ބަންގްލަދޭޝް: ހައްދުފަހަނައެޅި ޖަމާއަތްތައް އަލުން ތަރުތީބުވަނީ؟

ބަންގްލާދޭޝްގެ ވެރިރަށް ޑާކާގެ ސަވާރާއި އަޝޫލިއާ ސަރަހައްދުން ގޮވާތަކެއްޗާއި ބޮންތަކެއް ފެނުމާއި ގުޅިގެން، އެ ގައުމުގައި ހައްދުފަހަނައަޅާފައިވާ ހަނގުރާމަވެރި ޖަމާއަތްތައް އަލުން އިންތިޒާމުވެ، ވަރުގަދަވަމުންދާ ކަމުގެ ބިރުބޮޑުވެއްޖެއެވެ.

ތަހުގީގީ އިދާރާތަކުން ހާމަކުރާ ގޮތުގައި ފަހަކަށް އައިސް ހިންގާފައިވާ މިފަދަ ބައެއް ހާދިސާތަކަކީ ނިއޯ-ޖޭއެމްބީ އަށް ނިސްބަތްވާ ހަނގުރާމަވެރިންގެ އަމަލުތަކެކެވެ. އަދި އެމީހުން ބޮޑެތި ހަމަލާތަކެއް ދިނުމަށް ރާވަމުންދާ ކަމުގެ އިންޒާރުވެސް ކަމާބެހޭ ފަރާތްތަކުން ވަނީ ދީފައެވެ.

ވޭތުވެދިޔަ ދެ ހަފުތާގެ ތެރޭގައި ސަވާރާއި އަޝޫލިއާ ސަރަހައްދުން މަދުވެގެން 16 ގޮވާތަކެތި ފެނިފައިވާއިރު، އޭގެ ތެރޭގައި ބާރުގަދަ ދެ "ޕްރެޝަރ ކުކަރު" ބޮންވެސް ހިމެނެއެވެ. އެންމެ ފަހުން މިފަދަ ތަކެތި ފެނިފައިވަނީ މިދިޔަ އަންގާރަ ދުވަހުއެވެ. އެ ދުވަހު ފުލުހުން ކުރިއަށްގެންދިޔަ ތަފާތު އޮޕަރޭޝަންތަކެއްގައި 14 ޕައިޕް ބޮމާއި ބޮން އުފެއްދުމަށް ބޭނުންކުރާ ތަކެތި ހޯދާފައިވާއިރު، ސަވާރުގެ މިސްކިތަކާއި މަދުރަސާއެއް ކައިރިންވެސް ވަނީ ބާރުގަދަ ގޮވާތަކެއްޗެއް ފެނިފައެވެ.

ހަނގުރާމަވެރިންގެ ހަރަކާތްތައް ފެންމަތިވާން ފަށާފައިމިވަނީ ފާއިތުވި އަހަރުގެ ފަހުކޮޅުން ފެށިގެންނެވެ. މިދިޔަ އަހަރުގެ ޑިސެމްބަރު 26 ގައި ސައުތު ކެރާނީގަންޖްގެ އަލް-ގުރާ މަދުރަސާގައި ހިނގި ގޮވުމަށްފަހު، ޑާކާއާއި އެކި ސަރަހައްދުތަކުން ހަތިޔާރާއި ގޮވާތަކެތި ފެނުމާއި ބޮމުގެ ހަމަލާތައް ހިމެނޭގޮތަށް މަދުވެގެން 11 ހާދިސާއެއްގައި ނިއޯ-ޖޭއެމްބީގެ ބައިވެރިވުންވާ ކަމަށް ތަހުގީގުކުރާ ފަރާތްތަކުން ގަބޫލުކުރެއެވެ.

މީގެ އިތުރުން، އޮގަސްޓް 11 ވީ އަންގާރަ ދުވަހު ސަވާރުގެ ޖާމިއާ އިލްމުލް އިލާ ސޮސައިޓީ މަދުރަސާއާއި ޖާމިއާ މިސްކިތް ކުރިމަތީގައިވާ ޖަންގަލީ ސަރަހައްދަކުން ކަޅު ޓޭޕް އޮޅާފައިވާ ޕްރެޝަރ ކުކަރު ބޮމެއް ވަނީ ފެނިފައެވެ. އެރޭ ހެމާޔަތުޕޫރުން އާރިފް ހުސައިން ކިޔާ މީހަކު ގޮވާތަކެއްޗާއެކު ހައްޔަރުކުރުމަށްފަހު، ޝާމްޕޫރުގެ ގެއަކުން ގޮވާތަކެއްޗާއި ބޮން ހަދާ ސާމާނު ފުލުހުން ވަނީ ހޯދާފައެވެ. ޖުލައި 30 ގައިވެސް އަޝޫލިއާގެ ފިހާރައެއް ބޭރުގައި ބަހައްޓާފައި ހުރި ދަބަހަކުން މިފަދަ ޕްރެޝަރ ކުކަރު ބޮމެއް ފެނިފައިވެއެވެ.