22 ސްޕޯޓްސް ކުލަބުން ހޯރަފުށީގައި ހޭންޑްބޯލް ކޯޗިން ކޭމްޕެއް ބާއްވަނީ

22 ސްޕޯޓްސް ކުލަބުގެ ފަރާތުން އިންތިޒާމްކޮށްގެން 01 މާރިޗު 2024 އިން 06 މާރިޗު 2024 އަށް ހއ. ހޯރަފުށީގައި ހޭންޑްބޯލް ކޯޗިން ކޭމްޕެއް ހިންގުމަށް ތައްޔާރުވަމުން އަންނަކަމަށް އެކުލަބުން ބުނެފިއެވެ.

22 ސްޕޯޓްސް ކުލަބުގެ ފަރާތުން ވޮއިސްއަށް މައުލޫމާތު ދިންގޮތުގައި ކަނބަލުންނަށް ޚާއްޞަކޮށްގެން ބޭއްވޭ މި ކޭމްޕަކީ ހޯރަފުށީގެ ކައުންސިލްގެ އިތުރުން އެރަށުގެ ޔޫތު ސެންޓަރާއި ގުޅިގެން ކުރިއަށް ގެންދިއުމަށް ހަމަޖެހިފައިވާ ކޭމްޕެކެވެ.

މީގެއިތުރުން މިކޭމްޕް ކުރިއަށް ގެންދިއުމުގައި ބޭނުންވާ ޓެކްނިކަލް ސަޕޯޓް ހއ. ދިއްދޫގެ ކުޅިވަރު އެކަޑަމީ އެއްކަމަށްވާ "ފަތޯ އެކަޑަމީ"ގެ ފަރާތުން ލިބިގެންދާނެކަމަށް އެކުލަބުން ބުނެފައިވެ އެވެ. އެގޮތުން މި ކޯޗިންގ ކޭމްޕުގައި މުދައްރިބެއްގެ ގޮތުގައި ކިޔާވާދެއްވާނީ ފަތޯ އެކަޑަމީގެ ހެޑް ކޯޗު އަދި ތަޖުރިބާކާރު ހޭންޑްބޯލް އިންސްޓްރަކްޓަރު ފަތުހުﷲ ޖަމީލް އެވެ. އަދި މީގެ އިތުރުން ފަތުހުﷲ ޖަމީލް އަކީ ތަޖުރިބާކާރު ހޭންޑްބޯލް ރެފްރީ އެވެ.

މި ކޭމްޕާއި ބެހޭގޮތުން ފަތުހުﷲ ޖަމީލް ވޮއިސްއަށް މައުލޫމާތު ދެމުން ވިދާޅުވީ މި ކޭމްޕްގައި ޕްރެކްޓިކަލް ކުލާސްތަކުގެ އިތުރުން ތިއެރީ ކުލާސްތަކެއް ވެސް ކުރިއަށް ގެންދާނެ ކަމަށާއި، ޖުމްލަކޮށް މި ޕްރޮގްރާމްގެ ތެރެއިިން ހޭންޑްބޯޅައިގެ އެޑްވާންސް ހުނަރު ތައް ބައިވެރިންނަށް ދަސްކޮށްދެވޭނެ ކަމަށެވެ.