އިޒްރޭލުގެ ހަމަލާއެއްގައި މައިންބަފައިން ޝަހީދުވެ، ހަށިގަނޑުގެ ބޮޑުބައެއް ފިހުނު އިލްހާމްގެ ވާހަކަ

ހައްދުފަހަނައަޅާފައިވާ އިޒްރޭލުން ޣައްޒާ ސިޓީގައި ދިން ބޮމުގެ ހަމަލާއެއްގައި މައިންބަފައިން ޝަހީދުވެ، ހަށިގަނޑުގެ ބޮޑުބައެއް ފިހުނު، އުމުރުން އެންމެ ނުވަ އަހަރުގެ އިލްހާމް އަބޫ ހައްޖާޖު، އެ ހާދިސާ ހިނގި ދުވަހު ކަންހިނގައި ދިޔަގޮތް ކިޔައިދީފިއެވެ.

އަލްޖަޒީރާއަށް އިލްހާމް ދިން ބަސްދީގަތުމެއްގައި އޭނާ ބުނެފައިވާގޮތުން، އެދުވަހު ހިނގައިދިޔަ ކަންކަމުގެ ތެރެއިން އޭނާއަށް ހަނދާންވަނީ މަންމަ އޭނާ ގައިގައި ބައްދާލައިގެން ދުޢާ ކުރި މަންޒަރެވެ.

ބޮމުގެ އެ ހަމަލާއަށްފަހު އިލްހާމްއަށް ހޭލެވެރިކަންވީއިރު، އޭނާ އޮތީ ހޮސްޕިޓަލެއްގެ އެނދެއްގެ މަތީގައެވެ. ބަނޑުމަތީގައި މެޝިނެއް ބަހައްޓާފައިހުރި އިރު މުޅި ހަށިގަނޑު ތުރުތުރު އަޅަމުންދިޔައެވެ.

"އަހަރެންގެ ހަށިގަނޑުގައި އަތްލީމާ އެނގުނީ މުޅި ހަށިގަނޑު އަނދާފައި ހުރިކަން. ޑޮކްޓަރެއް އަހަރެންނާ ވާހަކަ ދެއްކިއިރު، އަހަރެން އަހާލިން، އަހަރެންގެ ބައްޕަ އާއި މަންމަ ކޮބައިތޯ؟ އެ ޑޮކްޓަރު ޖަވާބެއް ނުދިން." އިލްހާމް އަލްޖަޒީރާއަށް ކިޔައިދިނެވެ.

މި ހަމަލާއަކީ އިޒްރޭލުން ޣައްޒާ ސިޓީގެ އަލް-ސައްފާވެހް ސަރަހައްދަށް ދިން ހަމަލާއެކެވެ. މި ހަމަލާގައި ނުވަ އަހަރުގެ އިލްހާމް އަބޫ ހައްޖާޖުގެ މައިންބަފައިން ޝަހީދުވެފައިވާއިރު، އިލްހާމްގެ ހަށިގަނޑުގެ ބޮޑުބައެއް ވަނީ ފިހިފައެވެ. އެގޮތުން އޭނާގެ ކަރާއި، އަތުގައި އަދި ފައިގައި ހުރި ބޮޑެތި ޒަޚަމްތަކެއް ހުއްޓެވެ.

ބޮމުގެ ހަމަލާގައި އިލްހާމްގެ މައިންބަފައިން ޝަހީދުވެފައިވާކަން ގަބޫލުކުރަން އަދިވެސް އޭނާއަށް ދަތިކަމަށް އޭނާ ބުނެއެވެ.

”އަހަރެންނަށް ހީވަނީ މަންމަ އާއި ބައްޕަ އަހަރެންގެ އިންތިޒާތުގައި ހުންނާނެ ކަމަށް. އެކަމަކު އަހަރެންގެ ކާފަގެ ގެއަށް ގެންދިޔުމުން ޔަގީންވީ މައިންބަފައިން ދުނިޔޭގައި ނެތްކަން. އެދުވަހު ވަރަށް ރޮވުނު.“ އިލްހާމް ބުންޏެވެ.

އިލްހާމްގެ އިތުރުން، ޣައްޒާގެ 39،000 އަށްވުރެ ގިނަ ކުދިންގެ މަންމަ ނުވަތަ ބައްޕަ އިޒްރޭލުގެ ހަމަލާ ތަކުގައި ދުނިޔެ ދޫކޮށްފައިވާ ކަމަށް ތަފާސް ހިސާބުތަކުން ދައްކައެވެ.

ޣައްޒާގައި އިޒްރޭލުން ހިންގަމުންދާ ޤަތުލުއާންމު މެދު ކަނޑާލިކަން އިއުލާން ކުރި ނަމަވެސް، އަދިވެސް އެކަން ހުއްޓައެއް ނުލައެވެ.

ދުނިޔޭގެ ސިއްހަތު ޖަމްޢިއްޔާ (ޑަބްލިޔުއެޗްއޯ) އިން ސެޕްޓެމްބަރު މަހު ލަފާކުރި ގޮތުގައި، ޣައްޒާގެ އާބާދީގެ ދެ އިންސައްތައާ އެއްވަރުގެ، ގާތްގަނޑަކަށް 42,000 އަށްވުރެ ގިނަ މީހުންނަށް ބޮޑެތި އަނިޔާތައް ލިބިފައިވެއެވެ. މި އަނިޔާވި މީހުންގެ ތެރެއިން ގާތްގަނޑަކަށް ކުއާޓަރެއް ނުވަތަ 25 އިންސައްތައަކީ ކުޑަކުދިންނެވެ.

ޑަބްލިޔުއެޗްއޯއިން އާއްމުކުރި ތަފާސްހިސާބުތަކުން އެނގޭ ގޮތުން އެންމެ އާންމު އަނިޔާތަކުގެ ތެރޭގައި ހިމެނެނީ ހަށިގަނޑުގެ ތަންތަން ފިހުމެވެ. އެގޮތުން  3,350 އަށްވުރެ ގިނަ މީހުންގެ ހަށިގަނޑަށް އެފަދަ އަނިޔާ ލިބިފައިވެއެވެ. މި ޖަމްޢިއްޔާއިން ބުނި ގޮތުގައި، ކުޑަކުދިންނަށް މިކަމުގެ އަސަރު ވަރަށް ބޮޑަށް ކުރެއެވެ. އެގޮތުން، ޣައްޒާގައި ފިހިގެން ސަރޖަރީ ކުރެވުނު މީހުންގެ ތެރެއިން 70 އިންސައްތައަކީ ކުޑަކުދިންނެވެ. މީގެ ތެރެއިން ގިނަ ކުދިންނަކީ ފަސް އަހަރުން ދަށުގެ ކުދިންނެވެ. އަދި މި ކުދިންނަށް އަނިޔާވެފައިވަނީ ބޮމުގެ ހަމަލާތަކުގައެވެ.