އިންޑޮނޭޝިޔާގެ ބިންގަނޑު ކަނޑައިގެން ދިއުމުގެ ހާދިސާއެއްގައި 49 މީހުން މަރު

އިންޑޮނޭޝިޔާގެ ވެސްޓް ޖާވާގެ ވެސްޓް ބަންޑުންގް ރީޖެންސީގެ ޕަސިރްލަންގޫ އަވަށަށް މިދިޔަ ޖަނަވަރީ މަހުގެ 24 ވަނަ ދުވަހު ކުރިމަތިވި ބިންގަނޑު ކަނޑައިގެން ދިޔުމުގެ ހާދިސާއެއްގައި ބޮޑެތި ގެއްލުންތަކެއް ވެއްޖެއެވެ.

ގިނަ ދުވަސްތަކެއް ވަންދެން މެދުނުކެނޑި ބޯކޮށް ވާރޭ ވެހުމުގެ ސަބަބުން ދިމާވި މި ހާދިސާގައި، މީހުން ދިރިއުޅޭ ސަރަހައްދުތަކަށް ފަސްގަނޑު ފައިބައި، މަދުވެގެން 49 މީހުން ވަނީ މަރުވެފައެވެ. އިންޑޮނޭޝިޔާގެ ކަމާބެހޭ އިދާރާތަކުން ބުނާ ގޮތުގައި އަދިވެސް 15 މީހަކު ފެނިފައެއް ނުވެއެވެ. ސިފައިންނާއި، ފުލުހުން އަދި އާންމު ހިދުމަތްތެރިން ހިމެނޭ ސަލާމަތީ ޓީމުތަކުން ދަނީ ފަސްގަނޑުގެ ތެރެއިން މީހުން ހޯދުމުގެ އުނދަގޫ މަސައްކަތް ހުއްޓުމެއް ނެތި ކުރަމުންނެވެ.

މި ދުވަސްވަރަކީ އިންޑޮނޭޝިޔާގެ ވިއްސާރަ މޫސުމުގެ ދުވަސްވަރުކަމަށްވުމުން އެ ގައުމަށް ވަރަށް ބޮޑަށް ވާރޭވެހި، ފެންބޮޑުވުމުގެ ހާދިސާތައް ކުރިމަތިވެ، ބޮޑެތި އެތައް ގެއްލުންތަކެއް ކޮންމެ ފަހަރަކުވެސް ކުރިމަތިވެއެވެ. ވަކިން ހާއްސަކޮށް، މި ހާދިސާގައިވެސް ފަރުބަދަމަތީގެ ފަސްގަނޑު މާބޮޑަށް ތެމި، ފަސްގަނޑު ދޫވުމުގެ ސަބަބުން ކުއްލިއަކަށް ބިންގަނޑު ކަނޑައިގެން ގޮސް، ގެތަކާއި އުޅަނދުފަހަރުގެ އިތުރުން މުހިންމު ވަސީލަތްތައް ވަނީ ސުންނާފަތިވެފައެވެ. މަރުވި މީހުންގެ ތެރޭގައި އެ ސަރަހައްދުގައި ތަމްރީނު ހަދަމުންދިޔަ ސިފައިންގެ ބައެއް މީހުންވެސް ހިމެނެއެވެ.

މި ހާދިސާއާ ގުޅިގެން ސަތޭކައަށްވުރެ ގިނަ މީހުން އެމީހުންގެ ގެދޮރާއި މުދާ ދޫކޮށް ރައްކާތެރި ސަރަހައްދުތަކަށް ބަދަލުވާން ޖެހިފައިވާއިރު، ވަގުތީ ހިޔާވަހިކަންދޭ މަރުކަޒުތައް ވަނީ މީހުންނައިގެން ފުރިފައެވެ. ސަރުކާރާއި އިންސާނީ އެހީ ފޯރުކޮށްދޭ ޖަމިއްޔާތަކުން ކާބޯތަކެއްޗާއި ބޭސްފަރުވާ ފޯރުކޮށްދިނުމުގެ މަސައްކަތް ކުރަމުންދިޔަ ނަމަވެސް، ކާރިސާގެ ބޮޑުކަމުން އެހީ ފޯރުކޮށްދިނުމުގައި ބޮޑެތި ގޮންޖެހުންތަކެއް ވަނީ ކުރިމަތިވެފައެވެ. މީގެ އިތުރުން، އަދިވެސް އެ ސަރަހައްދަށް ވާރޭ ވެހެމުންދާތީ، އިތުރު ބޯޓަނޑުގަނޑުތައް ފޭބުމުގެ ބިރު އޮތުމާއެކު، މީހުން ހޯދުމުގެ މަސައްކަތް ވަނީ އިތުރަށް ދަތިވެފައެވެ.

މި ހިތާމަވެރި ހާދިސާގައި ލޯބިވާ މީހުން ވަކިވެދިއުމުގެ ހިތާމަ ޕަސިރްލަންގޫގެ ރައްޔިތުން ކުރަމުންދާއިރު، ދިރިއުޅުން އަލުން އާރާސްތުކުރުމުގެ ބޮޑު ގޮންޖެހުން ވެސް އެމީހުންނަށް ވަނީ ކުރިމަތިވެފައެވެ. އަދި ކުރިއަށް އޮތް ތަނުގައި މިފަދަ ކާރިސާތަކުން ރައްކާތެރިވުމަށްޓަކައި އަވަހަށް އިންޒާރުދޭ ނިޒާމުތައް ހަރުދަނާކުރުމާއި، ކާރިސާތަކަށް ތައްޔާރުވުމުގެ މަސައްކަތްވެސް ވަނީ އިތުރަށް ހަރުދަނާ ކުރުމުގެ މަސައްކަތް ވެސް ފަށާފައެވެ.