ފަސޭހަކަމާއި އެކު ހޭވައްލާ ބަލިކޮށް ބޭރިއަންސް އިން ޗެންޕިއަންކަން ހޯދައިފި

ރ.އަތޮޅު ކިނޮޅަސްގައި މިހާރު ކުރިއަށްދާ "23 ވަނަ ޖަމިއްޔަތުލް އިއްތިހާދު ވޮލީބޯޅަ ޓޯނަމަންޓް 2024" ގެ ފައިނަލުގައި ފަސޭހަކަމާއި އެކު ސީދާ ތިން ސެޓުން ހޭވައްލާ ބަލިކޮށް ބޭރިއަންސް އިން މުބާރާތްގެ ޗެންޕިއަންކަން ހޯދައިފި އެވެ.

ހޮނިހިރު ދުވަހުގެ ރޭ ކުޅެވުނު ފައިނަލް މެޗު ޝަރަފުވެރިކޮށްދެއްވީ ސްޕޯޓްސް ފިޓްނަސް އެންޑް ރެކްރިއޭޝަން މިނިސްޓަރު ޑރ އަބްދުﷲ ރާފިއު އެވެ.

26 ޖެނުއަރީ 2024 އިން 03 ފެބުރުއަރީ 2024 ގެ ނިޔަލަށް ކުރިޔަށް ގެންދިޔަ މިއަހަރުގެ މުބާރާތުގައި ހަތަރު ޓީމަކުން ބައިވެރިވިއިރު، މުބާރާތް ކުރިއަށް ގެންގޮސްފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާ އެއްމެޗު ކުޅެ އެންމެ ގިނަ ޕޮއިންޓް ހޯދާ ޓީމަކަށް ސީދާ ފައިނަލުން ޖާގަ ލިބޭގޮތަށެވެ. އަދި ފައިނަލުގެ ދެވަނަ ކަނޑައެޅުމަށް ލީގުބުގެ ދެވަނަ ޓީމާއި ތިންވަނަ ޓީމުގެ މެދުގައި ވަނީ ޕްލޭއޮފް މެޗެއް ކުޅެފައެވެ.

މުބާރާތުގެ ލީގު ބުރުގެ އެއްވަަނަ ޓީމުގެ ގޮތުގައި ހޭވައްލާ އިން ފައިނަލުގެ ޖާގަ ހޯދިއިރު، މިދެޓީމު ލީގު ބުރުގައި ކުޅުނު މެޗު ހޭވައްލާ އިން ކާމިޔާބުކުރީ ތިން ސެޓު އެއް ސެޓުންނެވެ. އަދި ބޭރިއަންސް ފައިނަލުން ޖާގަ ހޯދީ ލީގު ބުރުގެ ދެވަނަ ޓީމާއި ތިންވަނަ ޓީމުގެ މެދުގައި ކުޅެވުނު ޕްލޭއޮފް މެޗުގައި ފަސޭހަކަމާއި އެކު ސީދާ ތިން ސެޓުން ކޯކޯ ބަލިކުރުމަށްފަހު އެވެ.

ފައިނަލް މެޗުގެ ފުރަތަަމަ ސެޓު ފަސޭހަކަމާއި އެކު 17-25 އިން ބޭރިއަންސް އިން ކާމިޔާބުކުރިއިރު، ވާދަވެރި ކުޅުމަކަށްފަހު ދެވަނަ ސެޓް އެޓީމުން ކާމިޔާބުކުރީ 21-25 އިންނެވެ. އަދި މެޗުގެ ތިންވަނަ ސެޓްގައި ބޭރިއަންސްގެ ފަރާތުން ތަފާތު މޮޅު ކުޅުމެއް ފެނިގެންދިޔަ މިސެޓް އެޓީމުން ކާމިޔާބުކުރީ ވަރަށް ފަސޭހަކަމާއި އެކު 12-25 އިންނެވެ.

މިއަހަރުގެ މުބާރާތުގެ އެންމެ މޮޅު 6 ކުޅުންތެރިންނަކީ އާދަމް ނަސީމް (ބޭރިއަންސް), އިބްރާހިމް ފަޒީލު (ބޭރިއަންސް), ހަސަން ސަމީހް (ބޭރިއަންސް), މުހައްމަދު ރިމާޒު (ހޭވައްލާ), ހުސެއިން ރަޒާން (ހޭވައްލާ) އަދި އަހުމަދު ފާޒިލް (ރަށްގުޑުވާ) އެވެ.

މުބާރާތުގެ އެންމެ މޮޅު ލިބަރޯއަކަށް ހޭވައްލާ ޓީމުގެ ހުސެއިން ސާހް ހޮވުނުއިރު، އެންމެ އުންމީދީ ކުޅުންތެރިއަކަށް ހޮވުނީ އަހުމަދު ޝަމްވީލް އެވެ. އަދި މުބާރަތުގެ ހުރިހާ ގޮތަކުން އެންމެ މޮޅު ކުޅުންތެރިޔަކަށް ހޮވުނީ ބޭރިއަންސްގެ އިބްރާހިމް ފަޒީލު އެވެ.