ދިވެހި ވަޠަނީ ޚިދުމަތް: ޤައުމީ ޖީލެއް ބިނާކުރުމުގެ ކާމިޔާބު އެއް އަހަރު

"ދިވެހި ވަޠަނީ ޚިދުމަތުގެ ޕްރޮގްރާމް" އަކީ ފަހުގެ ތާރީޚެއްގައި ދިވެހި ދައުލަތުން އިސްނަގައިގެން ކުރިއަށްގެންދިޔަ ހަރަކާތްތަކުގެ ތެރެއިން، ރައްޔިތުންގެ އެންމެ ބޮޑު ތަރުޙީބަކާއި އެއްބާރުލުމެއް ލިބިގެންދިޔަ އެއް މަޝްރޫޢެވެ. މިއީ ސިޔާސީ އެންމެހައި ފިކުރުތަކުން އެއްކިބާވެ، ޤައުމީ ލޯތްބާއި އެއްބައިވަންތަކަމުގެ މަތިވެރި ބިންގަލުގެ މައްޗަށް އެކުލަވާލާފައިވާ މުހިންމު ޕްރޮގްރާމެކެވެ. ޒަމާނަށް އަންނަމުންދާ ބަދަލުތަކާއެކު ޒުވާނުންނާއި ފުރާވަރުގެ ކުދިންގެ ދިރިއުޅުމުގެ ވައްޓަފާޅިއަށް އައިސްފައިވާ ބަދަލުތަކާ ގުޅިގެން، މަސައްކަތުގެ ޢަމަލީ މައިދާނަށް އަހުލުވެރި، އަޚްލާޤު ރަނގަޅު ޖީލެއް ބިނާކުރުމުގެ ބޭނުންތެރިކަން ދިވެހި މުޖުތަމަޢަށް އޮތީ އިންތިހާއަށް ޖެހިފައެވެ.

ދިވެހި ޤައުމިއްޔަތަށް ލޯބިކުރާ، މާތްވެގެންވާ އިސްލާމްދީނުގެ މަތިވެރި އުޞޫލުތަކުގައި ސާބިތުވެތިބޭ، އަދި ޖިސްމާނީ، ނަފްސާނީ އަދި ރޫޙާނީ ގޮތުން ދުޅަހެޔޮ ޒިންމާދާރު ޖީލެއް ބިނާކުރެއްވުމުގެ މަޤްޞަދުގައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިސްނަންގަވައިގެން މި ޚިދުމަތް ރަސްމީކޮށް އިފްތިތާޙްކޮށްދެއްވީ 2025 އޮކްޓޫބަރު 01 ގައި، އެމް.އެން.ޑީ.އެފް ކޮމްޕޮސިޓް ޓްރޭނިންގ ސެންޓަރ (ޅ. މާފިލާފުށި) ގައެވެ. މިއަދު މި ޚިދުމަތަށް ކާމިޔާބު އެއް އަހަރު ފުރިހަމަވެގެން ގޮސްފައިވާއިރު، މިއީ ޤައުމުގެ ތަރައްޤީއަށާއި ޒުވާނުން ބާރުވެރިކުރުވުމަށް އެޅުނު ވަރުގަދަ ބިންގަލެކެވެ.

މި ޕްރޮގްރާމުގެ ދަށުން މައިގަނޑު ދެ ދާއިރާއަކުން ވަނީ ބައިވެރިންނަށް ތަމްރީން ދީފައެވެ. އެއީ ޅ. މާފިލާފުށީގައި ހިންގުނު "ނޭޝަނަލް ސަރވިސް އިނީޝަލް ޓްރޭނިންގ" އާއި، ބ. ކިހާދޫގައި ހިންގުނު "ނޭޝަނަލް ސަރވިސް ސްކިލް ޓްރޭނިންގ" އެވެ. ވަތަނީ ޕްރޮގްރާމްގެ ތިން ބެޗެއްގައި މިހާތަނަށް ތަމްރީނު ފެށި 1,117 ކުދިންގެ ތެރެއިން 1,091 ކުދިން ވަނީ ކާމިޔާބުކަމާއެކު ދަސްވިފައެވެ. މީގެ ތެރޭގައި ހިމެނެނީ ފިރިހެން890 ދަރިވަރުންނާއި އަންހެން 201 އަންހެން ދަރިވަރުންނެވެ. މި ޕްރޮގްރާމްގައި ރާއްޖޭގެ 20 އަތޮޅަކުން ޒުވާނުން ބައިވެރިވިއެވެ. ދަސްވެނިވުނު ދަރިވަރުންނަށް ދައުލަތުގެ ކަމާބެހޭ އިދާރާތަކުން ވަޒީފާގެ ފުރުސަތުތައް ފަހިކޮށްދެމުން އަންނަކަންވެސް ފާަހަގަކޮށްލެވެއެވެ

ވަތަނީ ހިދުމަތުގެ ތެރެއިން ނިކުތް ކުދިންނަށް ވަޒީފާގެ ފުރުސަތު؛

ވަޠަނީ ޚިދުމަތުގެ ޕްރޮގްރާމް ކާމިޔާބުކަމާއެކު ނިންމައި، ވަޒީފާއަށް ކުރިމަތިލި 543 ބައިވެރިންގެ ތެރެއިން 402 ފަރާތަކަށް، 30 ސެޕްޓެމްބަރު 2026 ގެ ނިޔަލަށް އެކި މުއައްސަސާތަކާއި ކުންފުނިތަކުން ވަނީ ވަޒީފާގެ ފުރުޞަތު ހަމަޖައްސައިދެވިފައެވެ. މީގެ ތެރޭގައި ހިމެނެނީ އެމް.އެން.ޑީ.އެފާއި، ފުލުހުންގެ ހިދުމަތުގެ އިތުރުންއޭވިއޭޝަން ސެކިއުރިޓީ ކޮމާންޑެވެ

- އެމް.އެން.ޑީ.އެފަށް: 300 ބައިވެރިން

- ދިވެހި ފުލުހުންގެ ޚިދުމަތަށް: 58 ބައިވެރިން

- އޭވިއޭޝަން ސެކިއުރިޓީއަށް: 23 ބައިވެރިން

އިޖުތިމާޢީ އަދި އިޤްތިޞާދީ ނަތީޖާ

މި ޕްރޮގްރާމުގެ ސަބަބުން ޒުވާނުންގެ ދިރިއުޅުމުގެ ވައްޓަފާޅިއަށް އީޖާބީ ބޮޑެތި ބަދަލުތަކެއް އައިސްފައިވާކަން ބެލެނިވެރިން ފާހަގަކުރެއެވެ. ޚާއްޞަކޮށް ވަގުތަށް ކަމޭހިތުމާއި، ދީނީ ކަންކަމަށް ދޭ އަހައްމިއްޔަތުކަން އިތުރުވެ، ޒިންމާދާރު ބަޔަކަށް ޒުވާނުން ވަނީ ވެފައެވެ. އާއިލާތަކަށް ކުރިމަތިވާ މާލީ ދަތިތަކަށް ލުޔެއް ލިބުމުގެ އިތުރުން، ބައިވެރިންގެ އާއިލާތަކަށް އެމް.އެން.ޑީ.އެފް މެދުވެރިކޮށް ޞިއްޙީ އިންޝުއަރެންސް ލިބިގެންދިއުމަކީ މި މަޝްރޫޢުން ލިބުނު ބޮޑު ކުރިއެރުމެކެވެ.

ކުރިއަށް އޮތީ ކޮންކަންތައްތަކެއް؟

2026 ވަނަ އަހަރުގެ އޮކްޓޫބަރު މަހު މި ޕްރޮގްރާމުގެ އިތުރު ބެޗުތައް ފެށުމަށް ވަނީ ތާވަލުކުރެވިފައެވެ. ސަރުކާރުގެ އަމާޒަކީ މި ޚިދުމަތުގެ ތެރެއަށް ފަންނީ އައު ދާއިރާތަކާއި އިންޓަރންޝިޕް ފުރުޞަތުތައް ތަޢާރަފްކޮށް، "ނޭޝަނަލް ކެރިއަރ ސަރވިސް" މެދުވެރިކޮށް ޒުވާނުންނަށް ވަޒީފާގެ ފުރުޞަތުތައް އިތުރަށް ފަހިކޮށްދިނުމެވެ.

ނިންމުންވޭތުވެދިޔަ އެއް އަހަރު ދުވަހަކީ "ދިވެހި ވަޠަނީ ޚިދުމަތް" މުޖުތަމަޢުގައި ބަލައިގަނެވި، އޭގެ ނަތީޖާ ފެނިގެންދިޔަ އަހަރެކެވެ. މިއީ ޤައުމަށް ވަފާތެރި، ހުނަރުވެރި ޖީލެއް ބިނާކުރުމަށް އެޅުނު ވަރުގަދަ ބިންގަލެކެވެ. މިކަމާ ގުޅޭގޮތުން ރައީސް ޑރ.މުއިއްޒު މިއަދު ވަނީ  ނޭޝަނަލް ސަރވިސްގެ ތެރެއަށް ފަންނީ އިތުރު ދާއިރާތައް ތަޢާރަފްކުރައްވާނޭކަމަށް ވިދާޅުވެފައެވެ.

މި ޚިދުމަތަށް މިއަދު އެއް އަހަރު ފުރުމާއި ގުޅިގެން ރައީސް މުޢިއްޒު އެކްސްގައި ކުރެއްވި މި ޕޯސްޓުގައި ވަނީ ކުރިއަށް އޮތް ތަނުގައި މި ޚިދުމަތުގެ ތެރެއަށް ފަންނީ އައު ދާއިރާތަކާއި އިންޓަރންޝިޕް ޕްރޮގްރާމްތައް ތަޢާރަފްކުރެވޭނެ ކަމަށެވެ. އަދި ތަމްރީނު ފުރިހަމަކުރާ ޒުވާނުންނަށް ވަޒީފާގެ ފުރުޞަތުތައް ފަހިކޮށްދިނުމަށްޓަކައި، ނޭޝަނަލް ކެރިއަރ ސަރވިސްގެ ދައުރު ފުޅާކުރުމަކީވެސް ސަރުކާރުގެ މުހިންމު އަމާޒެއް ކަމުގައި ރައީސް ވިދާޅުވިއެވެ.

ވޭތުވެދިޔަ އެއް އަހަރު ދުވަހުގެ ތެރޭގައި "ދިވެހި ވަޠަނީ ޚިދުމަތް" ވެގެން ގޮސްފައިވަނީ ދިވެހި ޒުވާނުންގެ ވިސްނުމަށާއި ދިރިއުޅުމަށް އިންޤިލާބީ ހެޔޮ ބަދަލުތަކެއް ގެނެސްދިން، ނަތީޖާ ފެންނަމުންދާ ކާމިޔާބު ޕްރޮގްރާމަކަށެވެ. ޤައުމަށް ދިމާވާ ކޮންމެ ކަމެއްގައި ސާބިތުކަމާއެކު ކުރިމަތިލާނެ، ހުނަރުވެރި، ދީނާއި ޤައުމިއްޔަތަށް ލޯބިކުރާ ޒުވާން ޖީލެއް ބިނާކުރުމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ފެއްޓެވި މި ޤައުމީ މަސައްކަތްޕުޅަކީ މުޅި ދިވެހިރާއްޖޭގެ މުސްތަޤްބަލް އުޖާލާކޮށްދޭނޭ އަގުހުރި މަޝްރޫޢެއްކަމަށް ގިނަ ބަޔަކު ދެކެއެވެ.