ދިވެހި ޕްރިމިއާ ލީގް: ގައްދޫ އަތުން އީގަލްސް އަށް މޮޅެއް

މިހާރު ކުރިއަށްދާ ދިރާގް ދިވެހި ޕްރިމިއާ ލީގުގައި މިއަދު ހަވީރު ގައްދޫ ރިކްރިއޭޝަން ކްލަބާއި ކްލަބް އީގަލްސް ބައްދަލުކުރި މެޗު، 2-0 ގެ ނަތީޖާއަކުން އީގަލްސް ކާމިޔާބުކޮށްފިއެވެ.

ގައްދޫގައި ކުޅުނު ފޯރިގަދަ މި މެޗުގައި ފެނިގެންދިޔަ ދެ ގޯލުވެސް ޖަހާފައިވަނީ މެޗުގެ ދެވަނަ ހާފުގައެވެ. ފުރަތަމަ ހާފުގައި ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔަ ނަމަވެސް، އެއްވެސް ޓީމަކަށް ލަނޑެއް ޖެހިފައެއް ނުވެއެވެ.

ދެވަނަ ހާފު ފެށިގެން އީގަލްސް އިން އެޓޭކުތައް ވަރުގަދަކުރި އިރު، މެޗުގެ ފުރަތަމަ ގޯލު ޖަހައި މެހެމާނުންނަށް ލީޑު ނަގައިދިނީ ތަޖުރިބާކާރު ކުޅުންތެރިޔާ އިސްމާއިލް އީސަ (މެސީ) އެވެ. އަދި މެޗު ނިމެން ކައިރިވެފައިވަނިކޮށް، އީގަލްސްގެ ދެވަނަ ގޯލު ކާމިޔާބުކޮށްދީ ޓީމަށް ތިން ޕޮއިންޓް ކަށަވަރުކޮށްދިނީ ޖައިލަމް އެވެ.

މިއީ މި ފަހަރުގެ ލީގުގައި އީގަލްސް ހޯދި ދެވަނަ މޮޅެވެ. އެ ޓީމު މީގެ ކުރިން މޮޅުވެފައިވަނީ ބިސްބުރު ސްޕޯޓްސް ކްލަބާ ވާދަކުރި މެޗުންނެވެ.

މި މެޗުން ބަލިވުމާއެކު، ލީގުގައި އަދި މިހާތަނަށް ގައްދޫ ކުޅުނު އެއްވެސް މެޗަކުން އެ ޓީމަށް މޮޅެއް ލިބިފައެއް ނުވެއެވެ. މީގެ ކުރިން ނިއުރޭޑިއަންޓް ސްޕޯޓްސް ކްލަބާއި ޓީސީ ސްޕޯޓްސް ކްލަބާ ދެކޮޅަށް ގައްދޫ ކުޅުނު މެޗުތަކުންވެސް އެ ޓީމު ވަނީ ބަލިވެފައެވެ.