ފްލޮރިޑާގައި މަދިރި މަދުކުރުމަށް، 32 މިލިއަން "ރަނގަޅު" މަދިރި ދޫކުރުމަށް ގޫގުލް އިން ހުށަހަޅައިފި

އެމެރިކާގެ ފްލޮރިޑާ ސްޓޭޓުގައި ބަލިތައް ފަތުރާ މަދިރީގެ އާބާދީ ކޮންޓްރޯލްކޮށް، ނުރައްކާތެރި ބަލިތައް މަދުކުރުމުގެ މަގުސަދުގައި ކުރިއަށް އޮތް ދެ އަހަރު ދުވަހުގެ ތެރޭގައި 32 މިލިއަން "ރަނގަޅު" މަދިރި ދޫކުރުމުގެ ހުއްދައަކަށް ގޫގުލް އިން އެދިއްޖެއެވެ.

ގޫގުލްގެ ސައިންސްވެރިންނާއި އިންޖިނިއަރުން 2016 ވަނަ އަހަރުން ފެށިގެން މަސައްކަތް ކުރަމުންދާ "ޑީބަގް" ޕްރޮޖެކްޓުގެ ދަށުން ދޫކުރާނީ ދަރިމައިނުވާ ކަހަލަ މަދިރިތަކެކެވެ. މިއީ އިންސާނުންގެ ގައިގައި ނުހަފާ، ލޭ ނުބޯ އަދި ބިސް ނޭޅޭ ގޮތަށް ތައްޔާރުކޮށްފައިވާ މަދިރިތަކެކެވެ.

މި މަދިރިތައް މިހާތަނަށް ސިންގަޕޫރާއި ބްރިޓިޝް ވާޖިން އައިލެންޑްސްގައި ބޭނުންކޮށްފައިވާއިރު، ދެން މި މަޝްރޫއު ފެށުމަށް ހަމަޖެހިފައިވަނީ ފްލޮރިޑާ އާއި ކެލިފޯނިއާގައެވެ.

މި މަޝްރޫއު ހިނގާ ގޮތް

"ޑީބަގް" ޕްރޮޖެކްޓުން މައިގަނޑު ގޮތެއްގައި އަމާޒުކުރަނީ ޑެންގީ، ޗިކަންގުންޔާ، ޒިކާ އަދި ރީނދޫ ހުން ފަތުރާ "އީޑީސް އެޖިޕްޓައި" މަދިރިއަށެވެ. ގޫގުލް އިން ބުނާ ގޮތުގައި މިއީ "ގޯސް" މަދިރިތަކާ ދެކޮޅަށް "ރަނގަޅު" މަދިރި ބޭނުންކޮށްގެން ކުރާ ހަނގުރާމައެކެވެ.

މި މަޝްރޫއުގައި ދޫކުރާ "ރަނގަޅު" މަދިރިތަކަކީ "ވޮލްބަކިއާ" ކިޔާ ގުދުރަތީ ބެކްޓީރިއާއެއް ހުންނަ ފިރިހެން މަދިރިތަކެކެވެ. މި މަދިރިތައް އަންހެން މަދިރިތަކާ ގުޅުމުން އަޅާ ބިސްތަކުން މަދިރި ލާވާ ނުއުފެދޭނެއެވެ. މި ފިރިހެން މަދިރި އަކީ އިންސާނުންގެ ގައިގައި ނުހަފާ މަދިރިއަކަށް ވުމުން، މީގެ ސަބަބުން ބަލި ފެތުރުމުގެ ބިރެއް ނޯވެއެވެ. މި އުސޫލުން މަދިރިތައް ދޫކުރަމުން ދިޔުމުން،ޱދުވަސްތައް ފާއިތުވަމުންދާ ވަރަކަށް ބަލި ފަތުރާ މަދިރީގެ އާބާދީ މަދުވެގެންދާނެއެވެ.

މި މަސައްކަތުގައި އެއްވެސް ކަހަލަ ކެމިކަލެއް، ވިހަ މާއްދާއެއް ނުވަތަ ޖެނެޓިކް މޮޑިފިކޭޝަނެއް ބޭނުންނުކުރާ ކަމަށް ގޫގުލް އިން ބުނެއެވެ.

ފްލޮރިޑާގައި ޕްރޮޖެކްޓް ކުރިއަށްގެންދާ ގޮތް

އެމެރިކާގެ އެންވަޔަރަންމަންޓަލް ޕްރޮޓެކްޝަން އެޖެންސީ އިން މެއި 6 ވަނަ ދުވަހު ހާމަކުރި ގޮތުގައި، ގޫގުލް އިން ވަނީ އަހަރަކު 16 މިލިއަން މަދިރި، ދެ އަހަރު ދުވަހުގެ މުއްދަތަށް ފްލޮރިޑާ އަދި ކެލިފޯނިއާގައި ދޫކުރުމުގެ ހުއްދައަކަށް އެދިފައެވެ. އީ.ޕީ.އޭ އިން މިކަމާ މެދު ގޮތެއް ނިންމުމުގެ ކުރިން، އާންމުންގެ ހިޔާލަށް ޖޫން 5 ވަނަ ދުވަހާ ހަމައަށް ވަނީ ހުޅުވާލާފައެވެ.

މީގެ ކުރިން މި މަޝްރޫއު ކާމިޔާބުވެފައިވޭތަ؟

ސިންގަޕޫރުގެ ނޭޝަނަލް އެންވަޔަރަންމަންޓް އެޖެންސީއާ ގުޅިގެން 2018 ވަނަ އަހަރުން ފެށިގެން މި މަޝްރޫއު ކުރިއަށްގެންދެއެވެ. މިހާރުވެސް އެ ގައުމުގައި ހަފްތާއަކު 10 މިލިއަނަށްވުރެ ގިނަ މަދިރި ދޫކުރެއެވެ. ސިންގަޕޫރުގައި ކުރި ތަޖުރިބާތަކުން ދައްކާ ގޮތުގައި، މި މަސައްކަތުގެ ސަބަބުން މަދިރީގެ އާބާދީ 80 އިން 90 އިންސައްތައާ ދެމެދުގެ މިންވަރަކަށް މަދު ކުރެވިފައިވާއިރު، ޑެންގީ ޖެހޭ މިންވަރު 70 އިންސައްތައަށްވުރެ ބޮޑަށް ދަށްކުރެވިފައިވެއެވެ.

މިއީ 1950 ގެ އަހަރުތަކުން ފެށިގެން އެކި ބާވަތުގެ ސޫފިތައް ކޮންޓްރޯލް ކުރުމަށް ބޭނުންކުރަމުން އަންނަ "ސްޓެރައިލް އިންސެކްޓް ޓެކްނީކް" އެވެ. މީގެ ކުރިން މޭވާގައި އަޅާ ފަނި ފަދަ ތަކެތި ނައްތާލުމަށްވެސް މި އުސޫލު ވަނީ ކާމިޔާބުކަމާއެކު ބޭނުންކޮށްފައެވެ.