ރަސްގެފާނު ޗާލްސް، ޓްރަމްޕަށް: އިނގިރޭސިވިލާތް ނެތްނަމަ އެމެރިކާ މީހުން ވާހަކަދައްކާނީ ފަރަންސޭސި ބަހުން
އެމެރިކާގެ ވައިޓް ހައުސްގައި ބޭއްވުނު ރަސްމީ ހަފްލާއެއްގެ ތެރެއިން އިނގިރޭސިވިލާތުގެ ރަސްގެފާނު ޗާލްސް، އެމެރިކާގެ ރައީސް ޑޮނަލްޑް ޓްރަމްޕަށް ތާރީޚީ ހަގީގަތްތަކަކަށް ބިނާކޮށް މަޖާޒީ ރައްދެއް ދެއްވައިފިއެވެ.
ރަސްގެފާނު މިހެން ވިދާޅުވީ، އަންގާރަ ދުވަހުގެ ރޭ ވައިޓް ހައުސްގެ އީސްޓް ރޫމްގައި ބޭއްވި ދައުލަތުގެ ޖާފަތެއްގެ ތެރެއިންނެވެ.
މި ހަފްލާ ތެރޭގައި ވާހަކަފުޅު ދައްކަވަމުން ރަސްގެފާނު ޗާލްސް ވަނީ، މީގެ ކުރިން ރައީސް ޓްރަމްޕް ދައްކަވާފައިވާ ވާހަކަފުޅަކަށް އިޝާރާތް ކުރައްވާފައެވެ. އެގޮތުން، އެމެރިކާގެ އެހީތެރިކަން ނެތްނަމަ ޔޫރަޕްގެ ގައުމުތަކުގައި މިއަދު ވާހަކަ ދައްކާނީ ޖަރުމަނު ބަހުން ކަމަށް ޓްރަމްޕް ވިދާޅުވެފައިވާ ބަހަށް ރަސްގެފާނު ރައްދު ދެއްވިއެވެ. އެގޮތުން ރަސްގެފާނު ޓްރަމްޕަށް ރައްދު ދެމުން ވިދާޅުވީ، އިނގިރޭސިވިލާތުގެ އެހީތެރިކަން ނެތްނަމަ އެމެރިކާގެ ރައްޔިތުން މިއަދު ވާހަކަ ދައްކާނީ ފަރަންސޭސި ބަހުން ކަމަށެވެ.
ރަސްގެފާނު ޗާލްސް ދެއްކި ވާހަކަ ފެންނަ ވީޑިއޯއެއް
މީގެ އިތުރުން، ރަސްގެފާނު ވަނީ 1814 ވަނަ އަހަރު އިނގިރޭސި ސިފައިން ވައިޓް ހައުސްގައި ރޯކޮށްލި ހާދިސާއަށް އިޝާރާތް ކުރައްވައި، އެއީ ވައިޓް ހައުސް "މަރާމާތު" ކުރުމަށް އިނގިރޭސިން ކުރި މަސައްކަތެއްގެ ގޮތުގައި ސިފަކުރައްވައި މަޖާ ޖޯކުތަކެއް ވެސް ޖައްސަވާފައެވެ. މި ވާހަކަތަކާއެކު ހަފްލާގެ މަސްރަހު ވަރަށް ބޮޑަށް ހިނިގަނޑަކަށް ބަދަލުވެގެން ދިޔައެވެ.
ޓްރަމްޕް ވަނީ ރަސްގެފާނުގެ މި ވާހަކަފުޅުތަކަށް ތައުރީފު ކުރައްވައި، ރަސްގެފާނު އެމެރިކާގެ ކޮންގްރެސްގައި ދެއްވި ތަގުރީރަށް ވެސް މަރުހަބާ ވިދާޅުވެފައެވެ. ދެ ގައުމުގެ ދެމެދުގައި އޮންނަ "ޚާއްސަ ގުޅުން" ފާހަގަކުރައްވަމުން، ރަސްގެފާނު ވަނީ ދެ ގައުމުގެ މާޒީއާއި ކުރިމަގުގެ އެއްބައިވަންތަކަމުގެ މައްޗަށް އަލިއަޅުވާލައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
