ގަމްޕަހާ ޑިސްޓްރިކްޓުގެ މިސްކިތްތައް ތަރައްޤީކުރުމަށް ސްރީލަންކާ ސަރުކާރުން 10 މިލިއަން ރުޕީސް ދެނީ
ލިޔުންތެރިޔާ
އަބްދުﷲ ހުސައިން
ސްރީލަންކާގެ ގަމްޕަހާ ޑިސްޓްރިކްޓުގައި ހުރި މިސްކިތްތައް ތަރައްޤީކުރުމަށްޓަކައި އެ ޤައުމުގެ ސަރުކާރުން 10 މިލިއަން ރުޕީސްގެ ބަޖެޓެއް ހަމަޖައްސައިފިއެވެ.
ސްރީލަންކާގެ ކަމާ ބެހޭ ވުޒާރާއިން ބުނީ މިސްކިތްތައް ތަރައްޤީކުރުމަށް ސަރުކާރުން ފައިސާ ދިނުމަށް ނިންމާފައިވަނީ، ހާއްސަ މުނާސަބާއަކާ ގުޅިވައިގެންނެވެ. މި މަސައްކަތް ކުރިއަށް ގެންދަނީ ލަންކާގެ ކަމާބެހޭ ވުޒާރާ އާއި މުސްލިމް ދީނީ އަދި ސަގާފީ ކަންތައްތަކާ ބެހޭ ޑިޕާޓްމަންޓް ގުޅިގެންނެވެ. ދީނީ މުއައްސަސާތައް ހަރުދަނާކޮށް ޤައުމީ ފެންވަރުގައި އެކުވެރި މާޙައުލެއް ބިނާކުރުމަކީ މި އިސްނެގުމުގެ މައިގަނޑު އެއް ބޭނުމެވެ.
އެގޮތުން ލަންކާ ސަރުކާރުން ވަނީ ކީރިތި ރަސޫލާ (ﷺ) އީދުމީލާދީ ފާހަގަކުރުމުގެ ތެރެއިން "ވެލްކަމް ޓު އަވާ މޮސްކް" ގެ ނަމުގައި ސުލްޙައިގެ ހާއްސަ ހަރަކާތެއް ވެސް ރޭވިފައިވެއެވެ. އެހެން ދީންތަކުގެ މީހުންނަށް މިސްކިތަކަށް ޒިޔާރަތްކޮށް އެ ތަނުގެ ތާރީޚާއި ސަގާފަތާއި ދީނީ ޢަމަލުތައް ދެނެގަތުމުގެ ފުރުޞަތު މި ޕްރޮގްރާމުން ފަހިކޮށްދޭނެއެވެ.
ސްރީލަންކާގެ ބުއްދަ ޝާސަނާ ދީނީ އަދި ސަގާފީ ކަންތައްތަކާ ބެހޭ ވަޒީރު ވިޖިތާ ހެރަތު ފޭސްބުކް ޕޯސްޓެއްގައި ބުނީ މި ހަރަކާތުގެ ބޭނުމަކީ "އެއް ބަޔަކު އަނެއް ބަޔެއްގެ މެދުގައި ދެނެގަތުމާއި އިޙްތިރާމާއި ހެޔޮ ނިޔަތް ވަރުގަދަކޮށް ސުލްޙައިގެ ފާލަންތައް ބިނާކުރެވި އެއް ސްރީލަންކާއެއް ބައްޓަންކުރުން" ކަމަށެވެ.
މި ޕްރޮގްރާމަކީ ސްރީލަންކާގައި އެކި ދީންތަކުގެ ރައްޔިތުންގެ ދެމެދުގައި ގުޅުން ބަދަހިކުރުމަށް ސަރުކާރުން ކުރަމުންދާ މަސައްކަތުގެ ބައެއްކަމަށް އެޤައުމުގެ ސަރުކާރުން ވަނީ ބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
