ސައުދީ އާއި ޤަތަރު ހައިސްޕީޑް-ރެއިލް އަކުން ގުޅާލަން އެއްބަސްވެއްޖެ

ސައުދީ އަރަބިއްޔާއާއި ގަތަރުގެ ދެމެދު ހައި-ސްޕީޑް އިލެކްޓްރިކް ރެއިލް ލިންކެއް އަޅައި ދެގައުމު ގުޅާލުމަށް އެއްބަސްވުމެއްގައި ސޮއިކޮށްފިއެވެ. މި ރެއިލް ލިންކް ގުޅުވައިލާނީ ސައުދީގެ ވެރިރަށް ރިޔާޟާއި ގަތަރުގެ ވެރިރަށް ދޯހާއާ ދެމެދު، ދައްމާމް އަދި އަލް-އަހްސާ މެދުވެރިކޮށެވެ.

ސައުދީ އަރަބިއްޔާގެ ފަރާތުން އެއްބަސްވުމުގައި ސޮއިކުރެއްވީ ޓްރާންސްޕޯޓް އެންޑް ލޮޖިސްޓިކްސް މިނިސްޓަރު ސާލިޙް އަލް-ޖައްސަރެވެ. ޤަތަރުގެ ފަރާތުން ސޮއިކުރެއްވީ، ޤަޠަރުގެ ޓްރާންސްޕޯޓް މިނިސްޓަރު މުޙައްމަދު ބިން އަބްދުالله އާލް ޘާނީއެވެ. އެއްބަސްވުމުގައި ސޮއިކުރެވުނީ ސައުދީގެ ވަލީއަހުދު އަދި ބޮޑުވަޒީރު މުޙައްމަދު ބިން ސަލްމާން އަދި ޤަޠަރުގެ އަމީރު ޝެއިޚް ތަމީމް ބިން ޙަމަދު އާލް ޘާނީގެ ހާޒިރުގައެވެ.

މި 785 ކިލޯމީޓަރުގެ ރޭލު މަގު، ސައުދީ އަރަބިއްޔާގެ ވެރިރަށް ރިޔާޟާއި ޤަޠަރުގެ ވެރިރަށް ދޯހާ ގުޅުވައިލާނެއެވެ. މީގެ ތެރޭގައި އަލް-ޙޮފޫފާއި ދަމާމް ފަދަ މުހިންމު ސަރަޙައްދުތަކުގައި ހުއްޓުންތައް ހުންނާނެއެވެ. މީގެ އިތުރުން ކިންގް ސަލްމާން ބައިނަލްއަޤްވާމީ އެއާޕޯޓާއި ޙަމަދު ބައިނަލްއަޤްވާމީ އެއާޕޯޓް ވެސް މި ރޭލު މަގުން ގުޅުވައިލެވޭނެއެވެ.

ގަޑިއަކު 300 ކިލޯމީޓަރަށް ވުރެ ބާރު ދުވެލީގައި ދަތުރުކުރާގޮތަށް ފަރުމާކޮށްފައިވާ މި ރޭލުން، ދެ ވެރިރަށް ދެމެދު ދަތުރުކުރުމަށް ނަގާ ވަގުތު ގާތްގަނޑަކަށް ދެގަޑިއިރަށް ކުޑަކުރާނެއެވެ. މިކަމުގެ ސަބަބުން ދަތުރުފަތުރުގެ ފަސޭހަކަން އިތުރުވެ، ވިޔަފާރިއާއި ފަތުރުވެރިކަން ފުޅާވެ، އިޤްތިޞާދީ ކުރިއެރުމާއި ދިރިއުޅުމުގެ ފެންވަރު ރަނގަޅުވުމަށް އެހީތެރިވެދޭނެއެވެ.

މި ރޭލު މަގުން ކޮންމެ އަހަރަކު 10 މިލިއަނަށް ވުރެ ގިނަ ފަސިންޖަރުންނަށް ޚިދުމަތް ދެވޭނެ ކަމަށް ދެގައުމުން ލަފާކުރެވެއެވެ. މި މަޝްރޫޢުގެ ސަބަބުން 30,000 އަށް ވުރެ ގިނަ ސީދާ އަދި ނުސީދާ ވަޒީފާގެ ފުރުޞަތު އުފެދޭނެ ކަމަށްވެސް ބެލެވެއެވެ.

މަޝްރޫޢު ނިމުމުން، ދެޤައުމުގެ ޖީ.ޑީ.ޕީ އަށް ގާތްގަނޑަކަށް 115 ބިލިއަން ސައުދީ ރިޔާލްގެ އިތުރު އެހީތެރިކަމެއް ލިބޭނެކަމަށް ލަފާކުރެވެއެވެ.

މި މަޝްރޫޢު ހަ އަހަރުގެ ތެރޭގައި ނިންމާލުމަށް ކަނޑައަޅާފައިވާއިރު، ބައިނަލްއަޤްވާމީ އެންމެ މަތީ ފެންވަރުގެ ކޮލިޓީއާއި ރައްކާތެރިކަމަށް އިސްކަންދީ، އެޑްވާންސްޑް ރޭލު ޓެކްނޮލޮޖީއާއި ސްމާޓް އިންޖިނިއަރިންގގެ އުޞޫލުތައް ބޭނުންކުރެވޭނެއެވެ. މި ނިޒާމުގެ ސަބަބުން ރައްކާތެރިކަމާއި އެކު ކަންކަން ހިންގުމަށް އެހީވެ، ތިމާވެށި ދެމެހެއްޓެނިވިކަން ކުރިއެރުވުމާއި، ކާބަން ބޭރުކުރާ މިންވަރު ކުޑަކޮށް، ސަރަޙައްދުގައި އީޖާދީ އަދި ދެމެހެއްޓެނިވި ދަތުރުފަތުރުގެ ހައްލުތަކަށް ބަދަލުވުމަށް މަގުފަހިކޮށްދޭނެއެވެ.