ޓައިވާނުގެ ރައީސް ޕަރަގުއޭއަށް، އެމެރިކާގައި ޓްރާންސިޓް ކުރައްވަފާނެ

ޓައިވާނުގެ ރައީސް ލައި ޗިންގް-ޓޭ އަންނަ މަހު ޕެރެގުއޭއަށް ވަޑައިގަންނަވާނެކަން ޕެރެގުއޭގެ ރައީސް ސެންތިއާގޯ ޕޭނާ އިއުލާންކުރައްވައިފިއެވެ.

ވެރިރަށް އެސުންސިއޯންގައި ބޭއްވި އިންވެސްޓްމަންޓް ކޮންފަރެންސެއްގައި ވާހަކަ ދައްކަވަނުން ޕޭނާ ވިދާޅުވީ 30 ދުވަހުގެ ތެރޭގައި ޓައިވާނުގެ ރައީސް ލައި އަށް މަރުހަބާ ދެންނެވުމަށް ޕެރެގުއޭ އޮތީ ތައްޔާރަށްކަމަށެވެ. ޕޭނާ މިކަން އިއުލާންކުރެއްވި ރަސްމިއްޔާތުގައި ޓައިވާނުގެ ޚާރިޖީ ވަޒީރު ލިން ޗިއަ-ލަންގް ވެސް އިންނެވިއެވެ. ޕެރެގުއޭއަކީ ޓައިވާނުގެ މިނިވަންކަން ފުރިހަމައަށް ގަބޫލުކުރާ 12 ގައުމުގެ ތެރެއިން އެއް ގައުމެވެ.

ޕެރެގުއޭގެ އިތުރުން ކެރީބިއަން ސަރަހައްދުގައި އޮންނަ ބެލީޒްއަށްވެސް ލައި ވަޑައިގަންނަވާކަމަށް އެގައުމުގެ އޮފިޝަލަކާ ހަވާލާދީ ރޮއިޓަރސްއިން ބުންޏެވެ. އެހެންނަމަވެސް އެދަތުރުގެ ތަފްސީލެއް އެއްވެސް ފަރާތަކުން ހާމައެއް ނުކުރެއެވެ.

ދެކުނު އެމެރިކާ ސަރަހައްދަށް ލައި މިކުރައްވާ ދަތުރުފުޅުގައި އެންމެ ބޮޑު ސަމާލުކަމެއް ލިބިގެންދާނީ އޭނާގެ ދަތުރުފުޅުގައި އެމެރިކާގައި ކުރައްވާ ޓްރާންސިޓަށެވެ. އެމެރިކާއިން ރަސްމީކޮށް ޓައިވާނުގެ މިނިވަންކަން ބަލައިނުގަންނާތީ، ލައި އަށް އެމެރިކާއަށް ރަސްމީ ދަތުރުފުޅެއް ނުކުރެއްވޭނެއެވެ. އެހެންނަމަވެސް ޓައިވާނުގެ ވެރިން މިގޮތަށް ކުރައްވާ ޓްރާންސިޓްގައި އެމެރިކާގެ ކޮންގްރެސްގެ ބައެއް ބޭފުޅުންނާއި، ސްޓޭޓްތަކުގެ ސަރުކާރުތަކުގެ އިސް ބޭފުޅުންނާއެކު އަބަދުވެސް 'ނުރަސްމީ' ބައްދަލުވުންތައް ބާއްވަވައެވެ. އަދި މިފަދަ ކޮންމެ ފަހަރަކު ޗައިނާއިން އެކަމާ ހިތްހަމަނުޖެހުން އިންތިހާއަށް ފާޅުކުރެއެވެ. ޗައިނާއިން ދެކޭ ގޮތުގައި ޓައިވާނަކީ އެގައުމުގެ ޕްރޮވިންސެކެވެ. އަދި ގިނަ ގައުމުތަކުން ޓައިވާނުގެ މިނިވަންކަން ބަލައިނުގަންނަނީ ޗައިނާ ރުއްސުމުގެ ގޮތުންނެވެ.

ލައި އެމެރިކާގައި ޓްރާންސިޓްކުރައްވާނެތޯ ނުވަތަ ނޫންތޯ އަދި ކަށަވަރުވެފައި ނުވާއިރު، އެމެރިކާއިން މިކަމުގައި އަދި ބަހެއް ނުބުނެއެވެ. ލައި އެމެރިކާގައި ޓްރާންސިޓްކުރައްވާނަމަ، މިއީ އެމެރިކާގެ ރައީސް ޑޮނަލްޑް ޓްރަމްޕް ދެވަނަ ދައުރަކަށް މިއަހަރު ކުރީކޮޅު ވެރިކަމަށް ވަޑައިގަތްފަހުން ޓައިވާނުގެ ރައީސަކު އެމެރިކާގައި ޓްރާންސިޓްކުރައްވާ ފުރަތަމަ ފަހަރަށް ވާނެއެވެ. މިދިޔަ އަހަރު ޕެސިފިކްގެ ބައެއް ގައުމުތަކަށް ލައި ކުރެއްވި ދަތުރުފުޅުގައި އެމެރިކާގެ ހަވައީ އަދި އެގައުމުގެ ޓެރިޓަރީއެއްކަމަށްވާ ގުއާމްގައި ޓްރާންސިޓްކުރެއްވިއެވެ.

ޓައިވާނުގެ ރައީސްގެ ރަސްމީ ދަތުރުފުޅުތަކުގެ ތަފްސީލްތައް އެގައުމުން އާއްމުކޮށް ހާމަކުރަނީ ދަތުރުފުޅުކުރައްވާ ތާރީޚު ވަރަށް ކައިރިވުމުންނެވެ.