ފަތުރުވެރީންނަށް ކާންދިނުމުގައި އާންމުންނަށް ނުފެންނާނެ ގޮތަށް ކަންކަން އިންތިޒާމު ކުރުމަށް ވަޒީރުގެ އިލްތިމާސް އެއް
ލޯކަލް ޓޫރިޒަމް އާއި ލޯކަލް ގެސްޓް ހައުސް ހިންގާ ރަށްރަށުގައި ރޯދަ މަހު ޓޫރިސްޓުން ކާންދިނުމުގައި ސަރުކާރުން ކަނޑައަޅާފައިވާ އުސޫލުތަކަށް އަމަލު ކުރުމަށް މިނިސްޓްރީ އޮފް ސިޓީސް އެންޑް ލޯކަލް ގަވާމަންޓް އާދަމް ޝަރީފް އުމަރު އިލްތިމާސް ކުރައްވައިފި އެވެ.
މިނިސްޓަރު މިކަމަށް އިލްތިމާސް ކުރެއްވީ އެކްސް ގައި މިއަދު ކުރެއްވި ޕޯސްޓެއްގަ އެވެ.
މިނިސްޓަރުގެ ޕޯސްޓްގައި ވިދާޅުވީ ލޯކަލް ޓޫރިޒަމް އާއި ލޯކަލް ގެސްޓް ހައުސް ހިންގާ ރަށްރަށުގައި ރޯދަ މަހު ޓޫރިސްޓުން ކާންދިނުމުގައި ސަރުކާރުން ކަނޑައަޅާފައިވާ އުސޫލުތަކާއި މިންގަނޑުތަކާ އެއްގޮތަށް، އާންމުންނަށް ނުފެންނާނެ ގޮތަކަށް ހިދުމަތް ދިނުމަށް ހާއްސަ ސަމާލުކަމެއް ދެއްވުމަށް އިލްތިމާސް ކުރައްވާ ކަމަށެވެ.
ރާއްޖޭގެ ވަރަށް ގިނަ ރަށްތަކެއްގައި މިހާރު ގެސްޓް ހައުސްތައް ހިންގަ އެވެ. ބައެއް ރަށްރަށުގައި ވަރަށް ފުޅާ ދާއިރާއެއް ގައި އެ ހިދުމަތް ދެ އެވެ. ރަށުގެ އާބާދީއަށް ވުރެ ޓޫރިސްޓުން ގިނަ ރަށްތައް ވެސް ހުރެ އެވެ.
ބައެއް ރަށްރަށުގައި އުސޫލާއި މުޅީން ހިލާފަށް ފަތުރުވެރިންނަށް ހިދުމަތް ދިނުމާއި އުސޫލާއި ހިލާފަށް ފަތުރުވެރީން އުޅޭ މައްސަލަ ބޮޑެވެ. ރޯދަ މަހު ދުވާލު އާންމުންނަށް ފެންނާނެހެން ކެެެއިން ބުއިމުގެ ކަންކަން އިންތިޒާމުކޮށްފައި ހުރުމާއި ނިވާކަން ކުޑަކޮށް ހެދުން އަޅައިގެން އާންމުންގެ ތެރޭގައި އުޅުމާއި އާންމުންނަށް ހާއްސަ ބީޗުތަކުގައި ޓޫރިސްޓުން ތިބުން ފަދަ މައްސަލަތައް ކުރިމަތިވެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
