ފެލިދޫ ބަލިކޮށް ކެޔޮދޫ އިން އަތޮޅު ޗެންޕިއަންކަން ހޯދައިފި

ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް "ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2024" ވ. އަތޮޅު އަތޮޅު ފައިނަލުގެ ދެވަނަ ލެގުގައި އަންގާރަދުވަހުގެ ރޭ ފެލިދޫ އާއި ކެޔޮދޫ ވާދަކުރި މެޗު ވާދަވެރި ކުޅުމަކަށްފަހު 2-1 ގެ ނަތީޖާއަކުން ކާމިޔާބުކޮށް ކެޔޮދޫ އިން އަތޮޅު ޗެންޕިއަންކަން ހޯދައިފިއެވެ.

މިއަހަރުގެ ގޯލްޑަން ފުޓްސަލް ޗެލެންޖުގައި ޖުމްލަ 129 ޓީމު ބައިވެރިވެފައިވާއިރު، މުބާރާތުގައި 320 މެޗު ކުޅުމަށް ވަނީ ހަމަޖެހިފައެވެ. އަދި މިއަހަރުގެ މުބާރާތުގައި ވ. އަތޮޅުން ދެޓީމް ބައިވެރިވުމާއެކު އަތޮޅު ޗެންޕިއަންކަން ކަނޑައެޅީ ބައިވެރިވި ދެޓީމުގެ މެދުގައި ދެމެޗު ކުޅެ، ދެ މެޗުގެ އެގްރިގޭޓުން ނަތީޖާ އިންނެވެ.

އެގޮތުން މިދެޓީމުގެ މެދުގައި ކުޅެވުނު އަތޮޅު ފައިނަލުގެ ފުރަތަަމަ ލެގް ކެޔޮދޫ އިން ކާމިޔާބުކުރީ 5-2 ގެ ނަތީޖާއަކުންނެވެ. އަދި ދެވަނަ ލެގުގެ ނަތީޖާއާއެކު ކެޔޮދޫ އިން އަތޮޅު ޗެންޕިއަންކަން ހޯދީ 7-3 ގެ އެގްރިގޭޓް ނަތީޖާއަކުންނެވެ.

ހުޅުމާލޭ ރެހެންދި ދެ ނަންބަރު ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފުގައި ކެޔޮދޫ އިން ދެލަނޑުގެ ލީޑެއް ހޯދި އިރު، އެޓީމުގެ ފުރަތަމަ ލަނޑު މެޗުގެ 16 ވަނަ މިނެޓުގައި ކާމިޔާބުކޮށްދިނީ އަހުމަދު ރަޝީދު އެވެ. އަދި އޭގެ ދެ މިނެޓު ފަހުން އެޓީމުގެ ލީޑު ފުޅާކޮށްދިނީ އިބްރާހިމް ފުއާދު އެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ކެޔޮދޫ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެލިދޫ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގެ 28 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ތޯއިފް އަހުމަދު ފިރާގު އެވެ.

މީގެ އިތުރުން ވެސް މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-1 ގެ ނަތީޖާއަކުން ކެޔޮދޫ ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ކެޔޮދޫގެ އަހުމަދު ރަޝީދު އެވެ. އަދި މީގެ އިތުރުން މުބާރަތުގެ އެންމެ ގިނަ ލަނޑުޖެހި ކުޅުންތެރިޔާގެ މަގާމާއި އެންމެ މޮޅު ކުޅުންތެރިއާގެ މަޤާމު ވެސް ހޯދީ ކެޔޮދޫގެ އަހުމަދު ރަޝީދު އެވެ.