ފޯޑަންގެ ލަނޑުތަކާއެކު ސިޓީން ޑޯޓްމަންޑް ބަލިކޮށްފި

ޔުއެފާ ޗެމްޕިއަންސްލީގްގައި ރޭ އިނގިރޭސިވިލާތުގެ މެންޗެސްޓަރ ސިޓީ އާއި ޖަރުމަނުވިލާތުގެ ބޮރޫޝިއާ ޑޯޓްމުންޑް ބައްދަލުކުރިމެޗް މެންޗެސްޓަރ ސިޓީ ކާމިޔާބުކޮށްފިއެވެ.

ސިޓީގެ އިއްތިހާދު ސްޓޭޑިއަމްގައި ކުޅުނު މިމެޗް ޑޯޓްމުންޑުގެ މައްޗަށް އެޓީމް ކުރި ހޯދީ 1-4 ގެ ނަތީޖާއަކުންނެވެ. މިމެޗްގައި ސިޓީގެ ތަރިއަކަށްވީ ފޯޑަން އެވެ. މެޗްގައި އޭނާ ވަނީ ދެ ލަނޑު ޖަހާ ފޯމްގައި ހުރިކަން ދައްކުވައިދީފައެވެ.

މެޗްގައި ފެނިގެންދިޔަ ފުރަތަމަ ލަނޑު ފޯޑަން ޖަހާފައިވަނީ 22 ވަނަ މިނެޓް ތެރޭގައެވެ. ފޯޑަން ލަނޑެއް ޖަހައި ސިޓީއަށް ލީޑް ނަގައިދީފައިވަނިކޮށް އޭގެ 6 މިނެޓް ފަހުން ހާލާންޑް ވަނީ އިތުރު ލަނޑެއް ޖަހައި މެޗްގެ ލީޑް ފުޅާކޮށްދީފައެވެ. މެޗްގައި ފޯޑަން ދެވަނަ ލަނޑު ޖަހާފައިވަނީ ދެވަނަ ހާފްގެ ކުރީކޮޅުގައެވެ.

ފޯޑަން ލަނޑެއް ޖަހައި ތަފާތުބޮޑުކޮށްފައިވަނިކޮށް ޑޯޓްމުންޑުގެ އަންޓޮން ވަނީ 72 ވަނަ މިނެޓް ތެރޭގައި ލަނޑެއް ކާމިޔާބުކޮށް މެޗްގެ ނަތީޖާ 3-1 އަށް ބަދަލުކޮށްފައެވެ. މެޗްގައި ސިޓީގެ ހަތަރުވަނަ ލަނޑު ކާމިޔާބުކޮށްދިނީ ރަޔާން ޗަރކީ އެވެ.

މެޗަށްފަހު ވާހަކަދައްކަމުން ސިޓީގެ ކޯޗް ޕެޕް ގާޑިއޯލާ ވަނީ ފޯޑަންގެ އެނބުރިއައުން ފާހަގަކޮށް ވާހަކަދައްކާފައެވެ.

ޔުއެފާ ޗެމްޕިއަންސްލީގްގައި ރޭ އިނގިރޭސިވިލާތުގެ ނިއުކާސަލް ޔުނިޓެޑާ، ސްޕެއިންގެ އެތްލެޓިކް ކްލަބް ބައްދަލުކުރިމެޗް 0-2 ގެ ނަތީޖާއަކުން ކާމިޔާބުކުރީ ނިއުކާސަލް އެވެ.