ޤަތުލްޢާއްމު އަލުން ފެށުން؛ ހާމަކޮށްދިނީ ޔަހޫދީންނަކީ އެއްބަސްވުންތަކާ ޚިލާފްވާ މުނާފިގުންކަން!

2023 ވަނައަހަރުގެ އޮކްޓޯބަރ މަހުގެ 7 ވަނަ ދުވަހުންފެށިގެން މި އަހަރުގެ ޖަނަވަރީ މަހުގެ 19 ވަނަދުވަހާ ހަމައަށް ހައްދުފަހަނައަޅާފައިވާ ޔަހޫދީ ޖަމާޢަތް، އިސްރާއިލުން ޣައްޒާގައި ހިންގަމުންދިޔަ ޤަތުލްޢާއްމު މެދުކަނޑާލަން އެ ޖަމާޢަތުން އެއްބަސްވެފައިވަނީ ގިނަ މަޝްވަރާތަކެއް އަރަބި ގައުމުތަކާއި އެމެރިކާއާއި ފަލަސްޠީނުގެ މިނިވަންކަމަށް ޖިހާދުކުރާ ހަމާސް ޖަމާޢަތާއެކު ކުރުމަށްފަހުގައެވެ.

މި އެއްބަސްވުމުގެ ފުރަތަމަ މަރުހަލާގެ ދަށުން، އިސްރާއިލުން ބަންދުކޮށްފައިވާ ފަލަސްތީނުގެ މުސްލިމުން ދޫކުރުމަށާއި، ހަމާސްގެ ދަށުގައި ތިބި އިސްރާއިލުގެ މީހުން ދޫކުރުމަށް ނިންމިއެވެ. އަދި ޣައްޒާގެ ރައްޔިތުންނަށް ކާބޯތަކެއްޗާއި، ބޭސްފަރުވާ ލިބޭނެ މަގު ތަނަވަސްކޮށްދިނުމަށްވެސް އެއްބަސްވެވުނެވެ.

މިފަދައިން އެއްބަސްވެވުނު ނަމަވެސް، ނަތަންޔާހޫ ހުރީ އެއްބަސްވުމަށް ޢަމަލުކުރަން ތައްޔާރަށް ނޫން ކަމަށާ، ވަކި ހިސާބަކުން އެއްބަސްވުމާއި ދެކޮޅަށް ކަންކަން ކުރިއަށްދާނެ ކަމުގެ އިޝާރާތްތައް ފުރަތަމަ ދުވަހުން ފެށިގެންވެސް އިސްރާއިލުން ވަނީ ދީފައެވެ.

އެގޮތުން، ޖަނަވަރީ 19 ވަނަ ދުވަހުން ފެށިގެން މި މާރިޗު މަހުގެ 17 ވަނަދުވަހުގެ ނިޔަލަށް، އިސްރާއިލުން ވަނީ އެކި ގޮތްގޮތުން ޣައްޒާގެ ރައްޔިތުންނަށް ޖެއްސުންކޮށް އަނިޔާކޮށްފައެވެ. އަދި ޣައްޒާއަށް ހަމަލާތައް ދިނުން ހުއްޓާލުމަށް އެއްބަސްވެފައި ވީ ނަމަވެސް، އެ ވޭތުވި ދެމަސް ދުވަހުގެ ތެރޭގައިވެސް ޣައްޒާއަށް ބޮން އަޅައި، ހަމަލާތައް ދީ، 170 އަށްވުރެ ގިނަ މީހުން ވަނީ ޝަހީދު ކޮށްލާފައެވެ.

ޣައްޒާގެ ރައްޔިތުންނަށް ކާބޯތަކެއްޗާއި ސިއްހީފަރުވާ ހޯދޭނެ މަގުތައް ހުޅުވާލުމަށް އެއްބަސްވުމުގައި ލިޔެވިފައި ވީ ނަމަވެސް، މާރިޗުމަހުގެ 2  ވަނަ ދުވަހުން ފެށިގެން އެ ޚިދުމަތްތައް އެ ސިޓީއަކަށް ނުލިބެއެވެ. އެގޮތުން، ޣައްޒާގެ 2.1 މިލިއަނަށްވުރެ ގިނަ ރައްޔިތުންނަށް ބޭނުންވާ ކާބޯތަކެއްޗާއި، ބޭސް ފަދަ ޒަރޫރީ ވަސީލަތްތައް އެތެރެކުރެވެން ހުރި މައި ދޮރުތައް އިސްރާއިލުން ބަންދުކުރި އެވެ.

އަދި ޣައްޒާއަށް ތެލާއި ގޭސް، ފޯރުކޮށްދިނުން ހުއްޓުވައި ކަރަންޓްގެ ޚިދުމަތްވެސް މެދުކަނޑާލިއެވެ. މިކަން ކަމުގެ ސަބަބުން، ޣައްޒާގެ ރައްޔިތުންނަށް ކާބޯތަކެތި ފޯރުކޮށްދިނުމަށް ހިންގަމުންއައި 22 ބޭކަރީގެ ތެރެއިން 6 ބޭކަރީއެއް ބަންދުކުރަންޖެހި، ދެންހުރި ބޭކަރީތައްވެސް ހިންގުމަށް ދަތިވެގެންދިޔައެވެ.

މީގެ އިތުރުން، ޤަތުލްޢާއްމު މެދުކަނޑާލާފައި އޮތް އިރުވެސް، އިސްރާއިލުން ވަނީ، ޣައްޒާގައި އެމީހުންގެ އޮފީހެއް ހުޅުވައި، ޣައްޒާގެ ރައްޔިތުން އެމީހުންގެ ބިމުން ބޭރުކޮށް، އެތަންތަނަށް އިސްރާއިލުން ވެރިވެގަތުމަށް ކުރަންޖެހޭ ކަންކަން ކުރުމަށް ތައްޔާރުވަމުންނެވެ. އިސްރާއިލުގެ މި ޕްލޭނަށް އެމެރިކާގެ އެހީތެރިކަން ފުރިހަމަށް ލިބުނެވެ.

އެހެންކަމުން، ޤަތުލްޢާއްމު މެދުކަނޑާލަާފައި އޮތް މުއްދަތުގެ ތެރޭގައިވެސް، އިސްރާއިލުން ވަނީ، ހާހަކަށްވުރެ ގިނަފަހަރު އެއްބަސްވުމާއި ޚިލާފުވެފައި ކަމަށް ޣައްޒާއިން ވަނީ ބުނެފައެވެ.

އަދި މިމަހު 18 ވަނަ ދުވަހު އިސްރާއިލުން ވަރުގަދައަށް ޤަތުލްޢާއްމު ފަށާފައި މިވަނީ، ހަމާސްގެ ދަށުގައި ތިބި އިސްރާއިލްގެ ގައިދީން ދޫކުރާނެ ކަމަށް ހަމާސްއިން ބުނަމުންދަނިކޮށެވެ.

ކަންމިހެން ހުރުމުން، 48،000 އަށްވުރެ ގިނަ މީހުން ޝަހީދުކޮށް، އެތައް ހާސް ބަޔަކު ޒަޚަމްކޮށްލައި، މުސްލިމުންގެ ގެދޮރު ސުންނާފަތިކޮށްލުމަށްފަހު، ޤަތުލްޢާއްމު މެދުކަނޑާލުމަށް އެއްބަސްވި ނަމަވެސް، އެ އެއްބަސްވި މުއްދަތުގެ ތެރޭގައި އެއްބަސްވުމާއި އެއްގޮތަށް ޔަހޫދީން ޢަމަލުކޮށްފައި ނުވާކަން އެނގިހާމަވެގެން ދެއެވެ. އެހެންކަމުން، މިކަމުން ވެސް ޔަހޫދީންނަކީ އަބަދުވެސް އެއްބަސްވުންތަކާއި ޚިލާފްވާ މުނާފިގު ބައެއްކަން ވަނީ ސާބިތުވެފައެވެ.

.