އިސްރާއީލުން ޑިޕްލޮމަސީ ނައްތާލުމަށް އެމެރިކާއިން ފުރުޞަތު ދިނުމަކީ މޮޔަކަމެއް: އީރާން

ލުބުނާނުގައި އިސްރާއީލުން ދެމުންދާ ވަރުގަދަ ހަމަލާތަކުގެ ސަބަބުން ސަރަޙައްދީ ހަމަޖެހުމަށް ހުރަސްއެޅިފައިވާއިރު، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ޑިޕްލޮމަސީ ނައްތާލުމަށް އެމެރިކާއިން ފުރުޞަތު ދިނުމަކީ "މޮޔަ" ކަމެއް ކަމަށް އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވެއްޖެއެވެ.

އިއްޔެ ސޯޝަލް މީޑިއާގައި ކުރެއްވި ޕޯސްޓެއްގައި އަރަގްޗީ ފާހަގަކުރެއްވި ގޮތުގައި، ނަތަންޔާހޫގެ މައްޗަށް އުފުލާފައިވާ ކޮރަޕްޝަނުގެ ދަޢުވާތަކުގެ ޝަރީޢަތް އަންނަ އާދީއްތަ ދުވަހު އަލުން ފެށޭނެއެވެ. އޭނާ ވިދާޅުވީ، ލުބުނާން ހިމެނޭހެން މުޅި ސަރަޙައްދަށް އަންނަ ސުލްހައެއްގެ ސަބަބުން ނަތަންޔާހޫ ޖަލަށް ދިއުން އަވަސްވެގެންދާނެ ކަމަށާއި، ހަނގުރާމަ ކުރިއަށް ގެންދިއުމުގެ ފަހަތުގައި އަމިއްލަ އެދުމެއް އޮތް ކަމަށެވެ.

އެމެރިކާއަށް އަމާޒުކުރައްވައި އަރަގްޗީ ވިދާޅުވީ، ޑިޕްލޮމަސީ ނައްތާލުމަށް ނަތަންޔާހޫއަށް އެމެރިކާއިން ފުރުޞަތު ދީގެން އެ ޤައުމުގެ އިޤްތިޞާދު އިނދަޖައްސާލަން ބޭނުންވާނަމަ، އެއީ އެމެރިކާގެ އިޚްތިޔާރުގައި އޮތް ކަމެއް ކަމަށެވެ.

"އަޅުގަނޑުމެން ދެކޭގޮތުގައި އެއީ ވަރަށް މޮޔަ ކަމެއް. ނަމަވެސް އެފަދަ ޙާލަތަކަށް އަޅުގަނޑުމެން މިތިބީ ތައްޔާރަށް،" އޭނާ ވިދާޅުވިއެވެ.

މި ވާހަކަތަކަކީ އެމެރިކާގެ ނައިބު ރައީސް ޖޭޑީ ވެންސް ދެއްކެވި ވާހަކަފުޅަކަށް ދެއްވި ރައްދެކެވެ. ވެންސް ވަނީ ލުބުނާނުގެ މައްސަލައިގައި ސުލްހައިގެ އެއްބަސްވުން ރޫޅާލުމަށް އީރާނުން މަސައްކަތް ކުރުމަކީ "މޮޔަ" ކަމެއް ކަމަށް ބުނެފައެވެ.

މިދިޔަ އަންގާރަ ދުވަހު ސުލްހައިގެ އެއްބަސްވުން އިއުލާނުކުރި ނަމަވެސް، އެ އެއްބަސްވުމުގައި ލުބުނާން ހިމެނޭތޯ ނުވަތަ ނޫންތޯ އުފެދިފައިވާ ޚިޔާލުތަފާތުވުންތަކުގެ ސަބަބުން މަސްރަޙު ވަނީ ނުތަނަވަސްވެފައެވެ. އީރާނުގެ އޮފިޝަލުން ބުނަމުންދަނީ ލުބުނާނަށް ދޭ ހަމަލާތައް ހުއްޓުވުމަށް އަސްކަރީ ފިޔަވަޅު އެޅުމަށް ނުވަތަ ހޮރްމޫޒް ކަނޑުއޮޅި ބަންދުކުރުމަށް ފަސްނުޖެހޭނެ ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕް ބުނެފައިވަނީ ލުބުނާނުގައި ހިންގާ އޮޕަރޭޝަންތައް މަޑުޖައްސާލުމަށް ނަތަންޔާހޫ ގާތު އެދުނު ކަމަށެވެ. ނަމަވެސް، އިއްޔެވެސް އިސްރާއީލުން ލުބުނާނުގެ ދެކުނުގެ ރަށްތަކަށް ދިން ހަމަލާތަކުގައި ހަތަރު ރެސްކިއު ވޯކަރުން ހިމެނޭހެން ގިނަ ބަޔަކު ވަނީ މަރުވެފައެވެ. އަދި ބެއިރޫތުގެ އެންމެ ބޮޑު ދެ ހޮސްޕިޓަލް ހުންނަ ސަރަޙައްދު ހުސްކުރުމަށްވެސް އިސްރާއީލުން ވަނީ އަމުރުކޮށްފައެވެ.

ފާއިތުވި ދުވަސްތަކުގައި އިސްރާއީލުން ދިން ހަމަލާތަކުގައި 300 އަށްވުރެ ގިނަ މީހުން މަރުވެފައިވާއިރު، މިއީ ލުބުނާނުގެ ތާރީޚުގައި ފެނުނު އެންމެ ލޭއޮހޮރުވުން ބޮޑު ދުވަސްތަކެވެ. މި ހަނގުރާމަ އިތުރަށް ވަރުގަދަވެފައިވަނީ މިއަހަރުގެ މާރިޗު މަހުން ފެށިގެންނެވެ.