ވިއްސާރަ ވުމުގެ ސަބަބުން ރޭ ކުޅެން އޮތް ތިން މެޗު ހުކުރު ދުވަހުގެ ރެއަށް ރީޝެޑިއުލް ކޮއްފި

ވިލިމާލޭގައި މިހާރު ކުރިއަށްދާ "އޮބިއަން ޓީއެފްޓީ 11 ވަނަ ރަމަޟާން ފުޓްސަލް ޗެލެންޖު 2024" ގައި ބުރާސްފަތި ދުވަހުގެ ރޭ ކުޅެން ތާވަލުކޮށްފައި އޮތް ތިން މެޗު ވިއްސާރަ ވުމުގެ ސަބަބުން ކުރިއަށް ނުގެންދެވި، ހުކުރުދުވަހުގެ ރެއަށް ރީޝެޑިއުލް ކޮއްފިއެވެ.

މިއާއެކު މިރޭ 21:00 ގައި ކުޅޭވޭ ފުރަތަަމަ މެޗުގައި ގުރޫޕް ޖީގެ ކުލަބު ލިއޮންސް އާއި ބީޖީ ސްޕޯޓްސް ކުލަބު ވާދަކުރަން ހަމަޖެހިފައިވާއިރު، މިދެޓީމު ވެސް ވަނީ މުބާރާތުގެ ދެވަނަ ބުރުގެ ޖާގައެއް ކަށަވަރުކޮށްފައެވެ. އަދި މިމެޗުގެ ނަތީޖާއާއެކު ގުރޫޕް ޖީގެ އެއްވަނަ ލިބޭ ޓީމެއް ކަށަވަރުވެގެންދާނެއެވެ.

މިރޭ 22:00 ގައި ކުޅެވޭ ދެވަނަ މެޗުގައި ވާދަކުރާނީ ގުރޫޕް އެޗްގެ އެލްކިއު ލުއްޗާޒް އާއި އެފްސީ ފައިގެތަޅާ އެވެ. އަދި މިރޭ 23:00 ގައި ފަށާ މެޗުގައި ވާދަކުރާނީ ގުރޫޕް އެޗްގެ ވައިޑީ ސްޕޯޓްސް ކުލަބާއި ވިލުފުށި އެފްޓީ އެވެ. އަދި މިގުރޫޕް އެއްވަނަ އަދި ދެވަނަ ކަނޑައެޅިގެން ދާނީ މިދެމެޗުގެ ނަތީޖާއަށް ފަހުއެވެ.

ޗެންޕިއަން ޓީމަށް 50,000 އަދި ރަނަރަޕް ޓީމަށް 30,000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު 32 ޓީމަކުން ބައިވެރިވެފައިވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 32 ޓީމު 8 ގުރޫޕަކަށް ބަހާލައިގެންނެވެ.

މިމުބާރާތުގެ މެއިން ސްޕޮންސަރ އަކީ އޮބިއަން އެވެ. އަދި މުބާރާތުގެ މީޑިއާ ޕާޓްނަރަކަށް ހަމަޖައްސާފައި ވޮއިސް އެވެ.