު ދެ ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީ ފައިނަލަށް ހޮވޭ ގޮތަށެވެ.

އެގޮތުން ގުރޫޕް އޭގައި އެންމެފަހުގެ ޗެންޕިއަން ޖޯލި ބީންގ އާއި ރަނަރަޕް ކުޑަފުށީގެ އިތުރުން ދެން ހިމެނެނީ މީދުއްޕަރު އަދި މާމުނަގައު އެވެ. އަދި ގުރޫޕް ބީގައި ހިމެނެނީ ރީތިފަރު، ފާރުފުށި، ޖޯލި މޯލްޑިވްސް އަދި ހެރިޓެންސް އާރަށެވެ.

މީގެ އިތުރުން މިމުބާރާތުގެ ޓައިޓަލް ސްޕޮންސަރ އަކަށް މައިލޯ ހަމަޖައްސާފައިވާއިރު، މުބާރާތުގެ މީޑިއާ ޕާޓްނަރަކީ ވޮއިސް ސްޕޯޓްސް އެވެ.